ಹೈದರಾಬಾದ್: ತ್ರಿವಳಿ ತಲಾಖ್ ನ ಮತ್ತೊಂದು ಕೇಸು ದಾಖಲು

ಹೈದರಾಬಾದ್: ತ್ರಿವಳಿ ತಲಾಖ್ ಮತ್ತು ಮುಸ್ಲಿಂ ಮಹಿಳೆಯರ ಹಕ್ಕುಗಳ ಕುರಿತು ಚರ್ಚೆಗಳು ಎದ್ದಿರುವ ನಡುವೆಯೇ ಹೈದರಾಬಾದಿನಲ್ಲಿ ಮತ್ತೊಂದು ಪ್ರಕರಣ ಬೆಳಕಿಗೆ ಬಂದಿದೆ.

ಇಲ್ಲಿನ ಸನತ್ ನಗರ್ ಪೊಲೀಸ್ ಠಾಣೆಯಲ್ಲಿ ಸುಮೈನಾ ಶರ್ಫಿ ಎಂಬುವವರು ದೂರು ನೀಡಿದ್ದು ಭಾರತೀಯ ದಂಡ ಸಂಹಿತೆ ಸೆಕ್ಷನ್ 420, 406, 506 ಆರ್/ ಡಬ್ಲ್ಯು ಅಡಿಯಲ್ಲಿ ಮಾರ್ಚ್ 16ರಂದು ಕೇಸು ದಾಖಲಾಗಿತ್ತು.

2015ರಲ್ಲಿ ಸುಮೈನಾ ಒವೈಸ್ ತಾಲಿಬ್ ಎಂಬುವವರನ್ನು ಮದುವೆಯಾಗಿದ್ದು ಕಳೆದ ವರ್ಷ ನವೆಂಬರ್ 28ರಂದು ತಲಾಖ್, ತಲಾಖ್, ತಲಾಖ್ ಎಂದು ಮೂರು ಸಲ ಸಂದೇಶ ಕಳುಹಿಸಿದ್ದರು. ನಮ್ಮ ಮದುವೆಯಾದ ನಂತರ ನನ್ನ ಪತಿಯ ರಕ್ಷಕರಾದ ಅಮ್ಮಾ ಜಾನ್ ಮಾಟ ಮಂತ್ರಗಳನ್ನು ಮಾಡುತ್ತಿದ್ದರು. ನಾನು ಮತ್ತು ಪತಿ ದುಬೈಯಲ್ಲಿ ತಿಂಗಳ ಕಾಲ ನೆಲೆಸಿದ್ದೆವು. ನಾವು ಹೈದರಾಬಾದಿಗೆ ಹಿಂತಿರುಗಿದ ನಂತರ ನನ್ನನ್ನು ಕೆಲಸದಾಳಿನಂತೆ ದುಡಿಸಿಕೊಂಡರು. ನನಗೆ ಸರಿಯಾಗಿ ಆಹಾರವನ್ನು ಕೂಡ ನೀಡುತ್ತಿರಲಿಲ್ಲ ಎಂದು ಸುಮೈನಾ ಹೇಳಿದ್ದಾರೆ.

ತಮ್ಮ ಎರಡನೇ ಪತಿ ಜೊತೆ ಸಂಬಂಧ ಬೆಳೆಸುವಂತೆ ಪತಿಯ ಅಮ್ಮಾ ಜಾನ್ ಒತ್ತಾಯಿಸಿದರು. ಅದಕ್ಕೆ ನನ್ನ ಪತಿ ಕೂಡ ನಿರಾಕರಿಸಲಿಲ್ಲ. ನಾನು ತಿರಸ್ಕರಿಸಿದಾಗ ನನಗೆ ಕಿರುಕುಳ ನೀಡಲಾರಂಭಿಸಿದರು. 6 ದಿನಗಳವರೆಗೆ ಕೋಣೆಯಲ್ಲಿ ಕೂಡಿ ಹಾಕಿದರು. ನನ್ನ ತಂದೆ ಬಂದು ನನ್ನನ್ನು ರಕ್ಷಿಸಿದರು ಎಂದು ಸುಮೈನಾ ಪೊಲೀಸರಿಗೆ ತಿಳಿಸಿದ್ದಾರೆ.

ತಾಯಿಯ ಮನೆಗೆ ಬಂದ ನಂತರ ನನ್ನ ಪತಿಗೆ ಕರೆ ಮಾಡಿ ಮಾತನಾಡಲೆತ್ನಿಸಿದರೂ ನನ್ನ ಕರೆಯನ್ನು ಸ್ವೀಕರಿಸುತ್ತಿಲ್ಲ.ಸ್ವಲ್ಪ ದಿನಗಳ ನಂತರ ನನ್ನ ವಾಟ್ಸಾಪ್ ಗೆ ತಲಾಖ್ ಎಂದು ಮೂರು ಬಾರಿ ಸಂದೇಶ ಕಳುಹಿಸಿದರು ಎಂದು ವಿವರಿಸಿದ್ದಾರೆ.ಪ್ರಕರಣದ ತನಿಖೆ ನಡೆಯುತ್ತಿದೆ.