1 ರೂಪಾಯಿಗೆ ಶೂ ಆಫರ್: ಅಂಗಡಿ ಮುಂದೆ ಭಾರೀ ಜನದಟ್ಟಣೆ, ಪೊಲೀಸರಿಂದ ಲಾಠಿಚಾರ್ಜ್-Video

ಕೋಝಿಕ್ಕೋಡ್: ಇಲ್ಲಿನ ಒಂದು ಪಾದರಕ್ಷೆ ಅಂಗಡಿ ಕೇವಲ 1 ರೂಪಾಯಿಗೆ ಪ್ರೀಮಿಯಂ ಶೂಗಳನ್ನು ನೀಡುವುದಾಗಿ ಘೋಷಿಸಿ ನಡೆಸಿದ ಪ್ರಚಾರ ಅಭಿಯಾನ ಇಂದು ಭಾನುವಾರ ಬೆಳಗ್ಗೆ ಭಾರೀ ಜನಸಂದಣಿಗೆ ಕಾರಣವಾಗಿ ಜನರನ್ನು ನಿಯಂತ್ರಿಸಲು ಪೊಲೀಸರು ಲಾಠಿಚಾರ್ಜ್ ನಡೆಸಬೇಕಾಯಿತು.

ವೈರಲ್ ಜಾಹೀರಾತುಗಳಿಂದ ಆಕರ್ಷಿತರಾದ ನೂರಾರು ಗ್ರಾಹಕರು ಮುಂಜಾನೆ ಅಂಗಡಿ ಮುಂದೆ ಜಮಾಯಿಸಿದರು. ಇದರಿಂದ ಒಬ್ಬರಿಗೊಬ್ಬರು ತುಳಿದುಕೊಳ್ಳುವ ಪರಿಸ್ಥಿತಿ ಉಂಟಾಗಿ, ಸಂಚಾರವೂ ಅಸ್ತವ್ಯಸ್ತವಾಯಿತು.

ಅಂಗಡಿ ಮೊದಲ 100 ಗ್ರಾಹಕರಿಗೆ ಹಳೆಯ 1 ರೂಪಾಯಿ ನೋಟು ತೋರಿಸಿದರೆ ಶೂ ನೀಡುವುದಾಗಿ ಜಾಹೀರಾತು ನೀಡಿದ್ದರಿಂದ ಜನರು ರಾತ್ರಿ 2 ಗಂಟೆಗೇ ಬಂದು ಕ್ಯೂ ನಿಂತಿದ್ದರು.

ಜನರ ಸಂಖ್ಯೆ ಅಂಗಡಿಯ ಸಾಮರ್ಥ್ಯವನ್ನು ಮೀರಿದ್ದು, ವಯನಾಡ್ ಸೇರಿದಂತೆ ವಿವಿಧ ಜಿಲ್ಲೆಗಳಿಂದ ಜನರು, ಮಕ್ಕಳ ಸಹಿತ, ಇಲ್ಲಿ ಬಂದಿದ್ದರು.

ವಯನಾಡ್‌ನೊಬ್ಬ ಬಾಲಕ, ತಾನು ಮಧ್ಯರಾತ್ರಿ 2.30ರಲ್ಲೇ ಅಂಗಡಿಗೆ ತಲುಪಿದ್ದರೂ ಆಗಲೇ ಭಾರೀ ಜನಸಮೂಹ ಕಾಯುತ್ತಿತ್ತು ಎಂದು ಹೇಳುತ್ತಾನೆ.

ಭಾರೀ ಸಂಖ್ಯೆಯಲ್ಲಿ ಜನರು ಬಂದ ಪರಿಣಾಮ ಪ್ರದೇಶದಲ್ಲಿ ಗದ್ದಲ ಉಂಟಾಗಿ, ಸಂಚಾರ ಸಂಪೂರ್ಣವಾಗಿ ಸ್ಥಗಿತಗೊಂಡಿತು. ಪರಿಸ್ಥಿತಿ ನಿಯಂತ್ರಣ ತಪ್ಪುತ್ತಿದ್ದಂತೆ ಪೊಲೀಸರು ಮಧ್ಯಪ್ರವೇಶಿಸಿದರು. ತುಳಿತಕ್ಕೊಳಗಾಗುವ ಪರಿಸ್ಥಿತಿ ತಪ್ಪಿಸಲು ಅವರು ಸಣ್ಣ ಮಟ್ಟಿನ ಲಾಠಿಚಾರ್ಜ್ ನಡೆಸಿದರು.

ಈ ಗದ್ದಲದ ನಂತರ, ಪ್ರದೇಶದಲ್ಲಿ ಉದ್ವಿಗ್ನತೆ ಉಂಟಾದ ಹಿನ್ನೆಲೆಯಲ್ಲಿ ಅಂಗಡಿ ಮಾಲೀಕರನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.