ರಾಜೀವ್ ಗಾಂಧಿ ಹತ್ಯೆಯ ನ್ಯಾಯಬದ್ಧ ತನಿಖೆ ನಡೆಸುವಂತೆ ಭರವಸೆ ನೀಡಿ: ಪ್ರಮುಖ ಸಾಕ್ಷಿದಾರ ಪ್ರಧಾನಿಗೆ ಮನವಿ

ನವದೆಹಲಿ:ಮಾಜಿ ಪ್ರಧಾನಿ ರಾಜೀವ್ ಗಾಂಧಿಯವರ ಹತ್ಯೆಯ ಹಿಂದಿನ ಬಹುದೊಡ್ಡ ಪಿತೂರಿಯ ಬಗ್ಗೆ ತನಿಖೆ ನಡೆಸಬೇಕೆಂದು ಸಲ್ಲಿಸಲಾಗಿರುವ ಮನವಿ ಕುರಿತು ಕೇಂದ್ರ ಮತ್ತು ಸಿಬಿಐಯ ಪ್ರತಿಕ್ರಿಯೆಯನ್ನು ಸುಪ್ರೀಂ ಕೋರ್ಟ್ ಕೇಳಿದೆ.

ಹತ್ಯೆಯ ಪ್ರಮುಖ ಸಾಕ್ಷಿದಾರ ರಮೇಶ್ ದಲಾಲ್, ಪ್ರಧಾನ ಮಂತ್ರಿಯವರಿಗೆ ಪತ್ರ ಬರೆದು ಈ ವಿಷಯದಲ್ಲಿ ಮಧ್ಯೆ ಪ್ರವೇಶಿಸಿ ಮುಕ್ತ ಮತ್ತು ನ್ಯಾಯಬದ್ಧ ತನಿಖೆ ನಡೆಸಬೇಕೆಂದು ಒತ್ತಾಯಿಸಿದ್ದಾರೆ.

ಜೈನ್ ಆಯೋಗದ ತನಿಖೆಯ ಪ್ರಮುಖ ಸಾಕ್ಷಿದಾರ ರಮೇಶ್ ದಲಾಲ್ ಆಗಿದ್ದು ಹತ್ಯೆಯ ಹಿಂದಿನ ಪಿತೂರಿ ಕುರಿತು ತನಿಖೆ ನಡೆಸಲು ರಚಿಸಲಾದ ಆಯೋಗವಾಗಿದೆ. 

ಏಪ್ರಿಲ್ 19ರಂದು ಕೇಂದ್ರ ಗೃಹ ಖಾತೆ ಕಾರ್ಯದರ್ಶಿ ರಾಜೀವ್ ಮೆಹ್ರಿಶಿ ಮತ್ತು ಸಿಬಿಐ ನಿರ್ದೇಶಕ ಅನಿಲ್ ಸಿನ್ಹಾ ಅವರಿಗೆ ಬರೆದ ಪತ್ರದಲ್ಲಿ ತನಿಖೆಯಲ್ಲಿನ ಕೆಲವು ನ್ಯೂನತೆಗಳನ್ನು ಉಲ್ಲೇಖಿಸಿ ಹೆಚ್ಚಿನ ತನಿಖೆ ನಡೆಸುವಂತೆ ಕೋರಿದ್ದರು. 

ನಂತರ ಪ್ರಧಾನಿಗೆ ಪತ್ರ ಬರೆದಿರುವ ರಮೇಶ್ ದಲಾಲ್, ''ನಾನು ಏಪ್ರಿಲ್  19ರಂದು ಬರೆದಿರುವ ಪತ್ರದಲ್ಲಿ ಉಲ್ಲೇಖಿಸಿರುವಂತೆ ಸಿಬಿಐಯಿಂದ ಹತ್ಯೆಯ ಹಿಂದಿನ ಪಿತೂರಿ ಕುರಿತು ಪೂರಕ ಚಾರ್ಚ್ ಶೀಟ್ ಸಲ್ಲಿಕೆಯನ್ನು ಎದುರು ನೋಡುತ್ತಿದ್ದೇನೆ. ಸಿಬಿಐಯ ಪ್ರತಿಕ್ರಿಯೆಯನ್ನು ಸುಪ್ರೀಂ ಕೋರ್ಟ್ ಕೇಳಿರುವುದರಿಂದ ಈ ಕೇಸಿನಲ್ಲಿ ಮಧ್ಯ ಪ್ರವೇಶಿಸಬೇಕೆಂದು ಹೇಳಿದ್ದಾರೆ.

1991ರಲ್ಲಿ ಮಾಜಿ ಪ್ರಧಾನಿ ರಾಜೀವ್ ಗಾಂಧಿಯವರ ಹತ್ಯೆಯ ಹಿಂದಿನ ಪಿತೂರಿ ಬಗ್ಗೆ ಚೆನ್ನೈನ ಟಾಡಾ ಕೋರ್ಟ್ ಆದೇಶವಿದ್ದರೂ ಕೂಡ ಸಿಬಿಐ ತನಿಖೆ ನಡೆಸಲಿಲ್ಲ ಏಕೆ, ಈ ಬಗ್ಗೆ ಪ್ರತಿಕ್ರಿಯೆ ನೀಡಬೇಕೆಂದು ಸುಪ್ರೀಂ ಕೋರ್ಟ್ ಡಿಸೆಂಬರ್ 14ರಂದು ಕೇಂದ್ರ ಮತ್ತು ಸಿಬಿಐಗೆ ನಿರ್ದೇಶನ ನೀಡಿತ್ತು.