ನವದೆಹಲಿ: ಉತ್ತರಪ್ರದೇಶದ ಫತೇಪುರ್ ರ್ಯಾಲಿ ವೇಳೆ ವಿವಾದಾತ್ಮಕ ಹೇಳಿಕೆ ನೀಡಿದ್ದ ಪ್ರಧಾನಮಂತ್ರಿ ನರೇಂದ್ರ ಮೋದಿಯವರ ವಿರುದ್ಧ ಚುನಾವಣಾ ಆಯೋಗಕ್ಕೆ ದೂರು ನೀಡಲು ಕಾಂಗ್ರೆಸ್ ಸೋಮವಾರ ನಿರ್ಧರಿಸಿದೆ.
ಈ ಕುರಿತಂತೆ ಮಾತನಾಡಿರುವ ಕಾಂಗ್ರೆಸ್ ಪಕ್ಷದ ಕಾನೂನು ಮತ್ತು ಮಾನವ ಹಕ್ಕುಗಳ ಇಲಾಖೆಯ ಕಾರ್ಯದರ್ಶಿ ಕೆ.ಸಿ.ಮಿತ್ತಲ್ ಅವರು, ಉತ್ತರಪ್ರದೇಶದ ಫತೇಪುರ್ ನಲ್ಲಿ ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ನೀಡಿದ್ದ ಹೇಳಿಕೆ ಸಂಬಂಧ ಚುನಾವಣಾ ಆಯೋಗಕ್ಕೆ ದೂರು ನೀಡಲು ನಿರ್ಧರಿಸಲಾಗಿದೆ ಎಂದು ಹೇಳಿದ್ದಾರೆ.
ಉತ್ತರಪ್ರದೇಶ ವಿಧಾನಸಭಾ ಚುನಾವಣೆ ಹಿನ್ನಲೆಯಲ್ಲಿ ನಿನ್ನೆಯಷ್ಟೇ ಫತೇಪುರದಲ್ಲಿ ನಡೆದ ರ್ಯಾಲಿಯಲ್ಲಿ ಭಾಷಣ ಮಾಡಿದ್ದ ಪ್ರಧಾನಿ ಮೋದಿಯವರು, ರಮ್ಜಾನ್ ಹಬ್ಬದಂದು ವಿದ್ಯುತ್ ಇರುತ್ತಾದರೆ, ದೀಪಾವಳಿ ದಿನವೂ ಅದು ಇರಬೇಕು. ಭೇದಭಾವ ಇರಕೂಡದು, ಗ್ರಾಮಗಳಲ್ಲಿ ಕಬರಿಸ್ತಾನ (ಮುಸ್ಲಿಮರ ದಫನ ಸ್ಮಶಾನ) ಇರುವುದಾದರೆ, ಸ್ಮಶಾನ (ಹಿಂದೂಗಳ ಅಂತ್ಯಸಂಸ್ಕಾರ ಸ್ಥಳ)ವೂ ಇರಬೇಕು. ಸರ್ಕಾರಗಳು ಧರ್ಮ ಮತ್ತು ಜಾತಿ ಆಧಾರದಲ್ಲಿ ತಾರತಮ್ಯ ಮಾಡಕೂಡದು. ಸಬ್ ಕಾ ಸಾಥ್, ಸಬ್ ಕಾ ವಿಕಾಸ್ ನಮ್ಮ ಮಂತ್ರ ಎಂದು ಹೇಳಿದ್ದರು.
