ಬೆಂಗಳೂರು: ಹೆಚ್ಚಿದ ಮಾಲಿನ್ಯ, ಚಿಕ್ಕಜಾಲ ನಿವಾಸಿಗಳ ಆಕ್ರೋಶ

ಬೆಂಗಳೂರು: ಹೆಚ್ಚುತ್ತಿರುವ ಮಾಲಿನ್ಯದ ಬಗ್ಗೆ ನಗರದ ಚಿಕ್ಕಜಾಲ ನಿವಾಸಿಗಳು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. 10 ಕ್ಕೂ ಹೆಚ್ಚು ಕ್ರಷರ್‌ಗಳು ಅಪಾಯಕಾರಿ ಮಟ್ಟದ ಧೂಳನ್ನು ವಾತಾವರಣಕ್ಕೆ ಹೊರಸೂಸುವುದು ಕಂಡು ಬಂದ ನಂತರ ಮಾಲಿನ್ಯದ ಮಟ್ಟ ಹೆಚ್ಚಾಗಿರುವುದಕ್ಕೆ ಜನರು ಕೆಂಡಕಾರಿದ್ದಾರೆ.

ಸ್ಥಳೀಯ ನಿವಾಸಿಯೊಬ್ಬರು 70 ಸಹಿಗಳನ್ನು ಸಂಗ್ರಹಿಸಿ, ವಸತಿ ಪ್ರದೇಶಗಳಲ್ಲಿ ಕ್ರಷರ್‌ಗಳನ್ನು ಮುಂದುವರಿಸಬಾರದು ಎಂದು ವಲಯ ನಿಯಮಗಳು ಸ್ಪಷ್ಟವಾಗಿ ಸೂಚಿಸಿರುವುದರಿಂದ ಎಲ್ಲಾ ಕ್ರಷರ್‌ಗಳನ್ನು ಮುಚ್ಚುವಂತೆ ಒತ್ತಾಯಿಸಿ ಸರ್ಕಾರಕ್ಕೆ ಮನವಿ ಸಲ್ಲಿಸಿದ್ದಾರೆ. 

ಇನ್ನು ಕೆಲವು ನಿವಾಸಿಗಳು ಈ ಕ್ರಷರ್‌ಗಳನ್ನು ಮುಚ್ಚುವಂತೆ ಸಾರ್ವಜನಿಕ ಹಿತಾಸಕ್ತಿ ಮೊಕದ್ದಮೆ ಹೂಡಲು ಸಿದ್ಧತೆ ನಡೆಸುತ್ತಿದ್ದರೆ, ಈ ಸಮಸ್ಯೆಯ ಬಗ್ಗೆ ಹೈಕೋರ್ಟ್ ಸ್ವಯಂಪ್ರೇರಿತವಾಗಿ ಸೂಚನೆ ನೀಡುತ್ತದೆ ಮತ್ತೋರ್ವ ನಿವಾಸಿಯೊಬ್ಬರು ಭರವಸೆ ವ್ಯಕ್ತಪಡಿಸಿದರು. ಈ ಸಮಸ್ಯೆಗೆ ಪರಿಹಾರ ನೀಡುವಂತೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗೆ ಮನವಿ ಸಲ್ಲಿಸಲು ಇಲ್ಲಿನ ನಿವಾಸಿಗಳ ಮತ್ತೊಂದು ಗುಂಪು ಸಿದ್ಧತೆ ನಡೆಸಿದೆ.

ಈ ಮಧ್ಯೆ ಸ್ಥಳೀಯ ನಿವಾಸಿಗಳನ್ನುದ್ದೇಶಿಸಿ ಮಾತನಾಡಿದ ಐಐಎಸ್‌ಸಿ ಹವಾಮಾನ ಬದಲಾವಣೆಯ ದಿವೇಚ ಕೇಂದ್ರದ ಪ್ರಾಧ್ಯಾಪಕ, ಶ್ವಾಸಕೋಶ ತಜ್ಞ ಡಾ.ಎಚ್.ಪರಮೇಶ್  ವಾಯು ಮಾಲಿನ್ಯದ ಅಪಾಯಗಳ ಬಗ್ಗೆ ಮನವರಿಕೆ ಮಾಡಿಕೊಟ್ಟರು. ಮಾಲಿನ್ಯ ಸಮೀಕ್ಷೆಯ ವಿವರ ಲಭ್ಯವಾದ ನಂತರ ಚಿಕ್ಕಜಾಲದಲ್ಲಿ ಈ ಸಭೆ ನಡೆಸಲಾಯಿತು.

ಇದನ್ನೂ ಓದಿ: ಘನತ್ಯಾಜ್ಯ ನಿರ್ವಹಣಾ ನಿಯಮಗಳನ್ನು ಪಾಲಿಸದ ರಾಜ್ಯಗಳಿಗೆ 79,098 ಕೋಟಿ ರೂ. ದಂಡ!

ವಾಯು ಮಾಲಿನ್ಯದ ಅಪಾಯಗಳು, ವಿಶೇಷವಾಗಿ 2.5 ಮೈಕ್ರಾನ್‌ಗಿಂತ ಚಿಕ್ಕದಾದ ಅತ್ಯಂತ ಸೂಕ್ಷ್ಮವಾದ ಧೂಳು ದೊಡ್ಡ ಅಪಾಯವಾಗಿದೆ ಎಂದು ಡಾ.ಪರಮೇಶ್  ತಿಳಿಸಿದರು. 10 ಮೈಕ್ರಾನ್‌ಗಿಂತ ಚಿಕ್ಕದಾದ ಕಣಗಳು ಶ್ವಾಸನಾಳದಲ್ಲಿ ನೆಲೆಗೊಂಡರೆ ಹತ್ತು ಮೈಕ್ರಾನ್‌ಗಿಂತ ದೊಡ್ಡದಾದ ಧೂಳು ಮೂಗಿನ ಕುಳಿಯಲ್ಲಿ ನೆಲೆಗೊಳ್ಳುತ್ತದೆ ಮತ್ತು ಇವುಗಳಲ್ಲಿ ಪ್ರತಿಯೊಂದೂ ನಿವಾಸಿಗಳಿಗೆ ಹೆಚ್ಚಿನ ಹಾನಿ ಉಂಟುಮಾಡುತ್ತದೆ ಎಂದು ಅವರು ಹೇಳಿದರು.

ಚಿಕ್ಕಜಾಲದ ಕೆಲವರು ಹೃದಯರಕ್ತನಾಳ ಮತ್ತು ಶ್ವಾಸಕೋಶದ ಕಾಯಿಲೆಗಳಿಂದ ಬಳಲುತ್ತಿದ್ದಾರೆ ಮತ್ತು ಕೆಲವರು ಕ್ಯಾನ್ಸರ್‌ನಿಂದ ಬಳಲುತ್ತಿದ್ದಾರೆ ಎಂದು ನಿವಾಸಿಗಳು ಡಾ.ಪರಮೇಶ್ ಅವರೊಂದಿಗೆ ಮಾಹಿತಿ ಹಂಚಿಕೊಂಡರು. 2.5 ಮೈಕ್ರಾನ್‌ಗಿಂತ ಚಿಕ್ಕದಾದ ಕಣಗಳು ರಕ್ತಕ್ಕೆ ಹಾದುಹೋಗುವುದರಿಂದ ಗಂಭೀರ ಆರೋಗ್ಯ ಸಮಸ್ಯೆಗಳು ಉಂಟಾಗುತ್ತವೆ ಎಂದು ಡಾ.ಪರಮೇಶ್ ವಿವರಿಸಿದರು.

ಈ ಕುರಿತು ಕರ್ನಾಟಕ ಕ್ವಾರಿ ಮತ್ತು ಸ್ಟೋನ್ ಕ್ರಷರ್ ಮಾಲೀಕರ ಸಂಘದ ಅಧ್ಯಕ್ಷ ರವೀಂದ್ರ ಶೆಟ್ಟಿ ಅವರನ್ನು ಸಂಪರ್ಕಿಸಿದಾಗ, ಕ್ರಷರ್ ಮಾಲೀಕರು ಮಾಲಿನ್ಯ ನಿಯಂತ್ರಣ ಮಂಡಳಿಯು ನಿಗದಿಪಡಿಸಿದ ಸುರಕ್ಷತೆಗೆ ಸಂಬಂಧಿಸಿದಂತೆ ಎಲ್ಲಾ ನಿಯಮಗಳು ಮತ್ತು ನಿಯಮಗಳನ್ನು ಅನುಸರಿಸಬೇಕು ಎಂದರು.

ಯಲಹಂಕ ಶಾಸಕ ಎಸ್‌ಆರ್‌ ವಿಶ್ವನಾಥ್‌ ಅವರ ಕಚೇರಿಯನ್ನು ಸಂಪರ್ಕಿಸಿದಾಗ ಅದು ಯಲಹಂಕ ಅಲ್ಲ ಬೈತ್ರಯನಪುರ ಕ್ಷೇತ್ರದ ವ್ಯಾಪ್ತಿಗೆ ಬರುತ್ತದೆ ಎಂದು ಹೇಳಿದರು. ಕಂದಾಯ ಸಚಿವರಾಗಿರುವ ಬ್ಯಾಟರಾಯನಪುರ ಶಾಸಕ ಕೃಷ್ಣ ಬೈರೇಗೌಡ ಪ್ರತಿಕ್ರಿಯೆಗೆ ಲಭ್ಯವಾಗಲಿಲ್ಲ.