ನವದೆಹಲಿ: ಆನೆಗಳ ಮಾಲೀಕರಿಗೆ ಕೇರಳ ಸರ್ಕಾರ ನೀಡುವ ಮಾಲೀಕತ್ವದ ಪ್ರಮಾಣಪತ್ರಕ್ಕೆ ಸುಪ್ರೀಂ ಕೋರ್ಟ್ ತಡೆ ನೀಡಿದೆ.
ನ್ಯಾಯಮೂರ್ತಿ ದೀಪಕ್ ಮಿಶ್ರಾ ಮತ್ತು ಎಸ್ ಕೆ ಸಿಂಗ್ ಅವರನ್ನೊಳಗೊಂಡ ನ್ಯಾಯಾಪೀಠ, ಆನೆಗಳ ಮಾಲೀಕರಿಗೆ ಒಡೆತನದ ಸರ್ಟಿಫಿಕೇಟ್ ನೀಡಬೇಡಿ ಎಂದು ಕೇರಳ ಸರ್ಕಾರಕ್ಕೆ ಸೂಚಿಸಿದೆ.
ಇನ್ನು ಈಗಾಗಲೇ ಆನೆಯ ಮಾಲೀಕತ್ವ ಸರ್ಟಿಫಿಕೇಟ್ ಪಡೆದಿರುವವರು ಯಾವುದೇ ಕಾರಣಕ್ಕೂ ಹೊರ ರಾಜ್ಯಗಳಿಗೆ ಆನೆಗಳನ್ನು ಸ್ಥಳಾಂತರಿಸುವಂತಿಲ್ಲ ಎಂದು ಪೀಠ ತಿಳಿಸಿದೆ.
ಧಾರ್ಮಿಕ ಮೆರವಣಿಗೆಗೆ ಬಳಸಲು ಆನೆಗಳನ್ನು ಸಾಕಲಾಗುತ್ತಿದ್ದು, ಆನೆಗಳನ್ನು ಹಿಂಸಿಸಲಾಗುತ್ತಿದೆ. ಹಾಗಾಗಿ ಇದಕ್ಕೆ ತಡೆ ನೀಡಬೇಕು ಎಂದು ವನ್ಯಜೀವಿ ರಕ್ಷಣಾ ಮತ್ತು ಪುನರ್ವಸತಿ ಕೇಂದ್ರ ಸೇರಿದಂತೆ ಆರು ಸಂಸ್ಥೆಗಳು ಸಲ್ಲಿಸಿದ್ದ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಾಪೀಠ ಈ ಆದೇಶ ಹೊರಡಿಸಿದೆ.
ಧಾರ್ಮಿಕ ಮೆರವಣಿಗೆಗಳಿಗೆ ಆನೆಗಳನ್ನು ಬಳಸಿಕೊಳ್ಳಲಾಗುತ್ತಿದ್ದು, ಹೊರ ರಾಜ್ಯಗಳಿಗೆಲ್ಲಾ ಕಳಿಸಿ, ಹಿಂಸಿಸಲಾಗುತ್ತಿದೆ. ಅಲ್ಲದೇ, ಧಾರ್ಮಿಕ ಉತ್ಸವದಲ್ಲಿ ಉಂಟಾಗುವ ಗಲಭೆಯಲ್ಲಿ ಆನೆಗಳಿಗೆ ತೀವ್ರವಾಗಿ ತೊಂದರೆಯಾಗುತ್ತಿದೆ ಎಂದು ಸಂಸ್ಥೆಗಳು ಆರೋಪಿಸಿದ್ದವು.
