ಮುಂಬೈ: ನೀರಿನ ಪೈಪ್ ಸ್ಫೋಟ, ಆಗಸಕ್ಕೆ ಚಿಮ್ಮಿದ ಬೊಲೆರೋ ಕಾರು; ವಿಡಿಯೋ ವೈರಲ್

ಮುಂಬೈ: ನೀರಿನ ಪೈಪ್ ಸ್ಱೋಟಗೊಂಡ ಪರಿಣಾಮ ಪೈಪ್ ಮೇಲಿದ್ದ ಕಾರು ಗಾಳಿಯಲ್ಲಿ ತೇಲಿದ ಘಟನೆ ಮುಂಬೈನಲ್ಲಿ ನಡೆದಿದೆ.

ವಾಯುವ್ಯ ಮುಂಬೈನ ಬೊರಿವಲಿ ಪ್ರದೇಶದಲ್ಲಿ ಈ ಘಟನೆ ನಡೆದಿದ್ದು, ಅದೃಷ್ಟವಶಾತ್ ಘಟನೆಯಲ್ಲಿ ಯಾರಿಗೂ ಗಾಯಗಳಾಗಿಲ್ಲ. ಸ್ಥಳೀಯರು ತಿಳಿಸಿರುವಂತೆ ನೀರಿನ ಪೈಪ್ ಒಡೆದಿತ್ತು. ಇದು ಸಾಮಾನ್ಯ ಸಂಗತಿ ಎಂದು ಎಲ್ಲರೂ ತಿಳಿದಿದ್ದೆವು. ಆದರೆ ನೋಡ ನೋಡುತ್ತಿದ್ದಂತೆಯೇ ನೀರಿನ ರಭಸಕ್ಕೆ ಪೈಪ್ ಸ್ಫೋಟಗೊಂಡು ಪೈಪ್ ಮೇಲಿದ್ದ ಮಹಿಂದ್ರಾ ಬೊಲೆರೋ ವಾಹನ ಗಾಳಿಯಲ್ಲಿ ಚಿಮ್ಮಿತು. ಸುಮಾರು 10 ಅಡಿಗಳ ಮೇಲಕ್ಕೆ ಹಾರಿದ ವಾಹನ ಬಳಿಕ ನೆಲಕ್ಕೆ ಬಿತ್ತು. ಅದೃಷ್ಟವಶಾತ್ ಆ ಪ್ರದೇಶದಲ್ಲಿ ಜನ ನಿಂತಿರಲಿಲ್ಲ. 

ಇನ್ನು ನೀರಿನ ರಭಸ ಎಷ್ಟಿತ್ತು ಎಂದರೆ ಪೈಪ್ ನಿಂದ ಮೇಲಕ್ಕೆ ಚಿಮ್ಮಿದ ನೀರು ಕಟ್ಟಡದ ಎರಡನೇ ಮಹಡಿಯವರೆಗೂ ಚಿಮ್ಮುತ್ತಿತ್ತು. ಈ ಘಟನೆ ಸ್ಥಳೀಯ ನಿವಾಸಿಗಳಲ್ಲಿ ಕೆಲಕಾಲ ಅಂತಕಕ್ಕೆ ಕಾರಣವಾಗಿತ್ತು. ಆದರೆ ಅಲ್ಲಿನ ಜನ ಮಾತ್ರ ಇದನ್ನು ತಮ್ಮ ಮೊಬೈಲ್ ಗಳಲ್ಲಿ ಸೆರೆ ಹಿಡಿಯುವಲ್ಲಿ ನಿರತರಾಗಿದ್ದರು.

ಸಾಮಾಜಿಕ ಜಾಲತಾಣಗಳಲ್ಲಿ ಈ ವಿಡಿಯೋ ಇದೀಗ ವೈರಲ್ ಆಗಿದೆ.