ನಭಾ ಜೈಲಿನಿಂದ ಪರಾರಿಯಾದ ಕೇಸನ್ನು ಸಿಬಿಐಗೆ ವಹಿಸಿ: ಅಮರಿಂದರ್ ಸಿಂಗ್

ಚಂಡೀಗಢ: ನಭಾ ಜೈಲಿನಿಂದ ಹೊರಬಂದ ಕೇಸನ್ನು ಸಿಬಿಐಗೆ ವಹಿಸಬೇಕೆಂದು ಪಂಜಾಬ್ ಕಾಂಗ್ರೆಸ್ ಅಧ್ಯಕ್ಷ ಅಮರಿಂದರ್ ಸಿಂಗ್ ಒತ್ತಾಯಿಸಿದ್ದಾರೆ. ಖಲಿಸ್ತಾನ ಲಿಬರೇಷನ್ ಬಣದ ಮುಖ್ಯಸ್ಥ ಹರ್ಮಿಂದರ್ ಸಿಂಗ್ ಮಿಂಟೂ ಬಂಧನದ ಹಿಂದೆ ವ್ಯವಸ್ಥಿತ ಪಿತೂರಿ ಅಡಗಿದೆ ಎಂದು ಅವರು ಆರೋಪಿಸಿದ್ದಾರೆ.

ಈ ವಿಷಯದಲ್ಲಿ ಪಂಜಾಬ್ ಪೊಲೀಸ್ ಡಿಜಿಪಿ ಸುರೇಶ್ ಅರೋರ ಈಗಾಗಲೇ ಪಿತೂರಿ ನಡೆಸಲಾಗಿದೆ ಎಂದು ಮೌನ ಸಮ್ಮತಿ ನೀಡಿದ್ದು, ಇದನ್ನು ಪಂಜಾಬ್ ಪೊಲೀಸರು ತನಿಖೆ ನಡೆಸಬಾರದು, ಸ್ವತಂತ್ರ ತನಿಖೆ ನಡೆಸಲು ಸಿಬಿಐಗೆ ವಹಿಸಬೇಕೆಂದು ಒತ್ತಾಯಿಸಿದರು.

ಸೋಲು ಸನ್ನಿಹಿತವೆಂದು ಗೊತ್ತಾದಾಗ ಆಡಳಿತಾರೂಢ ಅಕಾಲಿದಳ ಕೋಮು ಧ್ರುವೀಕರಣ ನಡೆಸುತ್ತಿದೆ ಎಂದು ಕೂಡ ಅಮರಿಂದರ್ ಸಿಂಗ್ ಆರೋಪಿಸಿದ್ದಾರೆ.

ಪಟಿಯಾಲ ಜಿಲ್ಲೆಯಲ್ಲಿರುವ ನಭಾ ಜೈಲಿನಿಂದ ತಪ್ಪಿಸಿಕೊಂಡ 24 ಗಂಟೆಗಳೊಳಗೆ ಮಿಂಟೂ ಬಂಧನಕ್ಕೆ ಪ್ರತಿಕ್ರಿಯಿಸಿದ ಅವರು, ಮಿಂಟೂವನ್ನು ಬಂಧಿಸುವ ಮೂಲಕ ಪ್ರಕರಣವನ್ನು ಮುಚ್ಚಿಹಾಕಲು ಯತ್ನಿಸುತ್ತಿದ್ದಾರೆ. ಈ ವಿಷಯದಲ್ಲಿ ಸಮಗ್ರ ತನಿಖೆಯಾಗಬೇಕೆಂದರು. ಮಿಂಟೂವನ್ನು ಸ್ವತಂತ್ರ ತನಿಖಾ ಸಂಸ್ಥೆಯಿಂದ ಸೂಕ್ಷ್ಮ ವಿಚಾರಣೆ ನಡೆಸಿದರೆ ಪಿತೂರಿಯ ಮೂಲ ಗೊತ್ತಾಗುತ್ತದೆ ಎಂದು ಹೇಳಿದರು.