ಭಾರತೀಯ ಹೃದ್ರೋಗ ಸಂಘದ (Cardiology Society of India) ಮಾರ್ಗಸೂಚಿಗಳ ಅನುಸಾರ ಪ್ರತಿಯೊಬ್ಬ ಭಾರತೀಯರೂ 17ನೇ ವಯಸ್ಸಿನಲ್ಲಿ ಒಮ್ಮೆ ಮೂಲಭೂತ ರಕ್ತ ಪರೀಕ್ಷೆ (ಬೇಸ್ಲೈನ್ ಬ್ಲಡ್ ಟೆಸ್ಟ್) ಮಾಡಿಸಿಕೊಳ್ಳಬೇಕು ಎಂದು ಖ್ಯಾತ ಹೃದ್ರೋಗ ತಜ್ಞ ಡಾ. ದೇವಿ ಶೆಟ್ಟಿ ಶಿಫಾರಸು ಮಾಡಿದ್ದಾರೆ.
ಇದರಿಂದ ಅಧಿಕ ಕೊಲೆಸ್ಟ್ರಾಲ್ ನ್ನು ಆರಂಭಿಕ ಹಂತದಲ್ಲೇ ಪತ್ತೆಹಚ್ಚಿ, ಹೃದಯ ಸಂಬಂಧಿ ಕಾಯಿಲೆಗಳ ಅಪಾಯ ಹೆಚ್ಚುವ ಮುನ್ನವೇ ಯುವಜನತೆ ತಮ್ಮ ಆಹಾರ ಪದ್ಧತಿ ಮತ್ತು ಜೀವನಶೈಲಿಯಲ್ಲಿ ಅಗತ್ಯ ಬದಲಾವಣೆಗಳನ್ನು ಮಾಡಿಕೊಳ್ಳಲು ಸಾಧ್ಯವಾಗುತ್ತದೆ ಎನ್ನುತ್ತಾರೆ.
ಹೊರಗಿನಿಂದ ಕಾಣಲು ಆರೋಗ್ಯವಾಗಿರುವುದು ಅಥವಾ ದೇಹ ಸದೃಢವಾಗಿದೆ ಎಂದು ಭಾಸವಾಗುವುದು ಎಂದರೆ ಹೃದಯವೂ ಆರೋಗ್ಯಕರವಾಗಿದೆ ಎಂಬುದಕ್ಕೆ ಖಾತರಿಯಲ್ಲ ಎಂದು ಹೇಳಿದರು.
ಆನುವಂಶಿಕ ಕಾರಣಗಳು, ಮೈಯೋಕಾರ್ಡೈಟಿಸ್ನಂತಹ ಪತ್ತೆಯಾಗದ ಆರೋಗ್ಯ ಸಮಸ್ಯೆಗಳು ಹಾಗೂ ಯಾವುದೇ ಲಕ್ಷಣಗಳಿಲ್ಲದೆ ಉಂಟಾಗುವ ಅಪಧಮನಿಗಳ ಅಡಚಣೆ (ಸೈಲೆಂಟ್ ಬ್ಲಾಕೇಜ್)ಗಳಿಂದ ಗಂಭೀರ ಹೃದಯ ಸಮಸ್ಯೆಗಳು ಯಾವುದೇ ಮುನ್ನೆಚ್ಚರಿಕೆ ಇಲ್ಲದೆ ಸಂಭವಿಸಬಹುದು.
ಆದ್ದರಿಂದ, ಜೀವನದ ವಿವಿಧ ಹಂತಗಳಲ್ಲಿ ವಯಸ್ಸಿಗೆ ಅನುಗುಣವಾದ ಹೃದಯ ಆರೋಗ್ಯ ತಪಾಸಣೆಗಳನ್ನು ಮಾಡಿಸಿಕೊಳ್ಳುವಂತೆ ಅವರು ಶಿಫಾರಸು ಮಾಡಿದ್ದು, ಇದರಿಂದ ಆರಂಭಿಕ ಹಂತದಲ್ಲೇ ಸಮಸ್ಯೆಗಳನ್ನು ಪತ್ತೆಹಚ್ಚಿ ಸಮಯೋಚಿತ ಚಿಕಿತ್ಸೆ ನೀಡಲು ಸಾಧ್ಯವಾಗುತ್ತದೆ ಎಂದು ಹೇಳುತ್ತಾರೆ.
