ಅಹಮದಾಬಾದ್: ಐಸಿಯು ವಾರ್ಡ್ ನಲ್ಲಿ ಜೀವನ್ಮರಣ ಹೋರಾಟ ನಡೆಸುತ್ತಿರುವ ರೋಗಿಗಳ ಮುಂದೆ ವೈದ್ಯರು ಹಾಗೂ ನರ್ಸ್ ಗಳು ನವರಾತ್ರಿಯ ಗರ್ಭಾ ನೃತ್ಯ ಪ್ರದರ್ಶನ ಮಾಡಿ, ವ್ಯಾಪಕ ಟೀಕೆಗೆ ಗುರಿಯಾಗಿದ್ದಾರೆ.
ವೈದ್ಯರು ಹಾಗೂ ನರ್ಸ್ ಗಳು ಗರ್ಭಾ ನೃತ್ಯ ಮಾಡಿರುವ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಜನರ ಆಕ್ರೋಶಕ್ಕೆ ಗುರಿಯಾಗಿದೆ.
ಅಹಮದಾಬಾದ್ ನ ಸೋಲಾ ಸಿವಿಲ್ ಆಸ್ಪತ್ರೆಯ ನೀತಿ ನಿಯಮಗಳನ್ನು ಗಾಳಿಗೆ ತೂರಿದ ಸಿಬ್ಬಂದಿ ಜೋರಾದ ಧ್ವನಿಯಲ್ಲಿ ಸಂಗೀತವನ್ನು ಹಾಕಿ ಆಸ್ಪತ್ರೆಯ ಸಿಬ್ಬಂದಿಗಳು ನವರಾತ್ರಿ ಗರ್ಭಾ ನೃತ್ಯದಲ್ಲಿ ಪಾಲ್ಗೊಂಡರು.
ಆಸ್ಪತ್ರೆಯಲ್ಲಿ ನೂತನವಾಗಿ ನಿರ್ಮಾಣವಾದ ಡಯಾಲಿಸಿಸ್ ಘಟಕವನ್ನು ಗುಜರಾತ್ ಹಣಕಾಸು, ವೈದ್ಯಕೀಯ ಶಿಕ್ಷಣ ಹಾಗೂ ಕುಟುಂಬ ಮತ್ತು ಆರೋಗ್ಯ ಕಲ್ಯಾಣ ಸಚಿವರೂ ಆಗಿರುವ ನಿತಿನ್ ಭಾಯ್ ಪಟೇಲ್ ಉದ್ಘಾಟಿಸಿ ತೆರಳಿದ ಬಳಿಕ ಆಸ್ಪತ್ರೆ ಸಿಬ್ಬಂದಿ ನೃತ್ಯ ಮಾಡಿದ್ದಾರೆ.
