ಸ್ಪರ್ಧೆ ವೇಳೆ ಪ್ರಜ್ಞಾಹೀನರಾಗಿ ಈಜುಕೊಳದ ತಳಭಾಗಕ್ಕೆ ಮುಳುಗಿದ ಅನಿತಾ ಅಲ್ವರೇಜ್ ಅವರನ್ನು ಅವರ ತಂಡದ ಕೋಚ್ ರಕ್ಷಿಸಿದ್ದಾರೆ.
ಬುಡಾಪೆಸ್ಟ್‌ ನಲ್ಲಿ ನಡೆಯುತ್ತಿರುವ ವಿಶ್ವ ಈಜು ಚಾಂಪಿಯನ್‌ಷಿಪ್‌ನ ಆರ್ಟಿಸ್ಟಿಕ್‌ ಸ್ಪರ್ಧೆಯ ವೈಯಕ್ತಿಕ ವಿಭಾಗದಲ್ಲಿ ಅನಿತಾ ಅಲ್ವರೇಜ್ ಪ್ರದರ್ಶನ ನೀಡುತ್ತಿದ್ದಾಗಲೇ ಪ್ರಜ್ಞೆ ಕಳೆದುಕೊಂಡಿದ್ದಾರೆ.
ಈ ವೇಳೆ ಅನಿತಾಗೆ ಏನೋ ಅನಾಹುತ ಆಗಿದೆ ಎಂಬುದನ್ನು ಅರಿತ ಅಮೆರಿಕ ಮಹಿಳಾ ತಂಡದ ಮುಖ್ಯ ಕೋಚ್ ಆಂಡ್ರಿಯಾ ಫುಯೆಂಟಸ್, ತಕ್ಷಣವೇ ನೀರಿಗೆ ಧುಮುಕಿ ಅಲ್ವರೇಜ್ ಅವರನ್ನು ಮೇಲಕ್ಕೆತ್ತಿದ್ದಾರೆ. ತಂಡದ ಇತರ ಸಿಬ್ಬಂದಿ ಕೂಡಾ ನೆರವಿಗೆ ಬಂದಿದ್ದಾರೆ.
ಈಜುಕೊಳದ ಬಳಿಯಿದ್ದ ಲೈಫ್‌ಗಾರ್ಡ್‌ಗಳು ಗರಬಡಿದವರಂತೆ ನಿಂತಿದ್ದರೇ ಹೊರತು, ಕೂಡಲೇ ರಕ್ಷಣೆಗೆ ಮುಂದಾಗಲಿಲ್ಲ. ಆದ್ದರಿಂದ ನಾನೇ ನೀರಿಗೆ ಧುಮುಕಿದೆ ಎಂದು ಫುಯೆಂಟಸ್ ಹೇಳಿದ್ದಾರೆ.
ಅನಿತಾ ಅವರ ಆರೋಗ್ಯ ತಪಾಸಣೆ ಮಾಡಲಾಗಿದ್ದು, ಯಾವುದೇ ಅಪಾಯವಿಲ್ಲ ಎಂದು ವೈದ್ಯರು ತಿಳಿಸಿದ್ದಾರೆ.
