ಎಲ್ಲರಿಗೂ ಒಂದೇ ನ್ಯಾಯ: ದರ್ಶನ್

ಮೈಸೂರು: ರಾಜ ಕಾಲುವೆಯಲ್ಲಿ ನಟ ದರ್ಶನ್ ಸೇರಿದಂತೆ ಕೆಲವು ಪ್ರತಿಷ್ಠಿತರ ಮನೆಗಳಿದ್ದು ಆ ಮನೆಗಳನ್ನು ಸರ್ಕಾರ ಕೆಡವುತ್ತಿಲ್ಲ, ಸಾಮಾನ್ಯ ಜನರಿಗೊಂದು ನ್ಯಾಯ, ಗಣ್ಯ ವ್ಯಕ್ತಿಗಳಿಗೆ ಇನ್ನೊಂದು ಎಂಬ ಆಪಾದನೆಗಳು ಕೇಳಿಬರುತ್ತಿವೆ. ಇಷ್ಟು ದಿನ ನಟ ದರ್ಶನ್ ಈ ಕುರಿತು ಪ್ರತಿಕ್ರಿಯಿಸಿರಲಿಲ್ಲ.  ಆದರೆ ಇಂದು ಸ್ವತಃ ದರ್ಶನ್ ಮಾಧ್ಯಮಗಳಿಗೆ ಮೈಸೂರಿನಲ್ಲಿ ಹೇಳಿಕೆ ನೀಡಿದ್ದಾರೆ. 

ಖಾಸಗಿ ವಾಹಿನಿಗಳ ಜೊತೆ ಮಾತನಾಡಿ, 'ರಾಜ ಕಾಲುವೆಯಲ್ಲಿ ನನ್ನ ಮನೆಯಿದ್ದರೆ ನಾನೆ ಬರೆದುಕೊಟ್ಟು ಬಿಡುತ್ತೇನೆ. ಎಲ್ಲರಿಗೂ ಒಂದೇ ನ್ಯಾಯ ಸ್ವಾಮಿ. ಎಲ್ಲರಿಗೂ ಏನಾಗುತ್ತದೆಯೋ ನನಗೂ ಅದೇ ಆಗುತ್ತದೆ. ವಿವಾದದ ಬಗ್ಗೆ ನನಗೆ ಸರಿಯಾಗಿ ಮಾಹಿತಿಯಿಲ್ಲ. ನನ್ನದು 40/50 ನಿವೇಶನ. ಅಧಿಕಾರಿಗಳು ಸರ್ವೆ ಮಾಡಿಕೊಂಡು ಹೋಗಿದ್ದಾರೆ. ಇನ್ನೂ ವರದಿ ಕೊಟ್ಟಿಲ್ಲ. ರಾಜ ಕಾಲುವೆಯಲ್ಲಿ ನನ್ನ ಮನೆಯಿದ್ದರೆ ಕಾನೂನು ಪ್ರಕಾರ ಉಳಿದವರಿಗೆ ಏನಾಗುತ್ತದೆಯೋ ನನಗೂ ಆಗಲಿ. ರಾಜ ಕಾಲುವೆಯಲ್ಲಿ ಕಟ್ಟಡವಿದ್ದರೆ ತೆರವುಗೊಳಿಸಬೇಕೆಂಬುದು ಸುಪ್ರೀಂ ಕೋರ್ಟ್ ಆದೇಶ.ನನ್ನ ತೀರ್ಮಾನದಂತೆ ಏನೂ ನಡೆಯುವುದಿಲ್ಲ' ಎಂದು ಹೇಳಿದ್ದಾರೆ.