ಹಾಕಿ: ಮಲೇಷ್ಯಾ ವಿರುದ್ಧ ಭಾರತಕ್ಕೆ 4-1 ಅಂತರದ ಜಯ

ಮೆಲ್ಬೋರ್ನ್: ಆಹ್ವಾನಿತ ಹಾಕಿ ಪಂದ್ಯಾವಳಿಯಲ್ಲಿ ಭಾರತ ಮಲೇಷ್ಯಾ ವಿರುದ್ಧ 4-1 ಅಂತರದ ಜಯ ಸಾಧಿಸಿದೆ. ನ.27 ರಂದು ಕಂಚಿನ ಪದಕ್ಕಾಗಿ ನಡೆದ ಪಂದ್ಯದಲ್ಲಿ ಭಾರತ ತಂಡ ಪ್ರಾರಂಭದಿಂದಲೂ ಪಂದ್ಯದ ಮೇಲೆ ಹಿಡಿತ ಸಾಧಿಸಿತ್ತು. 

ಭಾರತದ ಪರ ಆಕಾಶ್ ದೀಪ್ ಸಿಂಗ್( 2 ನೇ ನಿಮಿಷದಲ್ಲಿ ಗೋಲು) ವಿಆರ್ ರಘುನಾಥ್(45 ನೇ ನಿಮಿಷ) ತಲ್ವೀಂದರ್ ಸಿಂಗ್(52ನೇ ನಿಮಿಷ) ಹಾಗೂ ರೂಪೇಂದ್ರ ಪಾಲ್ ಸಿಂಗ್(58 ನೇ ನಿಮಿಷ) ದಲ್ಲಿ ಗೋಲು ದಾಖಲಿಸಿದ್ದರು. 

ನ.26 ರಂದು ನಡೆದಿದ್ದ ನ್ಯೂಜಿಲ್ಯಾಂಡ್ ವಿರುದ್ಧದ ಪಂಡ್ಯದಲ್ಲಿ ಭಾರತ ಸೋತಿತ್ತು. ಸೋಲಿನಿಂದ ಕಂಗೆಟ್ಟಿದ್ದ ಭಾರತ ಮಲೇಷ್ಯಾ ವಿರುದ್ಧ 4-1 ಅಂತರದಿಂದ ಗೆಲುವು ಸಾಧಿಸಿದೆ. ಪಂದ್ಯದ ಕೊನೆಯ ಹಂತದ ವರೆಗೂ ಪಂದ್ಯದ ಮೇಲೆ ಹಿಡಿತ ಸಾಧಿಸಿದ್ದ ಭಾರತಕ್ಕೆ 58ನೇ ನಿಮಿಷದಲ್ಲಿ ಪೆನಾಲ್ಟಿ ಕಾರ್ನರ್ ಸಿಕ್ಕಿತು. ಪೆನಾಲ್ಟಿ ಕಾರ್ನರ್ ನ ಸದುಪಯೋಗಪಡಿಸಿಕೊಂಡ ರೂಪೇಂದರ್ ಪಾಲ್ ಸಿಂಗ್ ಗೋಲು ದಾಖಲಿಸಿ ಭಾರತ 4-1 ಅಂತದಿಂದ ಗೆಲ್ಲಲು ಸಹಕಾರಿಯಾದರು.