ಜೇಟ್ಲಿಯನ್ನು ಸಂಪುಟದಿಂದ ವಜಾಗೊಳಿಸಬೇಕು: ಕಾಂಗ್ರೆಸ್ ನೀಡಿದ ಕಾರಣಗಳಿವು!

ನವದೆಹಲಿ: ಭಾರತ ಸರ್ಕಾರದ ಹಣಕಾಸು ಸಚಿವರಾದ ಅರುಣ್ ಜೇಟ್ಲಿ ಅವರ ಪುತ್ರಿ ಹಾಗೂ ಅಳಿಯ ಇಬ್ಬರೂ ವಕೀಲರಾಗಿದ್ದು ಅವರುಗಳು ವಂಚನೆ ಪ್ರಕರಣದಲ್ಲಿ ಆರೋಪಿಯಾಗಿರುವ ವಜ್ರದ ವ್ಯಾಪಾರಿ ಮೆಹುಲ್ ಚೋಕ್ಸಿ ಜತೆ ನಂಟು ಹೊಂದಿದ್ದಾರೆ.ಅವರುಗಳು ಮೆಹುಲ್ ಚೋಕ್ಸಿ ಯಿಂದ 24 ಲಕ್ಷ ರುಪಾಯಿಗಳನ್ನು ಪಡೆದುಕೊಂಡಿದ್ದಾರೆ. ಹೀಗಾಗಿ ಇದೇ ತಕ್ಷಣ ಜೇಟ್ಲಿ ಸಂಪುಟದಿಂದ ವಜಾಗೊಳ್ಳಬೇಕು ಎಂದು ಕಾಂಗ್ರೆಸ್ ಆಗ್ರಹಿಸಿದೆ.

2018 ರ ಜನವರಿಯವರೆಗಿನ 44 ತಿಂಗಳೊಳಗೆ ಮೋದಿ ಸರಕಾರವು 90 ಸಾವಿರ ಕೋಟಿ ರೂ. ಮೊತ್ತದ 19,000 ಬ್ಯಾಂಕ್ ವಂಚನೆ ಪ್ರಕರಣಗಳಿಗೆ ಸಾಕ್ಷಿಯಾಗಿದೆ ಎಂದು ಕಾಂಗ್ರೆಸ್ ನಾಯಕ ಸಚಿನ್ ಪೈಲಟ್ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದರು. 

53 ಸಾವಿರ ಕೋಟಿ ವಂಚಿಸಿದ ಬಳಿಕ 23 ವಂಚಕರು ಭಾರತ ಸರ್ಕಾರದ ಕೃಪೆಯಿಂದ ದೇಶ ತೊರೆದಿದ್ದಾರೆ ಎಂಡು ಅವರು ಆರೋಪಿಸಿದ್ದಾರೆ. ಡೋಲಾಯಮಾನವಾಗಿರುವ ಆರ್ಥಿಕ ಪರಿಸ್ಥಿತಿ, ಬ್ಯಾಂಕಿಂಗ್ ವಂಚನೆಗಳು, ಹಾಗೂ ದೇಶ ತೊರೆಯುವ ವಂಚಕರು ಜೇಟ್ಲಿ ಅವರ 'ನ್ಯೂ ಇಂಡಿಯಾ'ದ ಭಾಗವಾಗಿದ್ದಾರೆ. ಸಚಿವರು ಈಗ ನೈತಿಕ ಹಿನ್ನೆಲೆಯಲ್ಲಿ ರಾಜೀನಾಮೆ ಸಲ್ಲಿಸಬೇಕು ಎಂದು ಅವರು ಒತ್ತಾಯಿಸಿದರು.