'2026ರ ಐಪಿಎಲ್ ಅಂತ್ಯದ ವೇಳೆಗೆ ಭಾರತವು 2027ರ ಏಕದಿನ ವಿಶ್ವಕಪ್‌ಗೆ ನೀಲನಕ್ಷೆ ಹೊಂದಿರುತ್ತದೆ': ಗೌತಮ್ ಗಂಭೀರ್

2026ರ ಟಿ20 ವಿಶ್ವಕಪ್ ಮುಗಿದಿದ್ದು, ಭಾರತ ಕ್ರಿಕೆಟ್ ತಂಡದ ಮುಂದಿನ ಗಮನ 2027ರ ಏಕದಿನ ವಿಶ್ವಕಪ್ ಮೇಲೆ ಕೇಂದ್ರೀಕೃತವಾಗಲಿದೆ. ಸತತ ಎರಡು ಬಾರಿ ವಿಶ್ವಕಪ್ ಗೆದ್ದಿರುವ ಮೆನ್ ಇನ್ ಬ್ಲೂ ತಂಡ, 2011ರಲ್ಲಿ ಕೊನೆಯ ಬಾರಿಗೆ 50 ಓವರ್‌ಗಳ ಸ್ವರೂಪದಲ್ಲಿ ವಿಶ್ವಕಪ್ ಗೆದ್ದಿತ್ತು. ಇದೀಗ 16 ವರ್ಷದ ನಂತರ ಮತ್ತೊಮ್ಮೆ ಟ್ರೋಫಿ ಗೆಲ್ಲುವ ಗುರಿಯನ್ನು ಟೀಂ ಇಂಡಿಯಾ ಹೊಂದಿದೆ. ಭಾನುವಾರ ಅಹಮದಾಬಾದ್‌ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆದ ಟಿ20 ವಿಶ್ವಕಪ್ ಫೈನಲ್ ಪಂದ್ಯದಲ್ಲಿ ಭಾರತ ನ್ಯೂಜಿಲೆಂಡ್ ವಿರುದ್ಧ ಭರ್ಜರಿ ಜಯ ಸಾಧಿಸುವ ಮೂಲಕ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿತು. ಭಾರತದ ಗೆಲುವಿನ ನಂತರ, ಮುಖ್ಯ ಕೋಚ್ ಗೌತಮ್ ಗಂಭೀರ್ ಅವರು ಏಕದಿನ ವಿಶ್ವಕಪ್‌ಗೆ ಸಿದ್ಧತೆ ಯಾವಾಗ ಪ್ರಾರಂಭವಾಗುತ್ತದೆ ಎಂಬುದನ್ನು ಬಹಿರಂಗಪಡಿಸಿದ್ದಾರೆ.

ಇಂಡಿಯಾ ಟುಡೇ ಜೊತೆ ಮಾತನಾಡಿದ ಗಂಭೀರ್, ಐಪಿಎಲ್ 2026ನೇ ಆವೃತ್ತಿ ಮುಗಿದ ನಂತರ 2027ರ ಏಕದಿನ ವಿಶ್ವಕಪ್‌ಗೆ ತಯಾರಿ ಆರಂಭವಾಗಲಿದೆ. ಇತ್ತೀಚಿನ ದಿನಗಳಲ್ಲಿ ಈ ಸ್ವರೂಪವನ್ನು ಹೆಚ್ಚು ಆಡದ ಕಾರಣ ತಂಡವು ಮಾರ್ಕ್ಯೂ ಟೂರ್ನಮೆಂಟ್‌ಗಾಗಿ ಮೊದಲೇ ಯೋಜನೆ ರೂಪಿಸುವುದು ಉತ್ತಮ ಎಂದು ಹೇಳಿದ್ದಾರೆ.

'2027ರ ವಿಶ್ವಕಪ್‌ಗಾಗಿ ಯೋಜನೆ ಐಪಿಎಲ್ ನಂತರ ಆರಂಭವಾಗಲಿದೆ. ಐಪಿಎಲ್ 2026 ಮತ್ತು ವಿಶ್ವಕಪ್ ನಡುವೆ 25 ರಿಂದ 30 ಏಕದಿನ ಪಂದ್ಯಗಳಿವೆ. ಇತ್ತೀಚಿನ ದಿನಗಳಲ್ಲಿ ಈ ಸ್ವರೂಪವನ್ನು ಹೆಚ್ಚು ಆಡಲಾಗುತ್ತಿಲ್ಲ. ನಾವು ಬೇಗನೆ ಯೋಜನೆ ಪ್ರಾರಂಭಿಸಿದರೆ, ಅದು ನಮಗೆ ಉತ್ತಮವಾಗಿರುತ್ತದೆ' ಎಂದು ಗಂಭೀರ್ ಹೇಳಿದರು.

2027ರ ಏಕದಿನ ವಿಶ್ವಕಪ್ ದಕ್ಷಿಣ ಆಫ್ರಿಕಾದಲ್ಲಿ ನಡೆಯಲು ನಿರ್ಧರಿಸಲಾಗಿದೆ. ದಕ್ಷಿಣ ಆಫ್ರಿಕಾದಲ್ಲಿ ಕ್ರಿಕೆಟ್ ಆಡುವುದು ಸುಲಭವಲ್ಲ ಮತ್ತು ತಂಡದ ಸಂಯೋಜನೆಯನ್ನು ಕಂಡುಹಿಡಿಯಬೇಕು ಮತ್ತು ಆ ಪರಿಸ್ಥಿತಿಗಳಲ್ಲಿ ಆಡಲು ಸೂಕ್ತವಾದ ಆಟಗಾರರನ್ನು ಆಯ್ಕೆದಾರರು ಮತ್ತು ತರಬೇತುದಾರರು ಗುರುತಿಸುತ್ತಾರೆ. ಐಪಿಎಲ್ 2026 ಮುಗಿಯುವ ಹೊತ್ತಿಗೆ 2027ರ ಏಕದಿನ ವಿಶ್ವಕಪ್‌ನ ನೀಲನಕ್ಷೆ ಸಿದ್ಧವಾಗಲಿದೆ ಎಂದು ಭಾರತೀಯ ಮುಖ್ಯ ಕೋಚ್ ಹೇಳಿದರು.