ರಾಜಕೀಯ ಇನ್ನಿಂಗ್ಸ್ ಆರಂಭಿಸಿದ ದೇವೇಗೌಡ ಸೊಸೆ ಭವಾನಿ ರೇವಣ್ಣ

ಹಾಸನ: ಜಿಲ್ಲಾ ಪಂಚಾಯತ್  ಚುನಾವಣೆಯಲ್ಲಿ ಸ್ಪರ್ಧಿಸಿ ಭರ್ಜರಿ ಗೆಲುವಿನೊಂದಿಗೆ ಮಾಜಿ ಪ್ರಧಾನಿ ಎಚ್.ಡಿ ದೇವೇಗೌಡ ಅವರ ಸೊಸೆ ಹಾಗೂ ಮಾಜಿ ಸಚಿವ ಎಚ್.ಡಿ ರೇವಣ್ಣ ಅವರ ಪತ್ನಿ ಭವಾನಿ ರೇವಣ್ಣ ತಮ್ಮ ರಾಜಕೀಯ ಜೀವನ ಆರಂಭಿಸಿದ್ದಾರೆ. ಹೀಗಾಗಿ ದೇವೇಗೌಡರ ಕುಟುಂಬದ ಮತ್ತೊಬ್ಬ ಸದಸ್ಯೆ ರಾಜಕೀಯಕ್ಕೆ ಎಂಟ್ರಿ ನೀಡಿದ್ದಾರೆ.

ಹಾಸನದ ಜೆಡಿಎಸ್ ಭದ್ರಕೋಟೆ ಎನಿಸಿದ್ದ ಹಳೇಕೋಟೆ ಜಿಲ್ಲಾ ಪಂಚಾಯತ್ ಕ್ಷೇತ್ರದಲ್ಲಿ ತಮ್ಮ ಪ್ರತಿಸ್ಪರ್ಧಿ ಕೆ.ಆರ್.ಸುನೀಲ್‌ಕುಮಾರ್ ವಿರುದ್ಧ 4648 ಮತಗಳ ಅಂತರದಿಂದ ಗೆಲುವು ಸಾಧಿಸಿದ್ದಾರೆ. ಭವಾನಿ ರೇವಣ್ಣ 12,232 ಮತ ಪಡೆದರೆ, ಕಾಂಗ್ರೆಸ್‌ನ ಕೆ.ಆರ್. ಸುನೀಲ್‌ಕುಮಾರ್ 7,534, ಬಿಜೆಪಿ ಕೆ.ನಾರಾಯಣ್‌ಗೌಡ 720 ಮತಗಳನ್ನು ಪಡೆದಿದ್ದಾರೆ.

ನೀವು ನಾಮಪತ್ರ ಸಲ್ಲಿಸಿ, ಗೆಲ್ಲಿಸುವ ಜವಾಬ್ದಾರಿ ನಮ್ಮದು ಎಂದಿದ್ದರು ಹಳೇಕೋಟೆ ಭಾಗದ ಜನರು. ಈ ಭಾಗದಲ್ಲಿ ರೇವಣ್ಣ ಸಾಕಷ್ಟು ಅಭಿವೃದ್ಧಿ ಕಾರ್ಯ ಮಾಡಿದ್ದಾರೆ. ಹೀಗಾಗಿ ಜನರಿಟ್ಟ ನಂಬಿಕೆಯೇ ನನ್ನ ಗೆಲುವಿಗೆ ಕಾರಣ ಎಂದು ಭವಾನಿ ರೇವಣ್ಣ ಹೇಳಿದ್ದಾರೆ.

ಚುನಾವಣೆಯ ದೃಷ್ಟಿಯಿಂದ ನಾನ್ಯಾವ ಆಮೀಷ ಕೊಟ್ಟಿಲ್ಲ. ಜನರ ವಿಶ್ವಾಸದ ಮುಂದೆ ಪ್ರತಿಪಕ್ಷದವರ ತಂತ್ರ, ಕುತಂತ್ರ ನಡೆಯಲಿಲ್ಲ, ಅದೇ ನನಗೆ ಶ್ರೀರಕ್ಷೆಯಾಗಿದೆ ಎಂದು ಭವಾನಿ ಸಂತಸ ಹಂಚಿಕೊಂಡರು.