ನೋಟು ನಿಷೇಧದ ನಂತರ 18 ಲಕ್ಷ ಜನರಿಂದ 4.17 ಲಕ್ಷ ಕೋಟಿ ಅನುಮಾನಾಸ್ಪದ ಠೇವಣಿ!

ನವದೆಹಲಿ: 500, 1000 ರೂ ಗರಿಷ್ಠ ನೋಟುಗಳನ್ನು ನಿಷೇಧಿಸಿದ ಬಳಿಕ 18 ಲಕ್ಷ ಜನರು ಬ್ಯಾಂಕ್ ಗಳಲ್ಲಿ ಒಟ್ಟು  4.17 ಲಕ್ಷ ಕೋಟಿ ಅನುಮಾನಾಸ್ಪದ ಠೇವಣಿಯನ್ನಿಟ್ಟಿದ್ದಾರೆ ಎಂದು ನೇರ ತೆರಿಗೆ ಕೇಂದ್ರೀಯ ಮಂಡಳಿ (ಸಿಬಿಡಿಟಿ) ಅಧ್ಯಕ್ಷ ಸುನಿಲ್ ಚಂದ್ರ ಹೇಳಿದ್ದಾರೆ. 

18 ಲಕ್ಷ ಜನರ ಪೈಕಿ ಈ 13 ಲಕ್ಷ ಜನರಿಗೆ ಇ-ಮೇಲ್ ಮೂಲಕ ಪ್ರಶ್ನಿಸಲಾಗಿದೆ ಎಂದು ಬಜೆಟ್ ನಂತರ ನಡೆದ ವಿಚಾರ ಸಂಕಿರಣದಲ್ಲಿ ಸುನಿಲ್ ಚಂದ್ರ ಹೇಳಿದ್ದಾರೆ. 4.17 ಲಕ್ಷ ಕೋಟಿಯಷ್ಟು ಹಣ ಠೇವಣಿಗೆ ಸಂಬಂಧಿಸಿದಂತೆ 18 ಲಕ್ಷ ಜನರ ಬಗೆಗಿನ ಮಾಹಿತಿ ಲಭ್ಯವಿದ್ದು, ಈ ಪೈಕಿ 13 ಲಕ್ಷ ಜನರಿಗೆ ಅನುಮಾನಾಸ್ಪದ ಠೇವಣಿ ಬಗ್ಗೆ ಇ-ಮೇಲ್ ಎಸ್ಎಂಎಸ್ ಗಳನ್ನು ಕಳಿಸಲಾಗಿದೆ. 

ನೋಟು ನಿಷೇಧದ ನಂತರ ತೆರಿಗೆ ವಂಚನೆ ನಡೆದಿರುವುದರ ಬಗ್ಗೆ ಹಾಗೂ ಅನುಮಾನಾಸ್ಪದ ಠೇವಣಿ ಇಟ್ಟಿರುವುದರ ಬಗ್ಗೆ ಮಾಹಿತಿ ಪಡೆಯಲು ಆಪರೇಷನ್ ಕ್ಲೀನ್ ಮನಿ ಅಥವಾ ಸ್ವಚ್ಚ್ ಧನ್ ಅಭಿಯಾನ್ ಹೆಸರಿನಲ್ಲಿ ಸಿಬಿಡಿಟಿ ಕಾರ್ಯಾಚರಣೆ ನಡೆಸುತ್ತಿದ್ದು, ಉಳಿದ 5 ಲಕ್ಷ ಜನರಿಗೆ ಇ-ಮೇಲ್, ಎಸ್ಎಂಎಸ್ ನ್ನು ಫೆ.3 ರಂದು ಕಳಿಸಲಾಗುತ್ತದೆ ಎಂದು ಸಿಬಿಡಿಟಿ ಅಧ್ಯಕ್ಷರು ಮಾಹಿತಿ ನೀಡಿದ್ದಾರೆ.