ಕೇರಳ: ಆತ್ಮಾಹುತಿ ಬಾಂಬ್ ಸ್ಫೋಟಿಸಿ ಪ್ರೇಯಸಿ ಹತ್ಯೆ ಮಾಡಿದ ಪ್ರಿಯಕರ

ಕೊಜಿಕೊಡ್: ಇದೇ ಮೊದಲ ಬಾರಿಗೆ ವ್ಯಕ್ತಿಯೊಬ್ಬ ಆತ್ಮಾಹುತಿ ಬಾಂಬ್ ದಾಳಿಯ ಮೂಲಕ ತನ್ನ ಪ್ರೇಯಸಿಯನ್ನು ಹತ್ಯೆ ಮಾಡಿದ ಘಟನೆ ಕೇರಳದ ಕೊಜಿಕೊಡ್ ನಲ್ಲಿ ನಡೆದಿದೆ.

ಕಳೆದ ಶುಕ್ರವಾರ ಕೊಜಿಕೊಡ್ ಜಿಲ್ಲೆಯ ವಯನಾಡ್ ನ ನ್ಯಾಕ್ಕಟ್ಟಿಯಲ್ಲಿ ಈ ಘಟನೆ ನಡೆದಿದ್ದು, 45 ವರ್ಷದ ಬೆನ್ನಿ ಎಂಬ ವ್ಯಕ್ತಿ ದೇಶಿ ನಿರ್ಮಿತ ಬಾಂಬ್ ಅನ್ನು ತನ್ನ ದೇಹಕ್ಕೆ ಕಟ್ಟಿಕೊಂಡು 38 ವರ್ಷದ ಪ್ರೇಯಸಿ ಅಮಲಾ ಅವರ ಮನೆಗೆ ಹೋಗಿ, ಆಕೆಯನ್ನು ಅಪ್ಪಿಕೊಂಡು ತನ್ನನ್ನು ತಾನು ಸ್ಫೋಟಿಸಿಕೊಂಡಿದ್ದಾನೆ. ಘಟನೆಯಲ್ಲಿ ಇಬ್ಬರು ಸ್ಥಳದಲ್ಲೇ ಮೃತಪಟ್ಟಿದ್ದು, ಅದೃಷ್ಟವಶಾತ್ ಮನೆಯಲ್ಲಿದ್ದ ಅಮಲಾ ಅವರ ಮೂರು ವರ್ಷದ ಮಗಳು ಯಾವುದೇ ಅಪಾಯವಿಲ್ಲದೆ ಪಾರಾಗಿದ್ದಾರೆ.

ಬೆನ್ನಿ ಮತ್ತು ಅಮಲಾ ಇಬ್ಬರು ವಿವಾಹಯೇತರ ಅಕ್ರಮ ಸಂಬಂಧ ಹೊಂದಿದ್ದು, ಇಳವನ್ ನಾಸರ್ ಪತ್ನಿಯಾಗಿರುವ ಅಮಲಾಗೆ ಮೂರು ಹೆಣ್ಣುಮಕ್ಕಳಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಇನ್ನು ಬೆನ್ನಿಗೂ ಸಹ ಬೆರೆ ಮಹಿಳೆಯೊಂದಿಗೆ ಮದುವೆಯಾಗಿದ್ದು, ಕಳೆದ ಎಂಟು ವರ್ಷಗಳಿಂದ ಈ ಎರಡೂ ಕುಟುಂಬ ಪರಸ್ಪರ ಪರಿಚಿತರಾಗಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ಈ ಸಂಬಂಧ ಸುಲ್ತಾನ್ ಬಥೆರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ನಡೆಸಲಾಗುತ್ತಿದೆ.