ನವದೆಹಲಿ: ಫೆತುಲ್ಹಾ ಗುಲೆನ್ ಭಯೋತ್ಪಾದಕ ಸಂಘಟನೆ(ಫೆಟೊ)ಭಾರತದ ಒಳಗೆ ಅಕ್ರಮವಾಗಿ ನುಸುಳಿದೆ ಎಂದು ಟರ್ಕಿಯ ವಿದೇಶಾಂಗ ಸಚಿವ ಮೆವ್ಲುಟ್ ಕವುಸೊಗ್ಲು ಹೇಳಿದ್ದಾರೆ.
ಫೆಟೊ ರಹಸ್ಯ ಅಪರಾಧ ಅಂತಾರಾಷ್ಟ್ರೀಯ ಸಂಪರ್ಕ ಜಾಲವಾಗಿದ್ದು, ವಿಶ್ವಾದ್ಯಂತ ಅಸ್ತಿತ್ವವನ್ನು ಹೊಂದಿದೆ. ಸಂಘ-ಸಂಸ್ಥೆಗಳು ಮತ್ತು ಶಾಲೆಗಳ ಸಹಾಯದಿಂದ ಈ ಭಯೋತ್ಪಾದಕ ಸಂಘಟನೆ ಭಾರತದ ಒಳಗೆ ಕೂಡ ನುಗ್ಗಿದೆ ಎಂದು ಅದು ಹೇಳಿದೆ.
ಭಾರತದ ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್ ಅವರೊಂದಿಗೆ ಮಾತುಕತೆ ನಡೆಸಿದ ನಂತರ ಪಿಟಿಐ ಸುದ್ದಿಸಂಸ್ಥೆಗೆ ಸಂದರ್ಶನ ನೀಡಿದ ಅವರು, ನಾನು ಈ ವಿಷಯವನ್ನು ಸಚಿವೆಗೆ ತಿಳಿಸಿರುವುದಾಗಿ ಹೇಳಿದ್ದಾರೆ.
ಭಾರತ ಭೇಟಿಯಲ್ಲಿರುವ ಅವರು, ಎಲ್ಲಾ ದೇಶಗಳಲ್ಲಿಯೂ ಫೆಟೊ ತನ್ನ ಅಸ್ತಿತ್ವವನ್ನು ಹೊಂದಿದೆ, ತಮ್ಮ ದೇಶದಿಂದ ಹೊಡೆದೋಡಿಸಲು ಕೂಡಲೇ ಕಾರ್ಯಪ್ರವೃತ್ತವಾಗಬೇಕು ಎಂದು ಕೇಳಿಕೊಂಡಿರುವುದಾಗಿ ಹೇಳಿದರು.
