ಮೋದಿಯವರ ಲಾಹೋರ್ ಭೇಟಿ ಬಗ್ಗೆ ನನಗೆ ತಿಳಿದಿತ್ತು: ಸುಷ್ಮಾ ಸ್ವರಾಜ್

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರು ಪಾಕಿಸ್ತಾನ ಭೇಟಿ ಮಾಡಿದ ವಿಷಯ ವಿದೇಶಾಂಗ ಸಚಿವೆಗೆ ಗೊತ್ತೇ ಇರಲಿಲ್ಲ ಎಂದು ಕಾಂಗ್ರೆಸ್ ಉಪಾಧ್ಯಕ್ಷ ರಾಹುಲ್ ಗಾಂಧಿ ಹೇಳಿದ್ದಕ್ಕೆ ಸುಷ್ಮಾ ಸ್ವರಾಜ್ ಉತ್ತರಿಸಿದ್ದಾರೆ.

ಪಾರ್ಲಿಮೆಂಟ್ ನಲ್ಲಿ ರಾಹುಲ್ ಈ ವಿಷಯವನ್ನು ಹೇಳುವಾಗ ನಾನು ಅಲ್ಲಿರಲಿಲ್ಲ. ನಾನು ಅಲ್ಲಿರುತ್ತಿದ್ದರೆ ಆಗಲೇ ಉತ್ತರ ನೀಡುತ್ತಿದ್ದೆ. ಪ್ರಧಾನಿಯವರ ಲಾಹೋರ್ ಭೇಟಿ ಬಗ್ಗೆ ನನಗೆ ತಿಳಿದಿರಲಿಲ್ಲ ಎಂದು ರಾಹುಲ್ ಹೇಳುತ್ತಿದ್ದಾರೆ. ಆದರೆ ಅದು ಸರಿಯಲ್ಲ. ಪಾಕಿಸ್ತಾನದ ಪ್ರಧಾನಿ ನವಾಜ್ ಶರೀಫ್ ಅವವರೊಂದಿಗೆ ಫೋನ್ ಸಂಭಾಷಣೆ ಮಾಡಿದ್ದರೂ ಅದರ ಬಗ್ಗೆ ನನ್ನ ಅಭಿಪ್ರಾಯ ಏನೆಂದು ಕೇಳಲು ಮೋದಿಯವರು ನನಗೆ ಕರೆ ಮಾಡುತ್ತಾರೆ ಎಂದು ಸುಷ್ಮಾ ಹೇಳಿದ್ದಾರೆ.

ಶರೀಫ್ ಅವರ ಜತೆ ಮಾತುಕತೆ ನಡೆಸಲು ನಾನು ಮೋದಿಯವರಿಗೆ ಬೆಂಬಲ ನೀಡುತ್ತಿದ್ದೆ. ಪಾಕ್ ಮತ್ತು ಭಾರತ ನಡುವಿನ ಹೊಸ ಬಾಂಧವ್ಯ ಲಾಹೋರ್ ಭೇಟಿ ನಾಂದಿಯಾಗುತ್ತದೆ ಎಂದು ನಾನು ಅವರಿಗೆ(ಪ್ರಧಾನಿ) ಹೇಳಿದ್ದೆ. ಲಾಹೋರ್‌ಗೆ ಹೋಗಲು ನಾನು ಅವರನ್ನು ಒತ್ತಾಯಿಸಿದ್ದೆ. ಅವರು ವಾಪಸ್ ಬಂದಾಗ ಅವರನ್ನು ಸ್ವಾಗತಿಸಲು ನಾನು ವಿಮಾನ ನಿಲ್ದಾಣ ಕ್ಕೆ ಹೋಗಿದ್ದನ್ನು ಎಲ್ಲರೂ ನೋಡಿದ್ದಾರೆ. 10 ನಿಮಿಷಗಳ ಕಾಲ ನಾನು ಅಲ್ಲೇ ನಿಂತು ಅವರಲ್ಲಿ ಮಾತನಾಡಿದ್ದೆ. ಲಾಹೋರ್ ಭೇಟಿ ಬಗ್ಗೆ ಜನಾಭಿಪ್ರಾಯ ಮತ್ತು ಪ್ರತಿಕ್ರಿಯೆಗಳ ಬಗ್ಗೆಯೂ ನಾನು ಪ್ರಧಾನಿಯವರಲ್ಲಿ ಮಾತನಾಡಿದ್ದೆ ಎಂದು ಸುಷ್ಮಾ ಹೇಳಿದ್ದಾರೆ.