ನವದೆಹಲಿ: ಭಾರತದ ಮುಖ್ಯ ನ್ಯಾಯಮೂರ್ತಿ ಡಿವೈ ಚಂದ್ರಚೂಡ್ ಮತ್ತು ಸುಪ್ರೀಂ ಕೋರ್ಟ್ ಬಾರ್ ಅಸೋಸಿಯೇಷನ್ (ಎಸ್‌ಸಿಬಿಎ) ನಡುವಿನ ಜಗಳ ತಾರಕಕ್ಕೇರಿದ್ದು, ವಕೀಲರ ಸಂಘ ಶುಕ್ರವಾರ ಆಯೋಜಿಸಿದ್ದ ‘ಹೋಳಿ ಮಿಲನ್’ ಕಾರ್ಯಕ್ರಮಕ್ಕೆ ಮುಖ್ಯ ನ್ಯಾಯಮೂರ್ತಿ ಚಂದ್ರಚೂಡ್ ಗೈರಾಗುವ ಮೂಲಕ ಬಹಿರಂಗವಾಗಿ ಅಸಮಾಧಾನ ಹೊರಹಾಕಿದ್ದಾರೆ.
ದೆಹಲಿಯಲ್ಲಿ ಆಯೋಜನೆಯಾಗಿರುವ ಈ ಕಾರ್ಯಕ್ರಮದಲ್ಲಿ ಸಿಜೆಐ ಚಂದ್ರಚೂಡ್ ಅವರು ಮುಖ್ಯ ಅತಿಥಿಗಳಾಗಿ ಭಾಗವಹಿಸಬೇಕಿತ್ತು. ಎಸ್‌ಸಿಬಿಎ ಶುಕ್ರವಾರ ಕವನ ವಾಚನವನ್ನು ಆಯೋಜಿಸಿತ್ತು, ಇದರಲ್ಲಿ ಮುಖ್ಯ ಅತಿಥಿಯಾಗಿ ಸಿಜೆಐ ಅವರನ್ನು ಆಹ್ವಾನಿಸಲಾಗಿತ್ತು. ಸಮಾರಂಭದಲ್ಲಿ ಖ್ಯಾತ ಕವಿಗಳಾದ ಅಶೋಕ್ ಚಕ್ರಧರ್ ಮತ್ತು ಶಂಭು ಶಿಖರ್ ತಮ್ಮ ಕವನಗಳನ್ನು ವಾಚಿಸುವವರಿದ್ದರು. ಆದರೆ ಪರಸ್ಪರ ಜಗಳದಿಂದಾಗಿ ಈ ಕಾರ್ಯಕ್ರಮಕ್ಕೆ ಸಿಜೆಐ ಗೈರಾಗಿದ್ದಾರೆ ಎಂದು ಹೇಳಲಾಗಿದೆ.
ಏನಿದು ಜಗಳ?
ಚಂದ್ರಚೂಡ್ ಮತ್ತು ವಕೀಲರ ಸಂಘದ ಅಧ್ಯಕ್ಷ ಹಿರಿಯ ವಕೀಲ ವಿಕಾಸ್ ಸಿಂಗ್ ಅವರ ನಡುವೆ ಗುರುವಾರ ಸುಪ್ರೀಂ ಕೋರ್ಟ್‌ನಲ್ಲಿ ವಕೀಲರ ಚೇಂಬರ್‌ನಲ್ಲಿ ಜಮೀನು ಹಂಚಿಕೆಗೆ ಸಂಬಂಧಿಸಿದ ವಿಷಯದ ಬಗ್ಗೆ ತೀವ್ರ ವಾಗ್ವಾದ ನಡೆದಿತ್ತು. ಮುಖ್ಯ ನ್ಯಾಯಮೂರ್ತಿ ಚಂದ್ರಚೂಡ್ ಅವರು ವಿಕಾಸ್ ಸಿಂಗ್ ಅವರಿಗೆ ಧ್ವನಿ ಎತ್ತದಂತೆ ಮತ್ತು ನ್ಯಾಯಾಲಯದಿಂದ ಹೊರಹೋಗುವಂತೆಯೂ ಹೇಳಿದ್ದರು. ವಾಸ್ತವವಾಗಿ, ವಿಷಯಗಳ ಪ್ರಸ್ತಾಪದ ಸಮಯದಲ್ಲಿ, ಎಸ್‌ಸಿಬಿಎ ಅಧ್ಯಕ್ಷ ವಿಕಾಸ್ ಸಿಂಗ್ ಅವರು ಈ ವಿಷಯವನ್ನು ನ್ಯಾಯಮೂರ್ತಿ ಚಂದ್ರಚೂಡ್, ನ್ಯಾಯಮೂರ್ತಿ ಪಿ ಎಸ್ ನರಸಿಂಹ ಮತ್ತು ನ್ಯಾಯಮೂರ್ತಿ ಜೆಬಿ ಪರ್ದಿವಾಲಾ ಅವರನ್ನೊಳಗೊಂಡ ಪೀಠದ ಮುಂದೆ ಇಡಲು ಬಯಸಿದ್ದರು.. ಈ ಸಂಬಂದ ಕಳೆದ ಆರು ತಿಂಗಳಿಂದ ವಿಷಯವನ್ನು ಪಟ್ಟಿ ಮಾಡಲು ಪ್ರಯತ್ನಿಸುತ್ತಿರುವುದಾಗಿ ವಿಕಾಸ್ ಸಿಂಗ್ ಹೇಳಿದ್ದರು.
ಆದರೆ ಸಿಜೆಐ ಅವರ ನಡೆಯಿಂದ ಇದು ಸಾಧ್ಯವಾಗುತ್ತಿಲ್ಲ ಎಂದು ವಿಕಾಸ್ ಸಿಂಗ್ ಅಸಮಾದಾನ ವ್ಯಕ್ತಪಡಿಸಿದ್ದಾರೆ. 'ಎಸ್‌ಸಿಬಿಎ ಅರ್ಜಿಯ ಮೇರೆಗೆ ಅಪ್ಪು ಘರ್‌ನ ಭೂಮಿಯನ್ನು ಸುಪ್ರೀಂ ಕೋರ್ಟ್‌ಗೆ ನೀಡಲಾಯಿತು ಮತ್ತು ಎಸ್‌ಸಿಬಿಎಗೆ ಇಷ್ಟವಿಲ್ಲದೆ ಒಂದು ಬ್ಲಾಕ್ ಅನ್ನು ಮಾತ್ರ ನೀಡಲಾಗಿದೆ. ಮಾಜಿ ಮುಖ್ಯ ನ್ಯಾಯಮೂರ್ತಿ ಎನ್‌ವಿ ರಮಣ ಅವರ ಅವಧಿಯಲ್ಲಿ ಈ ಭೂಮಿಯಲ್ಲಿ ನಿರ್ಮಾಣ ಕಾರ್ಯ ಆರಂಭವಾಗಬೇಕಿತ್ತು. ಕಳೆದ ಆರು ತಿಂಗಳಿನಿಂದ, ನಾವು ವಿಷಯವನ್ನು ಪಟ್ಟಿ ಮಾಡಲು ಪ್ರಯತ್ನಿಸುತ್ತಿದ್ದೇವೆ. ನನ್ನನ್ನು ಸಾಮಾನ್ಯ ದಾವೆದಾರನಂತೆ ನಡೆಸಿಕೊಳ್ಳುತ್ತಿದ್ದಾರೆ' ಎಂದೂ ವಿಕಾಸ್ ಸಿಂಗ್ ಆರೋಪಿಸಿದ್ದಾರೆ.
ಇದಕ್ಕೆ ಪ್ರತಿಕ್ರಿಯೆ ನೀಡಿರುವ ಸಿಜೆಐ, “ನೀವು ಈ ರೀತಿ ಭೂಮಿ ಕೇಳುವಂತಿಲ್ಲ. ನಾನು ವಿಷಯವನ್ನು ಪಟ್ಟಿ ಮಾಡಲು ಪ್ರಯತ್ನಿಸುತ್ತಿದ್ದೇನೆ. ಇದನ್ನು ಮಾಡದಿದ್ದರೆ, ನಾನು ವಿಷಯವನ್ನು ನಿಮ್ಮ ನಿವಾಸದವರೆಗೆ ತೆಗೆದುಕೊಳ್ಳಬೇಕಾಗುತ್ತದೆ. ಬಾರ್‌ಗಳು ಈ ರೀತಿ ವರ್ತಿಸುವುದನ್ನು ನಾನು ಬಯಸುವುದಿಲ್ಲ. ಮುಖ್ಯ ನ್ಯಾಯಮೂರ್ತಿಗೆ ಬೆದರಿಕೆ ಹಾಕಬೇಡಿ... ಇದನ್ನು ಹೀಗೆ ಪರಿಗಣಿಸಬೇಕೇ? ದಯವಿಟ್ಟು ಕುಳಿತುಕೊಳ್ಳಿ. ಅದನ್ನು ಹಾಗೆ ಪಟ್ಟಿ ಮಾಡಲಾಗುವುದಿಲ್ಲ. ದಯವಿಟ್ಟು ನನ್ನ ನ್ಯಾಯಾಲಯವನ್ನು ಬಿಟ್ಟುಬಿಡಿ. ನಾನು ಈ ರೀತಿ (ವಿಷಯ) ಪಟ್ಟಿ ಮಾಡುವುದಿಲ್ಲ. ನೀವು ನನ್ನನ್ನು ನಿಗ್ರಹಿಸಲು ಸಾಧ್ಯವಿಲ್ಲ ಎಂದು ಚಂದ್ರಚೂಡ್ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ ಎನ್ನಲಾಗಿದೆ.
“ಮಿಸ್ಟರ್ ವಿಕಾಸ್ ಸಿಂಗ್, ನಿಮ್ಮ ಧ್ವನಿಯನ್ನು ಎತ್ತಬೇಡಿ. ಅಧ್ಯಕ್ಷರಾಗಿ ನೀವು ಬಾರ್‌ನ ಮಾರ್ಗದರ್ಶಕ ಮತ್ತು ನಾಯಕರಾಗಿರಬೇಕು. ನೀವು ಸಂವಹನದ ಗುಣಮಟ್ಟವನ್ನು ಕಡಿಮೆ ಮಾಡುತ್ತಿದ್ದೀರಿ ಎಂದು ನನಗೆ ವಿಷಾದವಿದೆ. ಸುಪ್ರೀಂ ಕೋರ್ಟ್‌ಗೆ ಮಂಜೂರಾದ ಜಾಗವನ್ನು ಚೇಂಬರ್ ನಿರ್ಮಾಣಕ್ಕೆ ಬಾರ್‌ಗೆ ನೀಡಬೇಕು ಎಂದು ನೀವು ಕಲಂ 32 ರ ಅಡಿಯಲ್ಲಿ ಅರ್ಜಿ ಸಲ್ಲಿಸಿದ್ದೀರಿ. ವಿಷಯ ಬಂದಾಗ ನೋಡುತ್ತೇವೆ. ನಿಮ್ಮ ಸ್ವಂತ ನಿಯಮಗಳ ಮೇಲೆ ನಮ್ಮನ್ನು ಓಡಿಸಲು ಪ್ರಯತ್ನಿಸಬೇಡಿ ಎಂದು ಚಂದ್ರಚೂಡ್ ಅಸಮಾದಾನ ವ್ಯಕ್ತಪಡಿಸಿದ್ದಾರೆ.
Advertisement