ಪೂರ್ವ ಲಡಾಕ್ ಗಡಿ ಸಂಘರ್ಷ: ಮುಂದಿನ ಚಳಿಗಾಲಕ್ಕೆ ಭಾರತೀಯ ಸೇನೆ ಹೇಗೆ ಸಿದ್ಧವಾಗಿದೆ, ಯೋಧರ ರಕ್ಷಣೆ ಹೇಗೆ?

ಲಡಾಕ್: ಪೂರ್ವ ಲಡಾಕ್ ನಲ್ಲಿ ಚೀನಾದ ಪೀಪಲ್ಸ್ ಲಿಬರೇಷನ್ ಆರ್ಮಿ(ಪಿಎಲ್ ಎ)ಯಿಂದ ಗಡಿ ಉಲ್ಲಂಘನೆಯಾಗಿ ಸೇನಾ ನಿಯೋಜನೆಯಿಂದ ಉದ್ವಿಗ್ನ ಪರಿಸ್ಥಿತಿ ಉಂಟಾಗಿರುವುದರಿಂದ ಭಾರತೀಯ ಸೇನೆ ಯಾವುದೇ ಸಮಯದಲ್ಲಿ ಕಾರ್ಯಾಚರಣೆಗೆ ಸಿದ್ದವಾಗಲು, ಮುಂದಿನ ಚಳಿಗಾಲದಲ್ಲಿ ಕ್ಷಿಷ್ಟ ಪರಿಸ್ಥಿತಿಗಳನ್ನು ಎದುರಿಸಲು ಹೇಗೆ ಸನ್ನದ್ಧವಾಗಿದೆ, ಯೋಧರಿಗೆ ಯಾವ ರೀತಿ ಮೂಲಭೂತ ಸೌಕರ್ಯಗಳನ್ನು ಕಲ್ಪಿಸಿದೆ ಎಂದು ಎಎನ್ ಐ ಸುದ್ದಿಸಂಸ್ಥೆ ವರದಿಗಾರರು ಹೋಗಿ ಪರಿಶೀಲನೆ ನಡೆಸಿದ್ದಾರೆ.

ಲಡಾಕ್ ನಲ್ಲಿ ನಿರ್ವಹಣಾ ವ್ಯವಸ್ಥೆಗೆ ಇಟ್ಟುಕೊಂಡಿರುವ ಬೋಫೋರ್ಸ್ ಗನ್ ಗಳ ಬಗ್ಗೆ ಮಾಹಿತಿ ಪಡೆದುಕೊಳ್ಳಲು ಎಎನ್ ಐ ಸುದ್ದಿಸಂಸ್ಥೆ ತಂಡ ಭೇಟಿ ನೀಡಿದ್ದಾಗ, ಲಡಾಕ್ ಗಡಿಭಾಗದಲ್ಲಿ ಸೇನೆಯ ಎಂಜಿನಿಯರ್ ಗಳು 155ಎಂಎಂ ಬೋಫೋರ್ಸ್ ಗನ್ ಗಳನ್ನು ನಿರ್ವಹಣೆ ಮಾಡುತ್ತಿರುವುದು ಗಮನಕ್ಕೆ ಬಂದಿದೆ.

ಬೋಫೋರ್ಸ್ ಗನ್: 1980ರ ದಶಕದ ಮಧ್ಯಭಾಗದಲ್ಲಿ ಭಾರತೀಯ ಸೇನೆಯ ಫಿರಂಗಿದಳದ ರೆಜಿಮೆಂಟ್ ಗೆ ಬೋಫೋರ್ಸ್ ಗನ್ ಗಳನ್ನು ಸೇರ್ಪಡೆಗೊಳಿಸಲಾಗಿತ್ತು. ಲಡಾಕ್ ಗಡಿ ಭಾಗದಲ್ಲಿ ಭಾರತೀಯ ಸೇನೆಗೆ ಬೋಫೋರ್ಸ್ ಗನ್ ಗಳನ್ನು ಸೇರಿಸಿದ ಮೇಲೆ ಅದು ತಗ್ಗು ಮತ್ತು ಎತ್ತರದ ಪ್ರದೇಶಗಳಲ್ಲಿ ಗುಂಡಿನ ದಾಳಿ ನಡೆಸುವ ಸಾಮರ್ಥ್ಯವನ್ನು ಹೊಂದಿರುತ್ತದೆ.

ಲಡಾಕ್ ನಲ್ಲಿ ಸೇನೆಯ ಎಂಜಿನಿಯರ್ ಗಳು ಇಂತಹ ಒಂದು ಗನ್ ನ್ನು ಸೇವೆಗೆ ಸೇರಿಸಲು ಸಿದ್ಧತೆ ಮಾಡಿಕೊಂಡಿದ್ದು ಅದು ಇನ್ನು ಕೆಲವೇ ದಿನಗಳಲ್ಲಿ ಕಾರ್ಯಾಚರಣೆ ಆರಂಭಿಸಲಿದೆ. ಅಧಿಕಾರಿಗಳ ಪ್ರಕಾರ, ಗನ್‌ಗೆ ಕಾರ್ಯನಿರ್ವಹಿಸಲು ನಿಯತಕಾಲಿಕ ಸೇವೆ ಮತ್ತು ನಿರ್ವಹಣೆ ಅಗತ್ಯವಾಗಿದ್ದು, ಅದನ್ನು ಕೆಲಸ ಮಾಡಲು ತಂತ್ರಜ್ಞರನ್ನು ನಿಯೋಜಿಸಲಾಗಿದೆ ಎಂದು ಅಧಿಕಾರಿಗಳು ಹೇಳುತ್ತಾರೆ.

ಇತ್ತೀಚೆಗೆ ಜಮ್ಮು-ಕಾಶ್ಮೀರದ ಡ್ರಾಸ್ ನಲ್ಲಿ ಆಪರೇಷನ್ ವಿಜಯ್ ಯುದ್ಧದಲ್ಲಿ ಬೋಫೋರ್ಸ್ ಗನ್ ಪ್ರಮುಖ ಪಾತ್ರ ವಹಿಸಿತ್ತು. ತೀವ್ರ ಸಂಕಷ್ಟ ಪರಿಸ್ಥಿತಿಯಲ್ಲಿ ಇಂತಹ ಶಸ್ತ್ರಾಸ್ತ್ರಗಳ ಪೂರೈಕೆಗೆ, ಸೇವೆಗಳ ನಿರ್ವಹಣೆಗೆ ಸೇನಾ ಎಂಜಿನಿಯರ್ ಗಳು ಪ್ರಮುಖ ಪಾತ್ರ ವಹಿಸುತ್ತಾರೆ.

ಪಾಕಿಸ್ತಾನದ ವಿರುದ್ಧದ 1999 ರ ಕಾರ್ಗಿಲ್ ಯುದ್ಧದಲ್ಲಿ ಬೋಫೋರ್ಸ್ ಬಂದೂಕುಗಳು ತಮ್ಮ ಎತ್ತರದ ಪರ್ವತಗಳ ಮೇಲೆ ನಿರ್ಮಿಸಲಾದ ಬಂಕರ್ ಮತ್ತು ನೆಲೆಗಳನ್ನು ಸುಲಭವಾಗಿ ನಾಶಮಾಡುವ ಮೂಲಕ ಮತ್ತು ಪಾಕಿಸ್ತಾನ ಸೈನ್ಯಕ್ಕೆ ಭಾರೀ ಹಾನಿಯನ್ನುಂಟುಮಾಡುವ ಮೂಲಕ ತಮ್ಮ ಸಾಮರ್ಥ್ಯವನ್ನು ಸಾಬೀತುಪಡಿಸಿದ್ದವು. ಮುಂದಿನ ಚಳಿಗಾಲದಲ್ಲಿ ಹವಾಮಾನ ತಾಪಮಾನವು -50 ಡಿಗ್ರಿಗಳಿಗೆ ಇಳಿದರೂ ಸಹ ಭಾರತೀಯ ಸೇನೆಯು ತನ್ನ ಯೋಧರಿಗೆ ಹವಾಮಾನಕ್ಕೆ ತಕ್ಕಂತೆ ಬಟ್ಟೆಬರೆಗಳು, ಸಾಧನಗಳು ಮತ್ತು ಇತರ ಸೌಕರ್ಯಗಳನ್ನು ಒದಗಿಸುತ್ತದೆ.

ಹವಾಮಾನಕ್ಕೆ ತಕ್ಕಂತೆ ಉಡುಪು: ಭಾರತೀಯ ಸೇನೆ, ಎತ್ತರದ ಪ್ರದೇಶಗಳಲ್ಲಿ ನಿಯೋಜಿಸಲಾದ ಸೈನಿಕರಿಗೆ ಬಹು ಪದರದ ಬಟ್ಟೆಗಳನ್ನು ಒದಗಿಸುತ್ತಿದೆ. ಭಾರತೀಯ ಸೇನೆಯ ಅಧಿಕಾರಿಗಳ ಪ್ರಕಾರ, ಈ ಉಡುಪುಗಳು ಹವಾಮಾನದಿಂದ ಸುರಕ್ಷಿತವಾಗಿರಲು ಜವಾನರಿಗೆ ಸಹಾಯ ಮಾಡುವುದಲ್ಲದೆ ಶತ್ರುಗಳಿಂದ ಅಡಗಿಕೊಳ್ಳಲು ಸಹಕಾರಿಯಾಗುತ್ತವೆ.

ಬಹು ಪದರದ ಉಡುಪುಗಳಲ್ಲಿ ಯೋಧರು, ಪರ್ವತಗಳ ಮೇಲೆ ಹತ್ತಲು ಅಥವಾ ಎತ್ತರದ ಪ್ರದೇಶಗಳಲ್ಲಿ ಆರಾಮವಾಗಿ ನಡೆಯಲು ಅನುಕೂಲವಾಗುವಂತೆ ಉಡುಪುಗಳನ್ನು ನೀಡಲಾಗುತ್ತದೆ. ಬಟ್ಟೆಯ ಮೊದಲ ಪದರದಲ್ಲಿ, ಆಂತರಿಕ ಪ್ಯಾಂಟ್ ಮತ್ತು ಗಾಢ ಬಣ್ಣದ ಜಾಕೆಟ್ ಇದ್ದರೆ, ಎರಡನೇ ಪದರದಲ್ಲಿ ಹಸಿರು ಬಣ್ಣದ ಜಾಕೆಟ್ ಮತ್ತು ಇನ್ನೊಂದು ಪ್ಯಾಂಟ್ ಅನ್ನು ಅವರಿಗೆ ನೀಡಲಾಗುತ್ತಿದೆ.ಅಂತೆಯೇ, ಹೊರಗಿನ ಪದರವಾಗಿರುವ ಮೂರನೇ ಪದರದ ಮೇಲೆ, ಯೋಧರು ವಿಶೇಷ ಬೂಟುಗಳೊಂದಿಗೆ ಬಿಳಿ ಬಣ್ಣದ ಜಾಕೆಟ್ ಮತ್ತು ಪ್ಯಾಂಟ್ ಧರಿಸಬೇಕಾಗುತ್ತದೆ.ಕೈಗಳು ಮತ್ತು ಸಾಕ್ಸ್‌ಗಳಿಗೆ ಬಹು-ಪದರದ ಕೈಗವಸುಗಳಿವೆ, ಇದು ತೀವ್ರವಾದ ಶೀತ ಪರಿಸ್ಥಿತಿಗಳಲ್ಲಿಯೂ ಸಹ ಯೋಧರನ್ನು ಬೆಚ್ಚಗಿರಿಸುತ್ತದೆ.

ಎತ್ತರದ ಪ್ರದೇಶದಲ್ಲಿ ನಿಯೋಜಿಸಲಾಗಿರುವ ಪ್ರತಿಯೊಬ್ಬ ಯೋಧರಿಗೆ 21 ವಸ್ತುಗಳನ್ನು ನೀಡಲಾಗುತ್ತದೆ. ಇದರಲ್ಲಿ ವಿಶೇಷ ಬಟ್ಟೆ, ಉಪಕರಣಗಳು ಇತ್ಯಾದಿಗಳಿರುತ್ತವೆ ಎಂದು ಲೆಫ್ಟಿನೆಂಟ್ ಕರ್ನಲ್ ಮೊನ್ರಾಕ್ ಸಾಧ್ ತಿಳಿಸಿದ್ದಾರೆ.

ಡೇರೆಗಳ ನಿರ್ಮಾಣ: ಮತ್ತೊಂದೆಡೆ, ಯೋಧರ ವಸತಿ ವಿಚಾರ ಬಂದಾಗ, ಭಾರತೀಯ ಸೇನೆಯು ಡೇರೆಗಳನ್ನು ಹೊಂದಿರುತ್ತದೆ. ದೊಡ್ಡ ಡೇರೆಗಳಲ್ಲಿ ಸುಮಾರು 12 ಯೋಧರು, ಸಣ್ಣ ಪುಟ್ಟ ಡೇರೆಗಳಲ್ಲಿ ಒಬ್ಬೊಬ್ಬರೇ ಇರುತ್ತಾರೆ. ಈ ಡೇರೆಗಳು ಶಾಖೋತ್ಪಾದಕಗಳನ್ನು ಹೊಂದಿವೆ ಮತ್ತು -50 ಡಿಗ್ರಿ ತಾಪಮಾನದಲ್ಲಿಯೂ ಸಹ ಜವಾನರನ್ನು ಬೆಚ್ಚಗೆ ಸುರಕ್ಷಿತವಾಗಿಡುತ್ತದೆ.

ಈ ಡೇರೆಗಳು ಅನೇಕ ಪದರಗಳಿಂದ ಮಾಡಲ್ಪಟ್ಟಿದೆ, ಹೊರಭಾಗದಲ್ಲಿ ಜಲನಿರೋಧಕ ಹೊದಿಕೆಯನ್ನು ಹೊಂದಿದ್ದರೆ ಒಳಗಿನ ಪದರವು ಕ್ವಿಲ್ಟ್ ಬಟ್ಟೆಯಿಂದ ಮಾಡಲ್ಪಟ್ಟಿದೆ, ಇದು ತಾಪಮಾನವನ್ನು ಹೆಚ್ಚಿನ ಮಟ್ಟದಲ್ಲಿಡಲು ಸಹಾಯ ಮಾಡುತ್ತದೆ. ಅಲ್ಲದೆ, ಅವುಗಳು ಸೌರ ಫಲಕಗಳನ್ನು ಹೊಂದಿದ್ದು, ಅದರ ಮೂಲಕ ಯೋಧರು ವಿದ್ಯುಚ್ಛಕ್ತಿಯ ಮೂಲಭೂತ ಅಗತ್ಯಗಳನ್ನು ಪೂರೈಸಿಕೊಳ್ಳಬಹುದು.