ಉಗ್ರ ನಂಟು: ಪೊಲೀಸರ ತನಿಖೆ ಎದುರಿಸಲಾಗದೇ ಪಾಕ್ ಭಯೋತ್ಪಾದಕನ ಸೋದರಳಿಯ ಆತ್ಮಹತ್ಯೆ!; ನ್ಯಾಯ ಸಿಗುವವರೆಗೂ ಹೋರಾಟ- ಶಾಸಕ ರಾಮೇಶ್ವರ ಸಿಂಗ್

ಶ್ರೀನಗರ: ಉಗ್ರರನ್ನು ಬೆಂಬಲಿಸುತ್ತಿದ್ದಾರೆ ಎಂಬ ಆರೋಪಕ್ಕೆ ಸಂಬಂಧಿಸಿದಂತೆ ತನಿಖೆಯಲ್ಲಿ ಪೊಲೀಸರ ಕಿರುಕುಳ ತಾಳಲಾರದೇ ಜಮ್ಮು ಮತ್ತು ಕಾಶ್ಮೀರದ ಕಥುವಾ ಜಿಲ್ಲೆಯಲ್ಲಿ ವ್ಯಕ್ತಿಯೊಬ್ಬರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಆತ್ಮಹತ್ಯೆ ಮಾಡಿಕೊಳ್ಳುವ ಮೊದಲು ಮಖಾನ್ ದಿನ್ ವಿಡಿಯೋ ರೆಕಾರ್ಡ್ ಮಾಡಿದ್ದು ತಾನು ಮುಗ್ಧನೆಂದು ಹೇಳಿಕೊಂಡಿದ್ದು, ಭಯೋತ್ಪಾದಕರೊಂದಿಗೆ ತನಗೆ ಯಾವುದೇ ಸಂಪರ್ಕ ಇಲ್ಲ ಎಂದು ಹೇಳಿದ್ದಾರೆ.

ಈ ವಿಡಿಯೋ ಎಲ್ಲೆಡೆ ವೈರಲ್ ಆಗಿದ್ದು, ಮೃತನ ಕುಟುಂಬದವರ ಆರೋಪದ ಹಿನ್ನೆಲೆಯಲ್ಲಿ ಪೊಲೀಸರು ಮತ್ತು ಸ್ಥಳೀಯ ಆಡಳಿತ ಈ ಬಗ್ಗೆ ಪ್ರತ್ಯೇಕ ತನಿಖೆ ನಡೆಸಲು ಮುಂದಾಗಿವೆ.

ಪಾಕ್ ಭಯೋತ್ಪಾದಕ ಸ್ವರ್ ದಿನ್ ಅಲಿಯಾಸ್ ಸ್ವರು ಗುಜ್ಜರ್ ಅವರ ಸೋದರಳಿಯ ಮಖಾನ್ ದಿನ್, ಜುಲೈ 2024 ರಲ್ಲಿ ಬದ್ನೋಟ್ಟಾ ಸೇನಾ ಬೆಂಗಾವಲು ದಾಳಿಯಲ್ಲಿ ನಾಲ್ವರು ಸೇನಾ ಯೋಧರನ್ನು ಹತ್ಯೆಗೆ ಕಾರಣವಾದ ಗುಂಪಿನೊಂದಿಗೆ ಸಂಬಂಧ ಹೊಂದಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ಬಟೋಡಿ ಗ್ರಾಮದ 26 ವರ್ಷದ ಮಖಾನ್ ದಿನ್, ಉಗ್ರಗಾಮಿಗಳ ಪಾತ್ರದ ಆರೋಪ ಎದುರಿಸುತ್ತಿದ್ದ. ಬಿಲ್ಲಾವರ್ ಪ್ರದೇಶದಲ್ಲಿ ಸ್ಥಳೀಯ ಪೊಲೀಸರಿಂದ ಕಿರುಕುಳವನ್ನು ಎದುರಿಸಿದ ನಂತರ ವಿಷ ಸೇವಿಸಿದ್ದಾರೆ ಎಂದು ವರದಿಯಾಗಿದೆ.

ಮಖಾನ್ ದಿನ್ ಮತ್ತು ಅವರ ತಂದೆ ಇಬ್ಬರನ್ನೂ ಸ್ಥಳೀಯ ಪೊಲೀಸರು ಬಂಧಿಸಿ ಉಗ್ರರ ಬಗ್ಗೆ ಮಾಹಿತಿ ಪಡೆಯಲು ಚಿತ್ರಹಿಂಸೆ ನೀಡಿದ್ದಾರೆ, ಇದು ಅವರನ್ನು ಆತ್ಮಹತ್ಯೆಗೆ ದೂಡಿದೆ ಎಂದು ಅವರ ಕುಟುಂಬ ಸದಸ್ಯರು ಆರೋಪಿಸಿದ್ದಾರೆ.

"ಕುಟುಂಬಕ್ಕೆ ನ್ಯಾಯ ಸಿಗುವವರೆಗೂ ಶವವನ್ನು ತೆಗೆಯುವುದಿಲ್ಲ. ನಾನು ಅವರ ಜೊತೆ ನಿಲ್ಲುತ್ತೇನೆ. ನಾನು ಅವರನ್ನು ಮರಳಿ ತರಲು ಸಾಧ್ಯವಿಲ್ಲ, ಆದರೆ ನ್ಯಾಯ ಸಿಗುವವರೆಗೂ ನಾನು ಹೋರಾಡುತ್ತೇನೆ" ಎಂದು ಶಾಸಕ ಬನಿ ಡಾ. ರಾಮೇಶ್ವರ ಸಿಂಗ್ ಸುದ್ದಿಗಾರರಿಗೆ ತಿಳಿಸಿದ್ದರು. ಆದಾಗ್ಯೂ, ಮೃತನ ಅಂತ್ಯಸಂಸ್ಕಾರ ನಡೆಸಲಾಗಿದೆ.

"ಮಖಾನ್ ದಿನ್ ಪಾಕ್ ನಿಂದ ಹೊರಹಾಕಲ್ಪಟ್ಟ ಭಯೋತ್ಪಾದಕ ಸ್ವರ್ ದಿನ್ ಅಲಿಯಾಸ್ ಸ್ವರು ಗುಜ್ಜರ್ ಅವರ ಸೋದರಳಿಯ. ಜುಲೈ 2024 ರಲ್ಲಿ 4 ಸೇನಾ ಯೋಧರು ಹುತಾತ್ಮರಾದ ಬದ್ನೋಟ್ಟಾ ಸೇನಾ ಕಾನ್ವಾಯ್ ದಾಳಿಯನ್ನು ನಡೆಸಿದ ಅದೇ ಗುಂಪಿನಲ್ಲಿ ಅವರು ಸಹಾಯ ಮಾಡುತ್ತಿದ್ದಾರೆ. ಕೊಹಾಗ್ ಕಾರ್ಯಾಚರಣೆಯಲ್ಲಿ ಹೆಡ್ ಕಾನ್‌ಸ್ಟೆಬಲ್ ಬಶೀರ್ ಅವರ ಹತ್ಯೆ ಮತ್ತು ಹುತಾತ್ಮತೆಗೆ ಕಾರಣವಾದ ಅದೇ ಗುಂಪು ಇದು" ಎಂದು ಪೊಲೀಸರು ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

"ಮಖಾನ್ ದಿನ್ ಪಾಕಿಸ್ತಾನ ಮತ್ತು ಇತರ ವಿದೇಶಗಳಲ್ಲಿ ಹಲವಾರು ಅನುಮಾನಾಸ್ಪದ ಸಂಪರ್ಕಗಳನ್ನು ಹೊಂದಿದ್ದರು. ಯಾವುದೇ ಕಸ್ಟಡಿ ಚಿತ್ರಹಿಂಸೆ ಅಥವಾ ಗಾಯವಾಗಿರಲಿಲ್ಲ. ಅವರನ್ನು ಪ್ರಶ್ನಿಸಲಾಯಿತು, ನಂತರ ಮನೆಗೆ ಬಿಡುಗಡೆ ಮಾಡಲಾಯಿತು, ನಂತರ ಆತ್ಮಹತ್ಯೆ ಮಾಡಿಕೊಂಡರು" ಎಂದು ಪೊಲೀಸರು ಹೇಳಿದ್ದಾರೆ. ಹಲವಾರು ಪೊಲೀಸ್ ಅಧಿಕಾರಿಗಳು ಕುಟುಂಬ ಸದಸ್ಯರನ್ನು ಭೇಟಿ ಮಾಡಿದ್ದಾರೆ ಮತ್ತು ಈ ವಿಷಯದ ಬಗ್ಗೆ ನ್ಯಾಯಯುತ ತನಿಖೆಯ ಭರವಸೆ ನೀಡಿದ್ದಾರೆ ಎಂದು ಅವರು ಹೇಳಿದರು.

ಕಥುವಾ ಜಿಲ್ಲಾ ಮ್ಯಾಜಿಸ್ಟ್ರೇಟ್ ಕೂಡ ಮಖನ್ ದಿನ್ ಸಾವಿನ ತನಿಖೆಗೆ ಆದೇಶಿಸಿದ್ದು, ಐದು ದಿನಗಳಲ್ಲಿ ವಿವರವಾದ ವರದಿಯನ್ನು ಸಲ್ಲಿಸುವಂತೆ ಲೋಹೈ ಮಲ್ಹಾರ್ ತಹಶೀಲ್ದಾರ್ ಅನಿಲ್ ಕುಮಾರ್ ಅವರಿಗೆ ನಿರ್ದೇಶನ ನೀಡಿದ್ದಾರೆ.