ಲಾಹೋರ್: ಭಾರತ ಮತ್ತು ಪಾಕ್ ನಡುವಿನ ಬಾಂಧವ್ಯ ವೃದ್ಧಿಯ ಪ್ರಯತ್ನಗಳ ನಡುವೆ, ಕಾಶ್ಮೀರಿಗಳನ್ನು ಒಳಗೊಳ್ಳದ ಯಾವುದೇ ಮಾತುಕತೆಗೆ ಮುಂದಾಗಬಾರದು ಎಂದು ಮುಂಬೈ ದಾಳಿ ರೂವಾರಿ, ಉಗ್ರ ಹಫೀಜ್ ಸಯೀದ್ ಪಾಕಿಸ್ತಾನ ಪ್ರಧಾನಿ ನವಾಜ್ ಷರೀಫ್ ಗೆ ಎಚ್ಚರಿಕೆ ನೀಡಿದ್ದಾನೆ.
ಪ್ರಧಾನಿ ಷರೀಫ್ ಯಾವುದೇ ಕಾರಣಕ್ಕೂ ಭಾರತದೊಂದಿಗೆ ಏಕಪಕ್ಷೀಯ ಮೃತ್ರಿಗೆ ಕೈಚಾಚಬಾರದು. ಅಂತಾರಾಷ್ಟ್ರೀಯ ಒತ್ತಡಕ್ಕೆ ಮಣಿದು, ಅವರು ಅಂತಹ ಯತ್ನ ನಡೆಸಿದರೆ ಅದು ಕಾಶ್ಮೀರ ಜನರ ಭಾವನೆಗೆ ಧಕ್ಕೆ ತರಲಿದೆ ಎಂದು ಸಯೀದ್ ಹೇಳಿದ್ದಾನೆ.
ಕಾಶ್ಮೀರಿ ಜನರನ್ನು ಒಳಗೊಳ್ಳದ ಯಾವುದೇ ಮಾತುಕತೆ ಪ್ರಕ್ರಿಯೆ ಅರ್ಥಹೀನ ಎಂದಿರುವ ಸಯೀದ್, ಈ ವಿಷಯದಲ್ಲಿ ಎಂತಹದ್ದೇ ಸಂದರ್ಭದಲ್ಲಿ ಅಂತಾರಾಷ್ಟ್ರೀಯ ಒತ್ತಡಕ್ಕೆ ಮಣಿಯದಂತೆ ಷರೀಫ್ ಅವರಿಗೆ ತಿಳಿ ಹೇಳಿದ್ದಾನೆ.
