ನವದೆಹಲಿ: ಭಾರತದ ಟೆನಿಸ್ ಚೆಲುವೆ ಸಾನಿಯಾ ಮಿರ್ಜಾ ನೂತನ ಡಬ್ಲ್ಯೂಟಿಎ ಡಬಲ್ಸ್ ರ್ಯಾಂಕಿಂಗ್ ಪಟ್ಟಿಯಲ್ಲಿ ಜೀವನಶ್ರೇಷ್ಠ ಐದನೇ ಕ್ರಮಾಂಕವನ್ನು ಸರಿಗಟ್ಟಿದ್ದಾರೆ.
ಸಿಡ್ನಿಯಲ್ಲಿ ನಡೆದ ಡಬ್ಲ್ಯೂಟಿಎ ಅಪಿಯಾ ಇಂಟರ್‌ನ್ಯಾಷನಲ್ ಟೆನಿಸ್ ಟೂರ್ನಿಯಲ್ಲಿ ಅಮೆರಿಕದ ಬೆಥಾನಿ ಮಾಟೆಕ್ ಜೊತೆಗೂಡಿ ಸಾನಿಯಾ ಪ್ರಶಸ್ತಿ ಗೆದ್ದುಕೊಂಡಿದ್ದರು. ಈ ಸಾಧನೆಯ ಹಿನ್ನೆಲೆಯಲ್ಲಿ ಸಾನಿಯಾ ರ್ಯಾಂಕಿಂಗ್ ಪಟ್ಟಿಯಲ್ಲಿ ಏರಿಕೆ ಕಂಡಿದ್ದಾರೆ.ಭಾರತೀಯ ಆಟಗಾರ್ತಿ ಒಟ್ಟು 470 ಅಂಕಗಳನ್ನು ಗಳಿಸುವ ಮೂಲಕ, ಈ ಮುನ್ನ ಐದನೇ ಸ್ಥಾನದಲ್ಲಿದ್ದ ತಮ್ಮದೇ ಡಬಲ್ಸ್ ಜೊತೆಗಾರ್ತಿ ಸೂ-ವೀ ಶೀ ಅವರನ್ನು ಆರನೇ ಸ್ಥಾನಕ್ಕಿಳಿಸಿದ್ದಾರೆ.
ಸೋಮವಾರ ಆರಂಭವಾಗಲಿರುವ ಆಸ್ಟ್ರೇಲಿಯನ್ ಓಪನ್ ಗ್ರ್ಯಾನ್‌ಸ್ಲಾಮ್ ಟೂರ್ನಿಯಲ್ಲಿ ಎರಡನೇ ಶ್ರೇಯಾಂಕದ ಗೌರವದೊಂದಿಗೆ ಸಾನಿಯಾ, ಸೂ-ವೀ ಶೀ ಜೊತೆಗೂಡಿ ಡಬಲ್ಸ್‌ನಲ್ಲಿ ಪ್ರಶಸ್ತಿ ಗೆಲ್ಲುವ ವಿಶ್ವಾಸದೊಂದಿಗೆ ಪಾಲ್ಗೊಳ್ಳಲಿದ್ದಾರೆ. ಮಹಿಳೆಯರ ಡಬಲ್ಸ್‌ನ ತಮ್ಮ ಮೊದಲ ಸುತ್ತನ ಪಂದ್ಯದಲ್ಲಿ ಸಾನಿಯಾ-ಸೂ ಅವರಿಗೆ ಅರ್ಜೆಂಟೀನಾದ ಮಾರಿಯಾ ಇರಿಗೊಯೆನ್ ಮ್ತತು ಸ್ವಿಸ್‌ನ ರೊಮೆನಿಯಾ ಓಪ್ರಾಂಡಿ ಅವರ ಸವಾಲು ಎದುರಾಗಲಿದೆ.
ಸಿಡ್ನಿಯಲ್ಲಿ ಪ್ರಶಸ್ತಿ ಗೆದ್ದುಕೊಳ್ಳುವ ಮೂಲಕ ಹೊಸ ಋತುವನ್ನು ಉತ್ತಮವಾಗಿ ಆರಂಭಿಸಿರುವ ಸಾನಿಯಾ, ಆಸ್ಟ್ರೇಲಿಯನ್ ಓಪನ್‌ನಲ್ಲಿ ಉತ್ತಮ ಪ್ರದರ್ಶನ ನೀಡುವುದರ ಜತೆಗೆ ರ್ಯಾಂಕಿಂಗ್‌ನಲ್ಲಿ ನಂಬರ್ ಒನ್ ಸ್ಥಾನದ ತಮ್ಮ ಗುರಿ ಈಡೇರಿಕೆಗೆ ತುದಿಗಾಲಲ್ಲಿ ನಿಂತಿದ್ದಾರೆ. ಇಟಲಿಯ ಸಾರಾ ಎರಾನಿ ರ್ಯಾಂಕಿಂಗ್ ಪಟ್ಟಿಯಲ್ಲಿ ಅಗ್ರ ಕ್ರಮಾಂಕದಲ್ಲಿದ್ದಾರೆ. ಇದೇ ದೇಶದ ರಾಬರ್ಟಾ ವಿನ್ನಿ ಎರಡನೇ, ಚೀನಾದ ಶಾಯಿ ಪೆಂಗ್ ಮೂರನೇ ಮತ್ತು ಜಿಂಬಾಬ್ವೆಯ ಕಾರಾ ಬ್ಲ್ಯಾಕ್ ನಾಲ್ಕನೇ ಕ್ರಮಾಂಕದಲ್ಲಿದ್ದಾರೆ.
