ಸಚಿವ ಸಂಪುಟ ವಿಸ್ತರಣೆ: ಕಾಂಗ್ರೆಸ್ ಗೆ ಮತ್ತೊಂದು ಸುತ್ತಿನ ತಲೆನೋವು; ಬಂಡಾಯ ಶಾಸಕರಿಗೆ ಬಂಪರ್ ಚಾನ್ಸ್!

ಸಚಿವ ಸಂಪುಟಕ್ಕೆ 6 ಹೊಸ ಸಚಿವರ ಸೇರ್ಪಡೆಯಾಗಲಿದ್ದು, ಈಗಾಗಲೇ ಬಂಡಾಯ, ಭಿನ್ನಮತ, ಗುಂಪುಗಾರಿಕೆಯಿಂದ ಜರ್ಜರಿತಗೊಂಡಿರುವ ಕಾಂಗ್ರೆಸ್ ಪಕ್ಷ ತನ್ನ ಪಕ್ಷದಿಂದ ಸಚಿವ ಸಂಪುಟಕ್ಕೆ ಆಯ್ಕೆ ಮಾಡುವ ಶಾಸಕರ ಬಗ್ಗೆ ಎಚ್ಚರಿಕೆಯ ಹೆಜ್ಜೆ ಇಡಲು ಮುಂದಾಗಿದೆ. ಸಾಮಾನ್ಯವಾಗಿ ಸಚಿವ ಸಂಪುಟ ವಿಸ್ತರಣೆಗೆ ಶಾಸಕರನ್ನು ಆಯ್ಕೆ ಮಾಡುವ ಸೂತ್ರಗಳಿಗಿಂತಲೂ ಈ ಬಾರಿ ಕಾಂಗ್ರೆಸ್ ಭಿನ್ನವಾಗಿ ಯೋಚನೆ ಮಾಡುತ್ತಿದ್ದು, ಭಿನ್ನಮತೀಯರಿಗೆ ಚಾನ್ಸ್ ನೀಡಲು ಚಿಂತನೆ ನಡೆಸುತ್ತಿದೆ. 

ಕಾಂಗ್ರೆಸ್ ಗೆ ಇನ್ನೂ 6 ಸಚಿವರನ್ನು ನೇಮಕ ಮಾಡಿ 20 ನಿಗಮ ಮಂಡಳಿಗಳಿಗೆ ಆಗುವಷ್ಟು ಸ್ಥಾನಗಳಿದ್ದು, ಇದನ್ನು ಬಂಡಾಯ ಶಮನಕ್ಕೆ ಸೂಕ್ತವಾಗಿ ಉಪಯೋಗಿಸಿಕೊಳ್ಳುವುದಕ್ಕೆ ಕಾಂಗ್ರೆಸ್ ಯೋಜನೆ ಸಿದ್ಧಪಡಿಸಿದೆ.  ಕಾಂಗ್ರೆಸ್ ನ ಈ ನಡೆ ಶಾಸಕರಾದ ಎಂಬಿ ಪಾಟೀಲ್, ರಾಮಲಿಂಗಾರೆಡ್ಡಿ, ರೋಷನ್ ಬೇಗ್ ಮುಂದಾತ ಭಿನ್ನಮತೀಯ ಶಾಸಕರಿಗೆ ಸಿಹಿ ಸುದ್ದಿಯಂತಾಗಿದೆ. 

ಎಲ್ಲರನ್ನೂ ಸಂತುಷ್ಟಗೊಳಿಸುವುದು ಅಸಾಧ್ಯ, ಆದರೆ ಪ್ರಭಾವಿಗಳನ್ನು ಅತೃಪ್ತರಾಗದಂತೆ ತಡೆಯುವುದೇ ಕಾಂಗ್ರೆಸ್ ಪಕ್ಷದ ಗುರಿ ಎಂದು ಹಿರಿಯ ಕಾಂಗ್ರೆಸ್ ನಾಯಕರೊಬ್ಬರು ಹೇಳಿದ್ದಾರೆ. ಈ ಹಿನ್ನೆಲೆಯಲ್ಲಿ ಸಚಿವ ಸಂಪುಟ ವಿಸ್ತರಣೆ ಕುತೂಹಲ ಮೂಡಿಸಿದೆ.