ಆಧಾರ್ ವರ್ಚ್ಯುಯಲ್ ಐಡಿ; 'ಊರು ಕೊಳ್ಳೆ ಹೊಡೆದ ಮೇಲೆ ಕೋಟೆ ಬಾಗಿಲು ಹಾಕಿದಂತೆ': ಚಿದಂಬರಂ

ನವದೆಹಲಿ: ಖಾಸಗಿತನದ ರಕ್ಷಣೆಗಾಗಿ ಭಾರತೀಯ ವಿಶಿಷ್ಟ ಗುರುತು ಚೀಟಿ ಪ್ರಾಧಿಕಾರ(ಯುಐಡಿಎಐ) ನಿನ್ನೆಯಷ್ಟೇ 'ವರ್ಚ್ಯುಯಲ್ ಐಡಿ' ಎಂಬ ಹೊಸ ಪರಿಕಲ್ಪನೆಯನ್ನು ಪರಿಚಿಯಿಸಿದ್ದು, ಇದು 'ಊರು ಕೊಳ್ಳೆ ಹೊಡೆದ ಮೇಲೆ ಕೋಟೆ ಬಾಗಿಲು ಹಾಕಿದಂತೆ' ಎಂದು ಹಿರಿಯ ಕಾಂಗ್ರೆಸ್ ನಾಯಕ ಹಾಗೂ ಕೇಂದ್ರ ಮಾಜಿ ಸಚಿವ ಪಿ ಚದಂಬರಂ ಅವರು ವ್ಯಂಗ್ಯವಾಡಿದ್ದಾರೆ.

ಈಗ ಆಧಾರ್ ವರ್ಚ್ಯುಯಲ್ ಐಡಿ ಪರಿಚಯಿಸಿರುವುದರಲ್ಲಿ ಯಾವುದೇ ಅರ್ಥ ಇಲ್ಲ. ಈಗಾಗಲೇ ಕೋಟ್ಯಾಂತರ ಭಾರತೀಯರು ತಮ್ಮ ಆಧಾರ್ ಸಂಖ್ಯೆಯನ್ನು ವಿವಿಧ ಸೇವೆ ಒದಗಿಸುವವರಿಗೆ ನೀಡಿದ್ದಾರೆ ಎಂದು ಚಿದಂಬರಂ ಟ್ವೀಟ್ ಮಾಡಿದ್ದಾರೆ.

ಕೇಂದ್ರ ಸರ್ಕಾರ ವಿವಿಧ ಸೇವೆಗಳಿಗೆ ಆಧಾರ್ ಕಡ್ಡಾಯಗೊಳಿಸಿದ ಹಿನ್ನೆಲೆಯಲ್ಲಿ ಕೋಟ್ಯಾಂತರ ನಾಗರಿಕರು ತಮ್ಮ ಆಧಾರ್ ಸಂಖ್ಯೆಯನ್ನು ಹಲವು ಸೇವಾ ಪುರೈಕೆದಾರರಿಗೆ ನೀಡಿದ್ದಾರೆ. ಈಗ ಖಾಸಗಿತನ ರಕ್ಷಣೆಗಾಗಿ 'ವರ್ಚ್ಯುಯಲ್ ಐಡಿ' ನೀಡುವುದು 'ಊರು ಕೊಳ್ಳೆ ಹೊಡೆದ ಮೇಲೆ ಕೋಟೆ ಬಾಗಿಲು ಹಾಕಿದಂತೆ' ಎಂದಿದ್ದಾರೆ.

ಯುಐಡಿಎಐ ಪರಿಚಯಿಸಿರುವ 'ವರ್ಚ್ಯುಯಲ್ ಐಡಿ' ಮೂಲಕ ಆಧಾರ್ ಕಾರ್ಡ್ ಹೊಂದಿರುವ ವ್ಯಕ್ತಿ ಇನ್ನು ಮುಂದೆ ತಾನು ನೀಡಿದ ದತ್ತಾಂಶ ರಕ್ಷಣೆಗಾಗಿ ಯುಐಡಿಎಐ ವೆಬ್ ಸೈಟ್ ನಿಂದ 'ವರ್ಚ್ಯುಯಲ್ ಐಡಿ'  ಪಡೆದುಕೊಂಡು ಅದನ್ನು ಸಿಮ್ ಪರಿಶೀಲನೆ ಸೇರಿದಂತೆ ವಿವಿಧ ಉದ್ದೇಶಗಳಿಗೆ ಆಧಾರ್ ಕಾರ್ಡ್ ಬದಲು ಬಳಸಬಹುದು ಎಂದು ಹೇಳಿದೆ.