ನವದೆಹಲಿ: ಮಾಜಿ ಕೇಂದ್ರ ಸಚಿವ ಹಾಗೂ ಹಿರಿಯ ಕಾಂಗ್ರೆಸ್ ನಾಯಕ ಮಣಿಶಂಕರ್ ಅಯ್ಯರ್ ಅವರು ಶುಕ್ರವಾರ ದೆಹಲಿಯ ಜಂತರ್ ಮಂತರ್ನಲ್ಲಿ ನಡೆಯುತ್ತಿರುವ ವಿದ್ಯಾರ್ಥಿಗಳ ಪ್ರತಿಭಟನೆಯಲ್ಲಿ ಪಾಲ್ಗೊಂಡರು ಮತ್ತು ಈ ಚಳುವಳಿಯನ್ನು 'ಐತಿಹಾಸಿಕ' ಎಂದು ಬಣ್ಣಿಸಿದರು. ಸರ್ಕಾರದೊಂದಿಗಿನ ಮಾತುಕತೆಯು ಸಕಾರಾತ್ಮಕ ಫಲಿತಾಂಶಕ್ಕೆ ದಾರಿ ಮಾಡಿಕೊಡಲಿದೆ ಎಂಬ ಆಶಯ ವ್ಯಕ್ತಪಡಿಸಿದರು.
ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, 'ಇದೊಂದು ಐತಿಹಾಸಿಕ ಕ್ಷಣ. ನಾವೂ ಇಲ್ಲಿದ್ದೇವೆ. ಈ ಇತಿಹಾಸದ ಭಾಗವಾಗಬೇಕೆಂದು ನಾವು ಭಾವಿಸಿದ್ದೇವೆ'. ಕಾಕ್ರೋಚ್ ಜನತಾ ಪಕ್ಷ (ಸಿಜೆಪಿ) ನಿಯೋಗದ ಸಭೆಯನ್ನು ಉಲ್ಲೇಖಿಸಿ, ಅನುಭವಿ ನಾಯಕ ಮಾತುಕತೆಗಳನ್ನು ಸ್ವಾಗತಿಸಿದರು ಮತ್ತು ಅವು ಫಲಿತಾಂಶಗಳನ್ನು ನೀಡುತ್ತವೆ ಎಂದು ಆಶಿಸುವುದಾಗಿ ಹೇಳಿದರು.
'ಮಾತುಕತೆಗಳು ನಡೆಯುತ್ತಿರುವುದಕ್ಕೆ ನನಗೆ ಸಂತೋಷವಿದೆ. ಅದರಿಂದ ಸಕಾರಾತ್ಮಕ ಫಲಿತಾಂಶ ಸಿಗಲಿದೆ ಎಂದು ನಾನು ಭಾವಿಸುತ್ತೇನೆ. ಇಲ್ಲದಿದ್ದರೆ, ಪ್ರತಿಭಟನೆ ಮುಂದುವರಿಯಲಿದೆ' ಎಂದರು.
ಎಎನ್ಐ ಜೊತೆ ಮಾತನಾಡಿದ ಕಾಂಗ್ರೆಸ್ ನಾಯಕ, 'ನಾನು ಇಲ್ಲಿ ಕಲಿಯಲು ಬಂದಿದ್ದೇನೆ. ವಿದ್ಯಾರ್ಥಿಗಳು ನಮಗೆ ನಿರ್ಭಯವಾಗಿರಲು ಕಲಿಸುತ್ತಿದ್ದಾರೆ. ಹಿಂದೆ ನಾವು ಮೋದಿ ಮತ್ತು ಶಾ ಅವರನ್ನು ಕಂಡು ಭಯಪಡುತ್ತಿದ್ದೆವು' ಎಂದು ಹೇಳಿದರು.
'ನಾವು ಉಮರ್ ಖಾಲಿದ್ ಮತ್ತು ಶಾರ್ಜೀಲ್ ಇಮಾಮ್ ಅವರ ಪ್ರಕರಣವನ್ನು ನೋಡಿದ್ದೇವೆ. ಅವರು ಇನ್ನೂ ಜೈಲಿನಲ್ಲಿದ್ದಾರೆ. ಆದರೆ, ನ್ಯಾಯಾಲಯದಲ್ಲಿ ಪ್ರಕರಣವನ್ನು ಸಾಬೀತುಪಡಿಸುವಲ್ಲಿ ಸರ್ಕಾರ ವಿಫಲವಾಗಿದೆ. ಆಗ ನಾನು ಧ್ವನಿ ಎತ್ತಲು ಪ್ರಯತ್ನಿಸಿದೆ, ಆದರೆ ನನಗೆ ಭಯವಿತ್ತು. ನೀವು ನಿರ್ಭೀತರು ಮತ್ತು ದೇಶವೂ ನಿರ್ಭೀತವಾಗಿರಬೇಕು' ಎಂದು ಅವರು ಹೇಳಿದರು.
ಭಾರತದ ಮೊದಲ ಪ್ರಧಾನಿ ಜವಾಹರಲಾಲ್ ನೆಹರು ಅವರ ಉದಾಹರಣೆಯನ್ನು ನೀಡುತ್ತಾ, 'ಮಹಾತ್ಮ ಗಾಂಧಿಯವರು ನಮಗೆ ಕಲಿಸಿದ್ದು ನಿರ್ಭೀತಿಯಿಂದ ಇರುವುದನ್ನು ಎಂದು ನೆಹರು ತಮ್ಮ ಆತ್ಮಕಥೆಯಲ್ಲಿ ಬರೆದಿದ್ದಾರೆ. ಸರ್ವಾಧಿಕಾರದ ವಿರುದ್ಧ ನಾವು ನಿಲ್ಲಬೇಕೆಂದು ನೀವು ನಮಗೆ ಭರವಸೆ ನೀಡಿದ್ದೀರಿ' ಎಂದು ಅವರು ಹೇಳಿದರು.
ಹಿರಿಯ ಕಾಂಗ್ರೆಸ್ ನಾಯಕರ ಪತ್ನಿ ಸುನೀತಾ ಮಣಿ ಅಯ್ಯರ್ ಕೂಡ ಜಂತರ್ ಮಂತರ್ನಲ್ಲಿ ನಡೆದ ಪ್ರತಿಭಟನೆಯಲ್ಲಿ ಅವರೊಂದಿಗೆ ಪಾಲ್ಗೊಂಡಿದ್ದರು. ಪ್ರತಿಭಟನಾನಿರತ ವಿದ್ಯಾರ್ಥಿಗಳ ವಿರುದ್ಧ ಪೊಲೀಸರು ಕೈಗೊಂಡ ಕ್ರಮವನ್ನು ಅವರು ಖಂಡಿಸಿದರು ಹಾಗೂ ಶಾಂತಿಯುತ ಮಾತುಕತೆಗೆ ಕರೆ ನೀಡಿದರು.
'ಮಕ್ಕಳು, ವಿದ್ಯಾರ್ಥಿಗಳು, ಕಾರ್ಮಿಕರು, ರೈತರು ಅಥವಾ ಇನ್ನಾರೇ ಆಗಿರಲಿ, ಯಾರಿಂದಲೂ ಕಲ್ಲು ತೂರಾಟ ನಡೆಯಬಾರದು. ಯಾವುದೇ ಹಿಂಸಾಚಾರಕ್ಕೆ ಆಸ್ಪದವಿರಬಾರದು. ಇದೊಂದು ಶಾಂತಿಯುತ ಪ್ರತಿಭಟನೆ. ಜನರ ಧ್ವನಿಯನ್ನು ಆಲಿಸಲು ಮತ್ತು ಅದಕ್ಕೆ ನಮ್ಮ ಧ್ವನಿಯನ್ನೂ ಸೇರಿಸಲು ನಾವು ಇಲ್ಲಿಗೆ ಬಂದಿದ್ದೇವೆ' ಎಂದು ಹೇಳಿದರು.
ಸಿಜೆಪಿ (CJP) ಸದಸ್ಯರು ಮತ್ತು ಕೇಂದ್ರ ಸಚಿವರ ನಡುವಿನ ಮಾತುಕತೆಯನ್ನು ಸ್ವಾಗತಿಸಿದ ಅವರು, 'ಮಾತುಕತೆ ನಡೆಸುವುದು ಒಳ್ಳೆಯದು. ಸಮಸ್ಯೆಗಳನ್ನು ಕಲ್ಲು ಅಥವಾ ಲಾಠಿಗಳಿಂದಲ್ಲ, ಬದಲಾಗಿ ಸಂವಾದದ ಮೂಲಕ ಬಗೆಹರಿಸಿಕೊಳ್ಳಬಹುದು' ಎಂದು ಹೇಳಿದರು.
