ಅಪರಾಧಗಳ ಪುನರಾವರ್ತನೆ: ಏರ್ ಇಂಡಿಯಾ ಕಾರ್ಯಾಚರಣೆ ವಿಭಾಗದ ನಿರ್ದೇಶಕ ವಜಾ!

ನವದೆಹಲಿ: ಅಪರಾಧಗಳ ಪುನರಾವರ್ತನೆಗಾಗಿ ಏರ್ ಇಂಡಿಯಾ ಸಂಸ್ಥೆ ತನ್ನ ಕಾರ್ಯಾಚಾರಣೆ ವಿಭಾಗದ ನಿರ್ದೇಶಕ ಅರವಿಂದ್ ಕತ್ಪಾಲಿಯಾ ಅವರನ್ನು ವಜಾಗೊಳಿಸಿದೆ. 

ಭಾರತೀಯ ವಾಣಿಜ್ಯ ಪೈಲಟ್ಸ್ ಅಸೋಸಿಯೇಷನ್ (ಐಸಿಪಿಎ) ಅರವಿಂದ್ ಕತ್ಪಾಲಿಯಾ ಅವರ ವಜಾಕ್ಕಾಗಿ ಆಗ್ರಹಿಸಿದ್ದ ಹಿನ್ನೆಲೆಯಲ್ಲಿ ಏರ್ ಇಂಡಿಯಾ ಸಂಸ್ಥೆ ಈ ಕ್ರಮ ಕೈಗೊಂಡಿದೆ.  ಪದೇ ಪದೇ ಏರ್ ಇಂಡಿಯಾ ಸಂಸ್ಥೆ ಬಗ್ಗೆ ಕೆಟ್ಟ ಭಾವನೆ ಬರುವಂತೆ ಕತ್ಪಾಲಿಯಾ ನಡೆದುಕೊಂಡಿದ್ದಾರೆ. ಆದ್ದರಿಂದ ತಕ್ಷಣವೇ ಅವರನ್ನು ವಜಾಗೊಳಿಸಬೇಕೆಂದು ಐಸಿಪಿಎ ಒತ್ತಡ ಹೇರಿತ್ತು.  ಈ ಹಿನ್ನೆಲೆಯಲ್ಲಿ ನಿರ್ದೇಶಕ ಹುದ್ದೆಯಿಂದ ಅರವಿಂದ್ ಕತ್ಪಾಲಿಯಾ ಅವರನ್ನು ವಜಾಗೊಳಿಸಲಾಗಿದೆ. 

ನ.11 ರಂದು ನವದೆಹಲಿ-ಲಂಡನ್ ವಿಮಾನದ ಕಾರ್ಯಾಚರಣೆಗೆ ಮುಖ್ಯಪೈಲಟ್ ಆಗಿ ಅರವಿಂದ್ ಕತ್ಪಾಲಿಯಾ ಕಾರ್ಯನಿರ್ವಹಿಸಬೇಕಿತ್ತು. ಆದರೆ ಬ್ರೀತ್ ಅನಲೈಜರ್ ಪರೀಕ್ಷೆಯಲ್ಲಿ ವಿಫಲಗೊಂಡ ಕಾರಣ ಅರವಿಂದ್ ಕತ್ಪಾಲಿಯಾ ಅವರ ಪರವಾನಗಿಯನ್ನು 3 ವರ್ಷಗಳ ಕಾಲ ಅಮಾನತುಗೊಳಿಸಲಾಗಿತ್ತು. ಈಗ ದೆಹಲಿ ಹೈಕೋಟ್ ಸಹ ಅರವಿಂದ್ ಕತ್ಪಾಲಿಯಾ ಅವರ ವಿರುದ್ಧ ವಿಚಾರಣೆಗೆ ಆದೇಶಿಸಿದೆ.