ತೆರೆ ಮೇಲೆ ಬರಲಿದೆ ವಾಜಪೇಯಿ ಜೀವನಾಧಾರಿತ ಚಿತ್ರ 'ಯುಗಪುರುಷ'

ನವದೆಹಲಿ: ಮಾಜಿ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿ ಅವರ 93ನೇ ಹುಟ್ಟುಹಬ್ಬದಂದೆ ಅಜಾತ ಶತ್ರುವಿನ ಜೀವನ ಆಧಾರಿತ 'ಯುಗಪುರುಷ' ಚಿತ್ರ ಘೋಷಣೆಯಾಗಿದೆ.

ಸ್ಪೆಕ್ಟ್ರಂ ಮೂವೀಸ್ ಬ್ಯಾನರ್ ನಡಿ ರಾಜೀವ್ ಧಮಿಜಾ, ಅಮಿತ್ ಜೋಶಿ ಮತ್ತು ರಂಜೀತ್ ಶರ್ಮಾ ಅವರು ಯುಗಪುರುಷ ಚಿತ್ರ ನಿರ್ಮಿಸುತ್ತಿದ್ದು, ಬಸಂತ್ ಕುಮಾರ್ ಅವರು ಬರೆದ ಕಥೆಗೆ ಮಾಯಾಂಕ್ ಪಿ ಶ್ರೀವಾತ್ಸವ್ ಅವರು ನಿರ್ದೇಶನ ಮಾಡುತ್ತಿದ್ದಾರೆ.

ವಾಜಪೇಯಿ ಅವರ ಕುಟುಂಬದ ಸಮ್ಮತಿ ಪಡೆದು ನಾವು ಯುಗಪುರುಷ ಚಿತ್ರ ಮಾಡುತ್ತಿದ್ದೇವೆ. ಈ ಸಂಬಂಧ ನಾವು ನಿರಂತರವಾಗಿ ಅವರ ಕುಟುಂಬ ಸದಸ್ಯರ ಸಂಪರ್ಕದಲ್ಲಿದ್ದೇವೆ. ವಾಜಪೇಯಿ ಜೀವನ ಆಧಾರಿತ ಚಿತ್ರ ನಿರ್ಮಿಸುವುದಕ್ಕೆ ಅವರ ಸೋದರ ಸೊಸೆ ಮಾಲಾ ತಿವಾರಿ ಅವರು ನಮಗೆ ಸಹಾಯ ಮಾಡುತ್ತಿದ್ದಾರೆ ಎಂದು ನಿರ್ದೇಶಕ ಮಾಯಾಂಕ್ ಅವರು ತಿಳಿಸಿದ್ದಾರೆ.

ಯುಗಪುರುಷ ಅಟಲ್ ಗಾಗಿ ಬಪ್ಪಿ ಲಹಿರಿ ಅವರು ಹಾಡೊಂದನ್ನು ಸಂಕಲನ ಮಾಡಿದ್ದು, ಭಾರತ ರತ್ನ ಅಟಲ್ ಗಾಗಿ ಅವರ ಕವನ ಆಧರಿಸಿ ನಾನು ಒಂದು ಹಾಡು ಬರೆದಿದ್ದೇನೆ ಎಂದು ಲಹಿರಿ ಹೇಳಿದ್ದಾರೆ.