ಬೆಂಗಳೂರು: ರಾಷ್ಟ್ರೀಯ ಭಯೋತ್ಪಾದನಾ ನಿಗ್ರಹ ಸನ್ನದ್ಧತೆಯನ್ನು ಬಲಪಡಿಸುವ ಹೆಜ್ಜೆಯಾಗಿ, ಕರ್ನಾಟಕ ರಾಜ್ಯ ಪೊಲೀಸ್ ಮತ್ತು ಭಾರತೀಯ ಸೇನೆಯ 4/8 ಗೂರ್ಖಾ ರೈಫಲ್ಸ್‌ನ ಭಯೋತ್ಪಾದನಾ ನಿಗ್ರಹ ಕಾರ್ಯಪಡೆಯಾದ ಗರುಡ ಪಡೆ ಶನಿವಾರ ಜಂಟಿ ಮಾಕ್ ಡ್ರಿಲ್ ನಡೆಸಿತು.
ಅಧಿಕಾರಿಗಳ ಪ್ರಕಾರ, ತಿರುವನಂತಪುರ ಬ್ರಿಗೇಡ್‌ನ ನೇತೃತ್ವದಲ್ಲಿ ನಡೆಸಲಾದ ಈ ಮಾಕ್ ಡ್ರಿಲ್ ಅನ್ನು ಬೆಂಗಳೂರಿನಲ್ಲಿ ಹೆಚ್ಚಿನ ಭದ್ರತೆಯಲ್ಲಿ, ಬಹಿರಂಗಪಡಿಸದ ಸ್ಥಳದಲ್ಲಿ ನಡೆಸಲಾಯಿತು ಮತ್ತು ಭದ್ರತಾ ಪ್ರೋಟೋಕಾಲ್‌ಗಳಿಗೆ ಅನುಗುಣವಾಗಿ ಕಟ್ಟುನಿಟ್ಟಾದ ಗೌಪ್ಯತೆ ಕಾಯ್ದುಕೊಳ್ಳಲಾಗಿದೆ.
ಇದೇ ಮೊದಲ ಬಾರಿಗೆ ಎರಡೂ ಪಡೆಗಳು ಏಕೀಕೃತ ಕಾರ್ಯಾಚರಣೆಯ ಅಡಿಯಲ್ಲಿ ಒಟ್ಟಿಗೆ ಮಾಕ್ ಡ್ರಿಲ್ ನಡೆಸಿವೆ.
ಬಾಣಸವಾಡಿ ಮಿಲಿಟರಿ ಗ್ಯಾರಿಸನ್‌ನ ಗ್ಯಾರಿಸನ್ ಕಮಾಂಡರ್ ಅಡಿಯಲ್ಲಿ ಪರಸ್ಪರ ಸಹಾಯ ಯೋಜನೆಯ ಭಾಗವಾಗಿ ಈ ಮಾಕ್ ಡ್ರಿಲ್ ನಡೆಸಲಾಯಿತು ಮತ್ತು ರಾಜ್ಯ ಪೊಲೀಸ್, ಸಂಚಾರ ಪೊಲೀಸ್, ಬಾಂಬ್ ವಿಲೇವಾರಿ ತಂಡ, ಅಗ್ನಿಶಾಮಕ ಮತ್ತು ತುರ್ತು ಸೇವೆಗಳು, ಜಿಲ್ಲಾ ವೈದ್ಯಕೀಯ ಆರೋಗ್ಯ ತಂಡ ಸೇರಿದಂತೆ ಪ್ರಮುಖ ಇಲಾಖೆಯ ಸಿಬ್ಬಂದಿ ಭಾಗವಹಿಸಿದ್ದರು" ಎಂದು ರಕ್ಷಣಾ ಸಾರ್ವಜನಿಕ ಸಂಪರ್ಕ ಅಧಿಕಾರಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಭಯೋತ್ಪಾದಕ ಬೆದರಿಕೆಗಳಿಗೆ, ವಿಶೇಷವಾಗಿ ಸಂಕೀರ್ಣ ನಗರ ಸನ್ನಿವೇಶಗಳಲ್ಲಿ, ಸಂಬಂಧಪಟ್ಟ ಇಲಾಖೆಗಳ ಪ್ರತಿಕ್ರಿಯೆಯನ್ನು ಸಿಂಕ್ರೊನೈಸ್ ಮಾಡುವುದು, ಸಮನ್ವಯಗೊಳಿಸುವುದು ಮತ್ತು ಸಂಯೋಜಿಸುವುದು ಇದರ ಉದ್ದೇಶವಾಗಿತ್ತು ಎಂದು ಅವರು ಹೇಳಿದ್ದಾರೆ.
ಈ ಮಾಕ್ ಡ್ರಿಲ್ ಕುರಿತು ಪ್ರತಿಕ್ರಿಯಿಸಿದ ಹಿರಿಯ ಅಧಿಕಾರಿಯೊಬ್ಬರು, "ಭಯೋತ್ಪಾದನೆಯ ವಿರುದ್ಧದ ಹೋರಾಟದಲ್ಲಿ ಸಶಸ್ತ್ರ ಪಡೆಗಳು ಮತ್ತು ನಾಗರಿಕ ಸಂಸ್ಥೆಗಳ ನಡುವೆ ಏಕತೆ ಮತ್ತು ತಡೆರಹಿತ ಸಮನ್ವಯವನ್ನು ವೀಕ್ಷಿಸುವುದು ಹೃದಯಸ್ಪರ್ಶಿಯಾಗಿತ್ತು ಎಂದಿದ್ದಾರೆ.
ಇಂದಿನ ಮಾಕ್ ಡ್ರಿಲ್ ಯಾವುದೇ ರೀತಿಯ ದಾಳಿಗೆ ತ್ವರಿತವಾಗಿ ಮತ್ತು ಪರಿಣಾಮಕಾರಿಯಾಗಿ ಪ್ರತಿಕ್ರಿಯಿಸಲು ನಮ್ಮ ಸಾಮೂಹಿಕ ಸಿದ್ಧತೆಯನ್ನು ಪುನರುಚ್ಚರಿಸುತ್ತದೆ.
Advertisement
