ಪಠಾಣ್'ಕೋಟ್: ಪಂಜಾಬ್ ನ ಮಮೂನ್ ಸೇನಾ ನೆಲೆ ಬಳಿ ಶಂಕಿತ ಚೀಲವೊಂದು ಪತ್ತೆಯಾಗಿದ್ದು, ಈ ಹಿನ್ನಲೆಯಲ್ಲಿ ಪಠಾಣ್ ಕೋಟ್ ಹಾಗೂ ಸುತ್ತಮುತ್ತಲಿನ ಪ್ರದೇಶದಲ್ಲಿ ಸೋಮವಾರ ಹೈ ಅಲರ್ಟ್ ಘೋಷಿಸಲಾಗಿದೆ.
ಶಂಕಿತ ಚೀಲ ಪತ್ತೆಯಾಗುತ್ತಿದ್ದಂತೆಯೇ ಎಚ್ಚೆತ್ತ ಸೇನಾ ಪಡೆ ಕೂಡಲೇ ಕಾರ್ಯಾಚರಣೆಯನ್ನು ಆರಂಭಿಸಿದೆ. ಸ್ಥಳಕ್ಕೆ ದೌಡಾಯಿಸಿದ ಸ್ವಾಟ್ ಕಮಾಂಡೋಗಳು ಶೋಧ ಕಾರ್ಯಾಚರಣೆಯನ್ನು ಕೈಗೊಂಡವು. ಶಂಕಿತ ಚೀಲವನ್ನು ಪರಿಶೀಲಿಸಿದಾಗ ಚೀಲದಲ್ಲಿ ಸುಟ್ಟಿ ಹಾಕಿರುವ ಸೇನಾ ಸಮವಸ್ತ್ರಗಳು ದೊರಕಿದೆ ಎಂದು ಮೂಲಗಳು ತಿಳಿಸಿವೆ.
ಚೀಲದಲ್ಲಿ ಯಾವುದೇ ಬಾಂಬ್ ಆಗಲೀ ಅಥವಾ ಸ್ಫೋಟಕ ವಸ್ತುಗಳಾವುದೂ ದೊರಕಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಕಳೆದ ಮೇ.4 ರಂದು ಮಮೂನ್ ಆರ್ಮಿ ಕಂಟೋನ್ಮೆಂಟ್ ಬೇಸ್ ಸಮೀಪ ಎರಡು ಅಪರಿಚಿತ ಚೀಲಗಳು ಪತ್ತೆಯಾದದ್ದನ್ನು ಅನುಸರಿಸಿ ಪಠಾಣ್ ಕೋಟ್ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಕಟ್ಟೆಚ್ಚರ ಘೋಷಿಸಲಾಗಿತ್ತು. ಶಂಕಿತ ಚೀಲಗಳಲ್ಲಿ ಎರಡು ಮೊಬೈಲ್ ಟವರ್ ಬ್ಯಾಟರಿಗಳು ಪತ್ತೆಯಾಗಿದ್ದವು ಎಂದು ಅಧಿಕಾರಿಗಳು ಹೇಳಿಕೊಂಡಿದ್ದರು.
