ಆಧಾರ್ ಇಲ್ಲದ ಗರ್ಭಿಣಿಗೆ ಚಿಕಿತ್ಸೆ ನಿರಾಕರಣೆ: ಆಸ್ಪತ್ರೆ ಎದುರು ಜನ್ಮ ನೀಡಿದ ಮಹಿಳೆ

ಜವೂನ್ಪುರ್(ಉತ್ತರಪ್ರದೇಶ): ಆಧಾರ್ ಕಾರ್ಡ್ ಮತ್ತು ಬ್ಯಾಂಕ್ ಅಕೌಂಟ್ ಇಲ್ಲವೆಂದು ವೈದ್ಯರು ಗರ್ಭಿಣಿ ಮಹಿಳೆಗೆ ಚಿಕಿತ್ಸೆ ನೀಡಲು ಹಿಂದೇಟು ಹಾಕಿದ್ದರಿಂದ ಮಹಿಳೆ ಆಸ್ಪತ್ರೆಯ ಮುಂಭಾಗದ ಗೇಟ್ ಮುಂದೆ ಮಗುವಿಗೆ ಜನ್ಮ ನೀಡಿದ್ದಾರೆ. 

ಜನವರಿ 29ರಂದು ಈ ಘಟನೆ ನಡೆದಿದೆ. ನಿನ್ನೆ ಹೆರಿಗೆ ನೋವಿನಿಂದ ಆಸ್ಪತ್ರೆಗೆ ಬಂದ ಮಹಿಳೆಯನ್ನು ಅಡ್ಮಿಟ್ ಮಾಡಿಕೊಳ್ಳಲು ಆಸ್ಪತ್ರೆಯ ವೈದ್ಯರು ನಿರಾಕರಿಸಿದ್ದಾರೆ. ಇದರಿಂದ ಮಹಿಳೆ ಆಸ್ಪತ್ರೆಯಿಂದ ಹೊರಗಡೆ ಬರುತ್ತಿದ್ದಂತೆ ಹೆರಿಗೆ ನೋವು ಜಾಸ್ತಿಯಾಗಿ ಆಸ್ಪತ್ರೆಯ ಮುಂಭಾಗದಲ್ಲೇ ಮಗುವಿನ ಜನ್ಮ ನೀಡಿದಳು ಎಂದು ಆಕೆಯ ಪತಿ ಆರೋಪಿಸಿದ್ದು, ಈ ಆರೋಪವನ್ನು ವೈದ್ಯಕೀಯ ಅಧೀಕ್ಷಕರು ತಳ್ಳಿಹಾಕಿದ್ದಾರೆ. 

ಮಹಿಳೆಗೆ ಆಸ್ಪತ್ರೆಯ ವೈದ್ಯರು ಜಿಲ್ಲಾಸ್ಪತ್ರೆಗೆ ಹೋಗುವಂತೆ ಸೂಚಿಸಿದರು. ಈ ವೇಳೆ ಮಹಿಳೆ ತನಗೆ ಪರಿಚಯ ಇರುವವರನ್ನು ಕರೆದುಕೊಂಡು ಬರುವುದಾಗಿ ಹೇಳಿ ಹೊರಗಡೆ ಹೋಗುತ್ತಿದ್ದ ವೇಳೆ ಮಹಿಳೆಗೆ ನೋವು ಕಾಣಿಸಿಕೊಂಡು ಆಕೆ ಅಲ್ಲಿಯೆ ಜನ್ಮ ನೀಡಿದ್ದಾಳೆ. ಇದೀಗ ತಾಯಿ ಮತ್ತು ಮಗು ಇಬ್ಬರು ಆರೋಗ್ಯವಾಗಿದ್ದಾರೆ ಎಂದು ಅಧೀಕ್ಷಕರು ಹೇಳಿದ್ದಾರೆ.