ಉತ್ತರ ಪ್ರದೇಶ ವಿವಾಹ ಕಾರ್ಯಕ್ರಮದಲ್ಲಿ ಯಡವಟ್ಟು: ತಪ್ಪಾಗಿ ಭಾವಿಸಿ ವ್ಯಕ್ತಿಗೆ ಥಳಿತ

ಲಖನೌ: ಉತ್ತರ ಪ್ರದೇಶದ ಗೋರಖ್ ಪುರದ ಪಕ್ಕದ ಜಿಲ್ಲೆ ಡಿಯೋರಿಯಾದಲ್ಲಿ ನಡೆದ ವಿವಾಹ ಕಾರ್ಯಕ್ರಮದಲ್ಲಿ ಯಡವಟ್ಟು ಸಂಭವಿಸಿದ್ದು, ವ್ಯಕ್ತಿಯೋರ್ವನನ್ನು ತಪ್ಪಾಗಿ ಭಾವಿಸಿ ಥಳಿಸಲಾಗಿದೆ.

ವ್ಯಕ್ತಿಯನ್ನು ಕಳ್ಳನೆಂದು ತಪ್ಪಾಗಿ ಭಾವಿಸಲಾಗಿದ್ದು ಮನಸೋ ಇಚ್ಛೆ ಥಳಿಸಲಾಗಿರುವ ವಿಡಿಯೋ ವೈರಲ್ ಆಗತೊಡಗಿದೆ.

ಡಿಯೋರಿಯಾದ ತರ್ಕುಲ್ವಾ ಗ್ರಾಮದಲ್ಲಿ ಈ ಘಟನೆಗಳು ನಡೆದಿದ್ದು, ಸ್ಥಳೀಯ ಮದುವೆ ಸಭಾಂಗಣಕ್ಕೆ ಮದುವೆ ತಂಡ ಆಗಮಿಸಿತ್ತು. ಭಾಗವಹಿಸಿದವರಲ್ಲಿ ಒಬ್ಬರು, ಮದ್ಯದ ಅಮಲಿನಲ್ಲಿ ದಾರಿ ತಪ್ಪಿದ್ದರು. ಮಧ್ಯರಾತ್ರಿಯ ಸುಮಾರಿಗೆ ಆ ವ್ಯಕ್ತಿ ಮನೆಯ ಬಾಗಿಲು ಬಡಿದ. ಆತನನ್ನು ಕಳ್ಳನೆಂದು ತಪ್ಪಾಗಿ ಭಾವಿಸಿ, ಸ್ಥಳೀಯರು "ಕಳ್ಳ, ಕಳ್ಳ" ಎಂದು ಕೂಗಲು ಪ್ರಾರಂಭಿಸಿದರು, ಹಿಂದಿನ ದಿನ ನೆರೆಹೊರೆಯಲ್ಲಿ ನಡೆದ ಕಳ್ಳತನದ ಇತ್ತೀಚಿನ ನೆನಪಿನಿಂದ ಸ್ಥಳೀಯರು ಆತನನ್ನು ಹಿಡಿದು ಥಳಿಸಿದ್ದಾರೆ.

ಜನಸಮೂಹ ತ್ವರಿತವಾಗಿ ಜಮಾಯಿಸಿತು ಮತ್ತು ವ್ಯಕ್ತಿಯನ್ನು ಬಲವಂತವಾಗಿ ವಿದ್ಯುತ್ ಕಂಬಕ್ಕೆ ಕಟ್ಟಿಹಾಕಿ ಥಳಿಸಿದ್ದಾರೆ. ದಾಳಿಯ ಸಮಯದಲ್ಲಿ, ಹಲವಾರು ಪ್ರೇಕ್ಷಕರು ಕ್ರೂರ ದೃಶ್ಯವನ್ನು ಚಿತ್ರೀಕರಿಸಿದರು, ನಂತರ ಅದನ್ನು ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಂಡಿದ್ದು ಶೀಘ್ರವಾಗಿ ವೈರಲ್ ಆಗಿದೆ.

ಪೊಲೀಸರು ಎಚ್ಚೆತ್ತುಕೊಂಡಿದ್ದು, ಘಟನಾ ಸ್ಥಳಕ್ಕೆ ಆಗಮಿಸಿ ತೀವ್ರ ಗಾಯಗೊಂಡಿದ್ದ ವ್ಯಕ್ತಿಯನ್ನು ಪತ್ತೆ ಮಾಡಿದ್ದಾರೆ. ಅವರನ್ನು ಸ್ಥಳೀಯ ಪೊಲೀಸ್ ಠಾಣೆಗೆ ಕರೆದೊಯ್ದು ಗಾಯಾಳುವಿಗೆ ಚಿಕಿತ್ಸೆ ಕೊಡಿಸಿದ್ದಾರೆ.