ಅರ್ನಬ್ ಗೋಸ್ವಾಮಿ ಹೊಸ ಚಾನಲ್ ನ ಹೆಸರು 'ರಿಪಬ್ಲಿಕ್'

ನವದೆಹಲಿ: ನವೆಂಬರ್ ನಲ್ಲಿ ಟೈಮ್ಸ್ ನೌ ಸುದ್ದಿ ವಾಹಿನಿಯ ಪ್ರಧಾನ ಸಂಪಾದಕ ಹುದ್ದೆಗೆ ರಾಜೀನಾಮೆ ನೀಡಿದ್ದ ಟಿವಿ ಪತ್ರಕರ್ತ ಅರ್ನಬ್ ಗೋಸ್ವಾಮಿ ಅವರ ಹೊಸ ಚಾನಲ್ ಹೆಸರು ಬಹಿರಂಗವಾಗಿದೆ.

'ರಿಪಬ್ಲಿಕ್' ಅರ್ನಬ್ ಗೋಸ್ವಾಮಿ ಪ್ರಾರಂಭಿಸುತ್ತಿರುವ ಹೊಸ ಚಾನಲ್ ನ ಹೆಸರಾಗಿದ್ದು, 2017 ರಲ್ಲಿ ನಡೆಯಲಿರುವ ಉತ್ತರ ಪ್ರದೇಶ ವಿಧಾನಸಭಾ ಚುನಾವಣೆಗೂ ಮುನ್ನ (2017 ರ ಮೊದಲಾರ್ಧದಲ್ಲಿ) ಪ್ರಾರಂಭವಾಗಲಿದೆ ಎಂದು ಹೇಳಲಾಗುತ್ತಿದೆ.    

ಚರ್ಚಾ ಕಾರ್ಯಕ್ರಮಗಳ ಮೂಲಕ ಜನಪ್ರಿಯತೆ ಪಡೆದಿದ್ದ ಅರ್ನಬ್ ಗೋಸ್ವಾಮಿ ಅವರಿ ನವೆಂಬರ್ ತಿಂಗಳಲ್ಲಿ ಟೈಮ್ಸ್ ನೌ ಸಂಪಾದಕ ಹುದ್ದೆಗೆ ರಾಜೀನಾಮೆ ನೀಡಿದ್ದರು. ರಾಜೀನಾಮೆ ನೀಡಿದ ನಂತರ ಹಲವು ಕಾರ್ಯಕ್ರಮಗಳಲ್ಲಿ ಭಾಗವಹಿಸಿದ್ದ ವೇಳೆ ಮಾಧ್ಯಮಗಳ ಕಾರ್ಯನಿರ್ವಹಣೆ ಬಗ್ಗೆ ಮಾತನಾಡಿದ್ದ ಅರ್ನಬ್ ಗೋಸ್ವಾಮಿ ಭಾರತೀಯ ಮಾಧ್ಯಮ ಜಗತ್ತಿನಲ್ಲಿ ಪಶ್ಚಿಮದ ಏಕಾಧಿಪತ್ಯ ಅಂತ್ಯಗೊಳ್ಳಬೇಕು ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದರು. ಟೈಮ್ಸ್ ಸಮೂಹದ ಸುದ್ದಿವಾಹಿನಿಯಿಂದ ಹೊರಬಂದ ನಂತರ ಅರ್ನಬ್ ಗೋಸ್ವಾಮಿ ತಮ್ಮದೇ ಆದ ಹೊಸ ಚಾನಲ್ ನ್ನು ಪ್ರಾರಂಭಿಸುತ್ತಿದ್ದಾರೆ.