ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ತಂಡದ ಬ್ಯಾಟ್ಸ್‌ಮನ್ ವೆಂಕಟೇಶ್ ಅಯ್ಯರ್, ಕೋಲ್ಕತ್ತಾ ನೈಟ್ ರೈಡರ್ಸ್ (ಕೆಕೆಆರ್) ತಂಡವು ತನ್ನನ್ನು ಉಳಿಸಿಕೊಂಡು, ಶುಭಮನ್ ಗಿಲ್ ಅವರನ್ನು ತಂಡದಿಂದ ಬಿಡುಗಡೆ ಮಾಡಲು ನಿರ್ಧರಿಸಿದ ನಂತರ ಅಭಿಮಾನಿಗಳ ಆನ್‌ಲೈನ್ ದ್ವೇಷದ ಬಗ್ಗೆ ಮಾತನಾಡಿದ್ದಾರೆ. ಐಪಿಎಲ್ 2022ಕ್ಕೂ ಮೊದಲು, ಕೆಕೆಆರ್ ಗಿಲ್ ಅವರನ್ನು ತಂಡದಿಂದ ಕೈಬಿಟ್ಟಿತು. ಅಂತಿಮವಾಗಿ ಅವರು ಹಾರ್ದಿಕ್ ಪಾಂಡ್ಯ ಮತ್ತು ರಶೀದ್ ಖಾನ್ ಜೊತೆಗೆ ಮೂವರು ಆಟಗಾರರಲ್ಲಿ ಒಬ್ಬರಾಗಿ ಗುಜರಾತ್ ಟೈಟಾನ್ಸ್ (ಜಿಟಿ) ತಂಡಕ್ಕೆ ₹8 ಕೋಟಿಗೆ ಸೇರ್ಪಡೆಯಾದರು. ಮುಂಬರುವ ಪಾಡ್‌ಕಾಸ್ಟ್‌ಗಾಗಿ ಟೀಸರ್‌ನಲ್ಲಿ, ಗಿಲ್ ಶತಕ ಬಾರಿಸಿದಾಗಲೆಲ್ಲ ತಮ್ಮನ್ನು ಟ್ರೋಲ್ ಮಾಡಲಾಗುತ್ತಿದೆ ಎಂದು ವೆಂಕಟೇಶ್ ಬಹಿರಂಗಪಡಿಸಿದ್ದಾರೆ.
'ನಾನು ಬಹಳ ದೀರ್ಘಕಾಲದಿಂದ ಸಾಕಷ್ಟು ದ್ವೇಷಕ್ಕೆ ಗುರಿಯಾಗಿದ್ದೇನೆ. ಇಂದಿಗೂ ಕೂಡ, ಶುಭಮನ್ ಗಿಲ್ ಶತಕ ಬಾರಿಸಿದರೆ, ನೀವು ಕೆಕೆಆರ್ ಪುಟಕ್ಕೆ ಹೋಗಿ ನೋಡಿದರೆ, ಜನರು 'ಬಂಗಾರವನ್ನು ಹುಡುಕುವ ಭರದಲ್ಲಿ ನಾವು ವಜ್ರವನ್ನೇ ಕಳೆದುಕೊಂಡೆವು' ಎಂಬಿತ್ಯಾದಿ ಕಾಮೆಂಟ್‌ಗಳನ್ನು ಮಾಡುತ್ತಿರುತ್ತಾರೆ' ಎಂದು ಆಕಾಶ್ ಚೋಪ್ರಾ ಅವರೊಂದಿಗಿನ 'ಬೈತ್ & ಬೋಲ್' (Baith & Bol) ಪಾಡ್‌ಕಾಸ್ಟ್‌ನಲ್ಲಿ ವೆಂಕಟೇಶ್ ಹೇಳಿದ್ದಾರೆ.
ಕೆಕೆಆರ್ ತಂಡವು ತನ್ನನ್ನು ಕೈಬಿಟ್ಟ ನಂತರ, ಐಪಿಎಲ್ 2026ರ ಹರಾಜಿಗೂ ಮುನ್ನ ನಡೆದ ಬೆಳವಣಿಗೆಗಳ ಬಗ್ಗೆ ಮಾತನಾಡಿದ ಅವರು, ಈ ಸಂದರ್ಭದಲ್ಲಿ, ತಮ್ಮ ನಿರ್ಧಾರವನ್ನು ಬದಲಾಯಿಸಿಕೊಳ್ಳುವಂತೆ ಕೋರಲು ಅವರು ನೇರವಾಗಿ ತಂಡದ ಸಹ-ಮಾಲೀಕ ಶಾರುಖ್ ಖಾನ್ ಅವರನ್ನು ಸಂಪರ್ಕಿಸಿದ್ದಾಗಿ ತಿಳಿಸಿದರು.
'ನಾನು ಒಂದು ರೀತಿಯಲ್ಲಿ ಮನವಿ ಮಾಡಿಕೊಂಡಿದ್ದೆ. ನಾನು ಶಾರುಖ್ ಸರ್ ಅವರನ್ನೇ ಕೇಳಿದ್ದೆ' ಎಂದು ಅವರು ಹೇಳಿದರು.
ಅಂತಿಮವಾಗಿ ಹಾಲಿ ಚಾಂಪಿಯನ್ ಆರ್‌ಸಿಬಿ ತಂಡಕ್ಕೆ ಸೇರ್ಪಡೆಗೊಂಡ 31 ವರ್ಷದ ಈ ಆಟಗಾರ, ಐಪಿಎಲ್ 2026ರ ಹರಾಜಿನ ಸಂದರ್ಭದಲ್ಲಿ ತಾನು ಕೆಕೆಆರ್ ಬಗ್ಗೆ ಯೋಚನೆಯೇ ಮಾಡಿರಲಿಲ್ಲ. 2025ರ ಸೀಸನ್‌ಗೆ ಮುನ್ನ ತಮ್ಮನ್ನು ಮರಳಿ ತಂಡಕ್ಕೆ ಸೇರಿಸಿಕೊಳ್ಳಲು ಕೆಕೆಆರ್ 23.75 ಕೋಟಿ ರೂಪಾಯಿಗಳನ್ನು ಪಾವತಿಸಿತ್ತು ಎಂಬ ವಿಷಯವಂತೂ ಅವರ ಮನಸ್ಸಿನಲ್ಲೇ ಇರಲಿಲ್ಲ ಎಂದು ತಿಳಿಸಿದ್ದಾರೆ.
'ನನ್ನ ಸಂಭಾವನೆ ಕಡಿಮೆಯಾಗುವುದರ ಬಗ್ಗೆಯೂ ನಾನು ಯೋಚಿಸಲಿಲ್ಲ. 'ಸರಿ, ಇನ್ನು ಮುಂದೆ ನಾನು ನೇರಳೆ ಬಣ್ಣದ (ಕೆಕೆಆರ್) ಜೆರ್ಸಿ ಧರಿಸುವುದಿಲ್ಲ' ಎಂದು ನಾನು ಆಗಲೇ ಅಂದುಕೊಳ್ಳಲು ಪ್ರಾರಂಭಿಸಿದ್ದೆ' ಎಂದು ಅವರು ಹೇಳಿದರು.
ಆರ್‌ಸಿಬಿ (RCB) ಸೇರಿದ ನಂತರದ ಜೀವನದ ಬಗ್ಗೆ ಮಾತನಾಡಿದ ವೆಂಕಟೇಶ್, ಈ ಫ್ರಾಂಚೈಸಿಯ ಅಭಿಮಾನಿಗಳಲ್ಲಿದ್ದ ಉತ್ಸಾಹವು ತಾನು ಹಿಂದೆಂದೂ ಕಂಡಿರದ ರೀತಿಯದ್ದಾಗಿತ್ತು ಎಂದು ತಿಳಿಸಿದರು.
'ನೀವು ನಂಬಲಿಕ್ಕಿಲ್ಲ, ಆದರೆ ಪಂದ್ಯಗಳಿಗೆ ಮುನ್ನ ಜನರು ಆರ್‌ಸಿಬಿ ಜೆರ್ಸಿಯನ್ನು ನಿಜವಾಗಿಯೂ ಪೂಜಿಸುವುದನ್ನು ನಾನು ಕಂಡೆ. ಇದೊಂದು ವಿಭಿನ್ನವಾದ ಅನುಭವ; ಅಭಿಮಾನಿಗಳ ಉತ್ಸಾಹವು ಬೇರೆಯದೇ ಹಂತದಲ್ಲಿತ್ತು' ಎಂದರು.
ಸೀಸನ್‌ನ ಆರಂಭಿಕ ಹಂತದಲ್ಲಿ ಬೆಂಚ್‌ನಲ್ಲಿ ಕೂತಿದ್ದ ವೆಂಕಟೇಶ್, ತಂಡದ ಅಗ್ರ ಕ್ರಮಾಂಕದ ಬ್ಯಾಟರ್‌ಗಳು ಕುಸಿದಾಗ 'ಇಂಪ್ಯಾಕ್ಟ್ ಸಬ್‌ಸ್ಟಿಟ್ಯೂಟ್' (ಬದಲಿ ಆಟಗಾರ) ಆಗಿ ಆರ್‌ಸಿಬಿ (RCB) ಪರ ಪದಾರ್ಪಣೆ ಮಾಡಿದರು. ಅವರು 15 ಎಸೆತಗಳಲ್ಲಿ ಅಜೇಯ 29 ರನ್ ಗಳಿಸಿದರು. ಇದರಿಂದ ಆರ್‌ಸಿಬಿ 201/8ರ ಮೊತ್ತವನ್ನು ಕಲೆಹಾಕಲು ಸಾಧ್ಯವಾಯಿತು. ಆದರೂ ಅಂತಿಮವಾಗಿ ತಂಡವು ಸೋಲನ್ನು ಎದುರಿಸಬೇಕಾಯಿತು.
ಸೀಸನ್‌ನ ನಂತರದ ಹಂತದಲ್ಲಿ, ಪಂಜಾಬ್ ಕಿಂಗ್ಸ್ ವಿರುದ್ಧ 40 ಎಸೆತಗಳಲ್ಲಿ ಅಜೇಯ 73 ರನ್‌ಗಳ ಅತ್ಯುತ್ತಮ ಇನಿಂಗ್ಸ್ ಆಡಿದರು. ಈ ಸೀಸನ್‌ನಲ್ಲಿ ಅವರು ಏಳು ಪಂದ್ಯಗಳಲ್ಲಿ 52.25 ಸರಾಸರಿಯೊಂದಿಗೆ ಒಟ್ಟು 209 ರನ್‌ಗಳನ್ನು ಗಳಿಸಿದರು. ಇದೇ ವೇಳೆ ಆರ್‌ಸಿಬಿ ಸತತ ಎರಡನೇ ಬಾರಿಗೆ ಐಪಿಎಲ್ (IPL) ಪ್ರಶಸ್ತಿಯನ್ನು ಗೆದ್ದುಕೊಂಡಿತು.
