ಮಂಗಳೂರಿನಲ್ಲಿ 26 ಪಾಸ್‌ಪೋರ್ಟ್‌ ಹೊಂದಿದ್ದ ವ್ಯಕ್ತಿ ಬಂಧನ

ಮಂಗಳೂರು: ಆತಂಕಕಾರಿ ವಿದ್ಯಮಾನವೊಂದರಲ್ಲಿ ಮಂಗಳೂರು ವಿಮಾನ ನಿಲ್ದಾಣದಲ್ಲಿ 26 ಪಾಸ್‌ಪೋರ್ಟ್‌ ಗಳೊಂದಿಗೆ ಅಕ್ರಮವಾಗಿ ದುಬೈಗೆ ಪ್ರಯಾಣಿಸುತ್ತಿದ್ದ ವ್ಯಕ್ತಿಯೊಬ್ಬನನ್ನು ಬುಧವಾರ ಬಂಧಿಸಲಾಗಿದೆ.

ದುಬೈನಿಂದ ಬಂದಿಳಿದಿದ್ದ ಕೇರಳ ಮೂಲದ ಅಬ್ದುಲ್ಲಾ ತಾಲಿಪರಂಬ ಎಂಬಾತನ ಮೇಲೆ ಸಂಶಯ ಬಂದ ಕಾರಣ ಅಧಿಕಾರಿಗಳು ತೀವ್ರ ತಪಾಸಣೆಗೊಳಪಡಿಸಿದ್ದಾರೆ. ಈ ವೇಳೆ 26 ಬೇರೆ ಬೇರೆ ವ್ಯಕ್ತಿಗಳ ಪಾಸ್‌ ಪೋರ್ಟ್‌ಗಳು ಪತ್ತೆಯಾಗಿದ್ದು, ಆ 26 ವ್ಯಕ್ತಿಗಳಿಗೂ ಹಜ್ ಯಾತ್ರೆಗೆ ವೀಸಾ ಪಡೆಯಲು ಮಂಗಳೂರಿಗೆ ಬಂದಿದ್ದ. ಆದರೆ ಹಜ್ ಪ್ಯಾಕೇಜ್ ಅಂತ್ಯಗೊಂಡಿದ್ದರಿಂದ ಆ ಪಾಸ್ ಪೋರ್ಟ್ ಗಳನ್ನು ಮತ್ತೆ ಅವರಿಗೆ ಮರಳಿಸಲು ಜೆಟ್​ ಏರ್​ವೇಸ್​ ಮೂಲಕ ದುಬೈಗೆ ಪ್ರಯಾಣ ಬೆಳೆಸುತ್ತಿದ್ದಾಗ ಆರೋಪಿಯನ್ನು ವಶಕ್ಕೆ ಪಡೆಯಲಾಗಿದೆ ಎಂದು ಬಜ್ಪೆ ವಿಮಾನ ನಿಲ್ದಾಣ ಪೊಲೀಸ್ ಠಾಣೆಯ ಇನ್ಸ್ ಪೆಕ್ಟರ್ ನಾಗರಾಜ್ ಅವರು ಹೇಳಿದ್ದಾರೆ. ಅಲ್ಲದೆ ಆ ಎಲ್ಲಾ ಪಾಸ್ ಪೋರ್ಟ್ ಗಳು ಅಸಲಿ ಎಂದು ತಿಳಿಸಿದ್ದಾರೆ.

ತಪಾಸಣೆಯ ಬಳಿಕ ಅಬ್ದುಲ್ಲಾನನ್ನು ಬಜ್ಪೆ ಪೊಲೀಸರ ವಶಕ್ಕೆ ನೀಡಲಾಗಿದ್ದು ಕೂಲಂಕಷ ವಿಚಾರಣೆ ನಡೆಸಲಾಗುತ್ತಿದೆ. 

ಅಬ್ದುಲ್ಲಾ ಕೇರಳದ ಕಣ್ಣೂರಿನಲ್ಲಿ ಟ್ರಾವೆಲ್ ಏಜೆನ್ಸಿ ಹೊಂದಿದ್ದು, ದುಬೈನಲ್ಲಿ 26 ಮಂದಿಗೆ ಹಜ್ ಪ್ಯಾಕೇಜ್ ಕೊಡಿಸುವುದಾಗಿ ಭರವಸೆ ನೀಡಿದ್ದು, ಅಕ್ರಮ ಪಾಸ್ ಪೋರ್ಟ್ ಹೊಂದಿದ ಆರೋಪದ ಮೇಲೆ ಆತನನ್ನು ಬಂಧಿಸಲಾಗಿದೆ ಮತ್ತು  ಭಾರತೀಯ ಪಾಸ್ ಪೋರ್ಟ್ ಕಾಯ್ದೆ ಸೆಕ್ಷೆನ್ 12ರಡಿ ಕೇಸ್ ದಾಖಲಿಸಲಾಗಿದೆ ಎಂದು ನಾಗರಾಜ್ ತಿಳಿಸಿದ್ದಾರೆ.