ಸಿರ್ಸಾ: ಡೇರಾ ಸಚ್ಚಾ ಸೌದ ಖಾಲಿ ಖಾಲಿ, 18 ಬಾಲಕಿಯರ ರಕ್ಷಣೆ

ಸಿರ್ಸಾ: ಅತ್ಯಾಚಾರ ಪ್ರಕರಣದಲ್ಲಿ 20 ವರ್ಷ ಜೈಲು ಶಿಕ್ಷೆಗೆ ಗುರಿಯಾಗಿರುವ ಡೇರಾ ಸಚ್ಚಾ ಸೌದದ ಮುಖ್ಯಸ್ಥ ಹಾಗೂ ಸ್ವಯಂ ಘೋಷಿತ ದೇವಮಾನವ ಗುರ್ಮೀತ್‌ ರಾಮ್ ರಹೀಮ್ ಸಿಂಗ್‌ ಅವರ ಸಿರ್ಸಾ ಆಶ್ರಮದಲ್ಲಿದ್ದ ಎಲ್ಲಾ ಬೆಂಬಲಿಗರನ್ನು ಭಾರಿ ಭದ್ರತೆಯೊಂದಿಗೆ ತೆರವುಗೊಳಿಸಲಾಗುತ್ತಿದ್ದು, ಆಶ್ರಮದಲ್ಲಿದ್ದ 18 ಅಪ್ರಾಪ್ತ ಬಾಲಕಿಯರನ್ನು ಮಂಗಳವಾರ ರಕ್ಷಿಸಲಾಗಿದೆ.

ಆಶ್ರಮದಲ್ಲಿದ್ದ ಎಲ್ಲಾ ಬಾಬಾ ಬೆಂಬಲಿಗರನ್ನು ಹೊರಹಾಕಲಾಗಿದ್ದು, ಈ ವೇಳೆ ಬಾಲಕಿಯರು ಪತ್ತೆಯಾಗಿದ್ದು ಅವರನ್ನು ಜಿಲ್ಲಾಡಳಿತ ಮತ್ತು  ಪೊಲೀಸರು ರಕ್ಷಿಸಿ ಆಸ್ಪತ್ರೆಗೆ ಕರೆದೊಯ್ದು ವೈದ್ಯಕೀಯ ಪರೀಕ್ಷೆ ನಡೆಸಿದ್ದಾರೆ. ರಕ್ಷಣೆಗೊಳಗಾದ ಎಲ್ಲಾ ಬಾಲಕಿಯರು 18 ವರ್ಷದ ಒಳಗಿನವರು ಎನ್ನಲಾಗಿದೆ. 

ಬಾಲಕಿಯರು ಯಾಕಾಗಿ ಆಶ್ರಮದಲ್ಲಿದ್ದರು ಎನ್ನುವುದು ಇನ್ನಷ್ಟೇ ತಿಳಿದು ಬರಬೇಕಾಗಿದೆ. ಅಶ್ರಮದ ಸುತ್ತ ಸೇನೆ ಸುತ್ತುವರಿದಿದ್ದು ಭಾರೀ ಭದ್ರತೆ ಕೈಗೊಳ್ಳಲಾಗಿದ್ದು, ಕಳೆದ ಎರಡು ದಿನಗಳಿಂದ ಯಾವುದೇ ಹಿಂಸಾಚಾರ ಘಟನೆಗಳು ವರದಿಯಾಗಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಪೊಲೀಸರು ಮತ್ತು ಸೇನಾ ಪಡೆಗಳು ಯಾರೊಬ್ಬರನ್ನೂ ಆಶ್ರಮದತ್ತ ಬರಲು ಅವಕಾಶ ನೀಡುತ್ತಿಲ್ಲ.