ಒಬ್ಬ ಯೋಧ ಹುತಾತ್ಮನಾದರೆ, 10 ಪಾಕ್ ಸೈನಿಕರು, ಉಗ್ರರು ಸಾಯಬೇಕು: ಸಿಎಂ ಅಮರೀಂದರ್ ಸಿಂಗ್

ನವದೆಹಲಿ: ಜಮ್ಮು ಮತ್ತು ಕಾಶ್ಮೀರದ ಗಡಿ ನಿಯಂತ್ರಣ ರೇಖೆ ಪದೇ ಪದೇ ಕದನ ವಿರಾಮ ಉಲ್ಲಂಘನೆ ಮಾಡಿ, ಉದ್ಧಟತನವನ್ನು ಪ್ರದರ್ಶಿಸುತ್ತಿರುವ ಪಾಕಿಸ್ತಾನದ ವಿರುದ್ಧ ತೀವ್ರವಾಗಿ ಕಿಡಿಕಾರಿರುವ ಪಂಜಾಬ್ ರಾಜ್ಯ ಮುಖ್ಯಮಂತ್ರಿ ಅಮರೀಂದರ್ ಸಿಂಗ್ ಅವರು, ಒಬ್ಬ ಯೋಧ ಹುತಾತ್ಮನಾದರೆ, 10 ಪಾಕಿಸ್ತಾನ ಸೈನಿಕರು ಹಾಗೂ ಉಗ್ರರು ಸಾವನ್ನಪ್ಪಬೇಕೆಂದು ಗುರುವಾರ ಹೇಳಿದ್ದಾರೆ. 

ಇಂದು ಬೆಳಿಗ್ಗೆ ಜಮ್ಮು ಮತ್ತು ಕಾಶ್ಮೀರದ ಆರ್'ಎಸ್ ಪುರ ಸೆಕ್ಟರ್ ಬಳಿಯಿರುವ ಅಂತರಾಷ್ಟ್ರೀಯ ಗಡಿ ನಿಯಂತ್ರಣ ರೇಖೆ ಬಳಿ ಪಾಕಿಸ್ತಾನ ಕದನ ವಿರಾಮ ಉಲ್ಲಂಘನೆ ಮಾಡಿತ್ತು. ಈ ವೇಳೆ ಪಾಕಿಸ್ತಾನ ನಡೆಸಿದ್ದ ಅಪ್ರಚೋದಿತ ಗುಂಡು ಹಾಗೂ ಶೆಲ್ ದಾಳಿಗೆ ಓರ್ವ ಭಾರತೀಯ ಯೋಧ ಹುತಾತ್ಮರಾಗಿದ್ದರು. 

ಈ ಹಿನ್ನಲೆಯಲ್ಲಿ ಪಾಕಿಸ್ತಾನದ ವಿರುದ್ಧ ತೀವ್ರವಾಗಿ ಕಿಡಿಕಾರಿರುವ ಅಮರೀಂದರ್ ಸಿಂಗ್ ಅವರು, ನಮ್ಮಲ್ಲಿರುವ ಒಬ್ಬ ಯೋಧ ಹುತಾತ್ಮನಾದರೆ, ಪಾಕಿಸ್ತಾನದಲ್ಲಿ 10 ಯೋಧರು, ಉಗ್ರರು ಸಾವನ್ನಪ್ಪಲೇಬೇಕು. ನಾನು ಜೀವನವನ್ನು ಈ ರೀತಿ ನೋಡುತ್ತೇನೆಂದು ಹೇಳಿದ್ದಾರೆ. 

ಅಮರೀಂದರ್ ಸಿಂಗ್ ಅವರು ಭಾರತೀಯ ಸೇನೆಯಲ್ಲಿ ದೀರ್ಘಕಾಲಿಕ ಸೇವೆಯನ್ನು ಸಲ್ಲಿಸಿದ್ದುಕ 1965ರ ಇಂಡೋ-ಪಾಕಿಸ್ತಾನದ ಕದನ ಸಂದರ್ಭದಲ್ಲಿ ಕ್ಯಾಪ್ಟೆನ್ ಆಗಿ ಸೇವೆ ಸಲ್ಲಿಸಿದ್ದಾರೆ.