ಜಗತ್ತಿನ ಶ್ರೇಷ್ಠ 'ಈವೆಂಟ್ ಮ್ಯಾನೇಜರ್'ಗೆ ಪ್ರಚಾರ ಗಿಟ್ಟಿಸಲು ಮತ್ತೊಂದು ಅವಕಾಶ: 2023ರ ಜಿ-20 ಬಗ್ಗೆ ಕಾಂಗ್ರೆಸ್

ನವದೆಹಲಿ: 2023 ರ ಜಿ-20 ಶೃಂಗಸಭೆಯ ಅಧ್ಯಕ್ಷತೆಯನ್ನು ಭಾರತಕ್ಕೆ ಹಸ್ತಾಂತರಿಸಲಾಗಿದ್ದು, ಕಾಂಗ್ರೆಸ್ ಈ ವಿಷಯದಲ್ಲೂ ಕುಹಕವಾಡಿದೆ. 

ಜಿ-20ಯ ಮುಂದಿನ ಶೃಂಗಸಭೆಗೆ ಭಾರತ ಆತಿಥ್ಯ ವಹಿಸುತ್ತಿರುವ ವಿಷಯವನ್ನಿಟ್ಟುಕೊಂಡು ಪ್ರಧಾನಿ ಮೋದಿ ಅವರನ್ನು ಲೇವಡಿ ಮಾಡಿರುವ ಕಾಂಗ್ರೆಸ್, 2023 ರ ಜಿ-20 ಶೃಂಗಸಭೆಯನ್ನು ಜಗತ್ತಿನ ಶ್ರೇಷ್ಠ ಈವೆಂಟ್ ಮ್ಯಾನೇಜರ್ (ಪ್ರಧಾನಿ ಮೋದಿ) ಲೋಕಸಭಾ ಚುನಾವಣೆಗೆ ಯಶಸ್ವಿಯಾಗಿ ಬಳಸಿಕೊಳ್ಳಲಿದ್ದಾರೆ ಎಂದು ಹೇಳಿದೆ.

ಇಂಡೋನೇಷ್ಯಾದ ಬಾಲಿಯಲ್ಲಿ ಮುಕ್ತಾಯಗೊಂಡ ಪ್ರಸಕ್ತ ಸಾಲಿನ ಜಿ-20 ಶೃಂಗಸಭೆಯಲ್ಲಿ ಮುಂದಿನ ಅಧ್ಯಕ್ಷತೆಯನ್ನು ಭಾರತಕ್ಕೆ ಹಸ್ತಾಂತರಿಸಲಾಯಿತು. 

The Non Aligned Summit of over 100 countries took place in New Delhi in 1983 followed by the Commonwealth Summit. The 2023 Summit will of course be milked by the world's greatest event manager for the Lok Sabha elections a year later to distract from real issues of the people 2/2

— Jairam Ramesh (@Jairam_Ramesh) November 16, 2022

ಜಿ-20ಯ ಅಧ್ಯಕ್ಷತೆಯನ್ನು ಭಾರತ ಡಿ.1 ರಿಂದ ವಹಿಸಿಕೊಳ್ಳಲಿದೆ. ಮುಂದಿನ ಜಿ-20 ನಾಯಕರ ಶೃಂಗಸಭೆ 2023 ರ ಸೆ.9-10 ರಂದು ನವದೆಹಲಿಯಲ್ಲಿ ನಡೆಯಲಿದೆ. 

ಇದನ್ನೂ ಓದಿ: "ಇದು ಯುದ್ಧದ ಯುಗವಲ್ಲ": ಪುಟಿನ್ ಗೆ ಪ್ರಧಾನಿ ಮೋದಿಯ ಸಲಹೆ ಜಿ-20 ಶೃಂಗಸಭೆಯಲ್ಲಿ ಸದ್ದು!

ಸಂವಹನ ವಿಭಾಗದ ಉಸ್ತುವಾರಿ, ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಜೈರಾಮ್ ರಮೇಶ್ ಟ್ವೀಟ್ ಮಾಡಿದ್ದು, ಜಿ-20 ಎಂಬುದು 19 ಪ್ರಮುಖ ಆರ್ಥಿಕತೆಗಳ ಒಕ್ಕೂಟವಾಗಿದ್ದು, 1999 ರಲ್ಲಿ ಯುರೋಪಿಯನ್ ಯೂನಿಯನ್ ನ್ನು ಸ್ಥಾಪಿಸಲಾಯಿತು. 2008 ರಿಂದ ಶೃಂಗಸಭೆಯನ್ನು ಸರತಿಯ ಪ್ರಕಾರ ಪ್ರತಿ ಸದಸ್ಯ ರಾಷ್ಟ್ರಗಳಲ್ಲಿ ನಡೆಸಲಾಗುತ್ತಿದೆ. ಪ್ರತಿಯೊಂದು ರಾಷ್ಟ್ರಕ್ಕೂ ಈ ಅವಕಾಶ ಸಿಗಲಿದ್ದು, 2023 ರಲ್ಲಿ ಭಾರತವೂ ಆತಿಥ್ಯ ವಹಿಸುತ್ತಿದೆ ಎಂದು ಹೇಳಿದ್ದಾರೆ.

ಈ ಹಿಂದೆ ನಡೆದ ಶೃಂಗಸಭೆಗಳಂತೆಯೇ ಈ ಶೃಂಗಸಭೆಯನ್ನೂ ಸ್ವಾಗತಿಸಬೇಕು, 100 ಕ್ಕೂ ಹೆಚ್ಚು ರಾಷ್ಟ್ರಗಳನ್ನೊಳಗೊಂಡ ಅಲಿಪ್ತ ಶೃಂಗಸಭೆ 1983 ರಲ್ಲಿ ನವದೆಹಲಿಯಲ್ಲಿ ನಡೆದಿತ್ತು ಹಾಗೂ ಅದಾದ ಬಳಿಕ ಕಾಮನ್ ವೆಲ್ತ್ ಶೃಂಗಸಭೆಯೂ ನಡೆದಿತ್ತು ಎಂದು ಜೈರಾಮ್ ರಮೇಶ್ ಹೇಳಿದ್ದಾರೆ. 

ಇದನ್ನೂ ಓದಿ: ಪ್ರಧಾನಿ ಮೋದಿಯವರನ್ನು ರಿಷಿ ಸುನಕ್ ಭೇಟಿ ಮಾಡಿದ ಕೆಲವೇ ಹೊತ್ತಿನಲ್ಲಿ ಭಾರತೀಯ ಯುವ ವೃತ್ತಿಪರರಿಗೆ 3 ಸಾವಿರ ಯುಕೆ ವೀಸಾ ಘೋಷಿಸಿದ ಬ್ರಿಟನ್

ಆದರೆ 2023 ರ ಜಿ-20 ಶೃಂಗಸಭೆಯನ್ನು ಲೋಕಸಭಾ ಚುನಾವಣೆಗಾಗಿ ಜಗತ್ತಿನ ಶ್ರೇಷ್ಠ ಈವೆಂಟ್ ಮ್ಯಾನೇಜರ್ ಪ್ರಚಾರಕ್ಕೆ ಬಳಸಿಕೊಳ್ಳಲಿದ್ದು ಜನರ ನೈಜ ವಿಷಯಗಳನ್ನು ಮರೆಮಾಚುತ್ತಾರೆ ಎಂದು ಜೈರಾಮ್ ರಮೇಶ್ ಪ್ರಧಾನಿ ಮೋದಿ ಹೆಸರು ಹೇಳದೇ ವ್ಯಂಗ್ಯವಾಡಿದ್ದಾರೆ.