ಹುಬ್ಬಳ್ಳಿ: ಪೋಕ್ಸೋ (POCSO) ಪ್ರಕರಣವೊಂದರ ತನಿಖೆಯ ವೇಳೆ ಮಕ್ಕಳ ಕಳ್ಳಸಾಗಣೆ ದಂಧೆಯೊಂದು ಬೆಳಕಿಗೆ ಬಂದಿದ್ದು, ಹುಬ್ಬಳ್ಳಿ-ಧಾರವಾಡ ಪೊಲೀಸರು ಮೂವರು ಆರೋಪಿಗಳನ್ನು ಬಂಧಿಸಿದ್ದಾರೆ.
ಬಂಧಿತರನ್ನು ಅಬ್ದುಲ್ ಕರೀಂ ಸೌದಾಗರ್, ಜಿಯಾವುಲ್ ನಸಾವಾಲೆ ಹಾಗೂ ಮಂಜುನಾಥ ಸುರಂಗೆಕರ್ ಎಂದು ಗುರ್ತಿಸಲಾಗಿದೆ.
15 ವರ್ಷದ ಪೋಕ್ಸೋ ಸಂತ್ರಸ್ತೆ ಎರಡನೇ ಬಾರಿಗೆ ಗರ್ಭಿಣಿಯಾದಾಗ ಈ ಘಟನೆ ಬೆಳಕಿಗೆ ಬಂದಿದೆ. ಆಕೆಯ ಮೊದಲ ಮಗುವಿನ ಬಗ್ಗೆ ಪೊಲೀಸರು ವಿಚಾರಿಸಿದಾಗ, ಕುಟುಂಬಸ್ಥರು ಮಗು ಚಿಕಿತ್ಸೆಗಾಗಿ ಹೊರಗಿದೆ ಎಂದು ಸುಳ್ಳು ಹೇಳಿದ್ದಾರೆ.
ತೀವ್ರ ವಿಚಾರಣೆ ನಡೆಸಿದಾಗ, ಆ ಮಗುವನ್ನು ಮಧ್ಯವರ್ತಿಗಳ ಮೂಲಕ ಮಾರಾಟ ಮಾಡಿರುವುದು ಪತ್ತೆಯಾಗಿದೆ. ಅಲ್ಲದೆ, ಬಾಲಕಿ ಮತ್ತೆ ಗರ್ಭಿಣಿಯಾಗಿರುವ ಸಂಗತಿಯೂ ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.
ಆರಂಭದಲ್ಲಿ ಕುಟುಂಬದವರು ಮಗುವಿನ ಬಗ್ಗೆ ಯಾವುದೇ ಮಾಹಿತಿ ನೀಡಲು ನಿರಾಕರಿಸಿದ್ದರು. ಮಗುವಿನ ತಾಯಿ ಕೂಡ ಮೌನ ವಹಿಸಿದ್ದರು. ಆದರೆ, ಕೆಲವು ಪ್ರಮುಖ ಸುಳಿವುಗಳನ್ನು ಆಧರಿಸಿ ತನಿಖೆ ಮುಂದುವರಿಸಿದ ಪೊಲೀಸರು, ಕೊನೆಗೆ ಮಂಗಳೂರಿನಲ್ಲಿ ಮಗುವನ್ನು ಪತ್ತೆಹಚ್ಚಿ, ರಕ್ಷಿಸಿದ್ದಾರೆ.
ಅಬ್ದುಲ್ ಕರೀಂ ಸೌದಾಗರ್ ಅಪ್ರಾಪ್ತ ಬಾಲಕಿಯ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ ಆರೋಪಿಯಾಗಿದ್ದಾನೆ. ಜಿಯಾವುಲ್ ನಸಾವಾಲೆ ಶಿಶು ಮಾರಾಟಕ್ಕೆ ಮಧ್ಯವರ್ತಿಯಾಗಿ ಕಾರ್ಯನಿರ್ವಹಿಸಿದ್ದು, ಮಂಜುನಾಥ ಸುರಂಗೆಕರ್ ಮಗುವನ್ನು ಖರೀದಿಸಿದ ವ್ಯಕ್ತಿಯಾಗಿದ್ದಾನೆ.
ತನಿಖೆಯಲ್ಲಿ, ಗರ್ಭಿಣಿಯಾಗಿದ್ದ ಅಪ್ರಾಪ್ತ ಬಾಲಕಿಯನ್ನು ಗಮನಿಸಿದ ಮಧ್ಯವರ್ತಿ, ಆಕೆಯ ಕುಟುಂಬದವರ ಸಂಪರ್ಕ ಬೆಳೆಸಿ, ಮಗುವನ್ನು ಮಾರಾಟ ಮಾಡಲು ಮನವೊಲಿಸಿದ್ದಾನೆ. ಮಗುವಿನ ಜನನಕ್ಕೆ ಸಂಬಂಧಿಸಿದ ವೈದ್ಯಕೀಯ ವೆಚ್ಚ ಸೇರಿದಂತೆ ಇತರೆ ಖರ್ಚುಗಳನ್ನು ತಾನೇ ಭರಿಸುವುದಾಗಿ ಹೇಳಿ ಒಪ್ಪಂದ ಮಾಡಿಸಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಶಿಶುವಿನ ಮಾರಾಟ ನಡೆದ ನಿಖರ ದಿನಾಂಕ ಇನ್ನೂ ಸ್ಪಷ್ಟವಾಗಿಲ್ಲ. ಆದರೆ, ರಕ್ಷಿಸಲಾದ ಮಗು ಸುಮಾರು ಮೂರು ತಿಂಗಳ ಪ್ರಾಯದಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಪ್ರಕರಣದ ಕುರಿತು ಪೊಲೀಸರು ಇನ್ನಷ್ಟು ತನಿಖೆ ಮುಂದುವರಿಸಿದ್ದು, ಈ ಅಕ್ರಮ ಶಿಶು ಮಾರಾಟ ಜಾಲದಲ್ಲಿ ಇನ್ನೂ ಯಾರಾದರೂ ಭಾಗಿಯಾಗಿದ್ದಾರೆಯೇ ಎಂಬುದನ್ನು ಪರಿಶೀಲಿಸುತ್ತಿದ್ದಾರೆ.
