ಯೋಗದಿಂದ ಅತ್ಯಾಚಾರ ಪ್ರಕರಣಗಳಿಗೆ ಕಡಿವಾಣ: ಮುರಳಿ ಮನೋಹರ ಜೋಷಿ

ನವದೆಹಲಿ: ಯೋಗ ಪ್ರತಿ ಸಾಮಾನ್ಯ ಮನುಷ್ಯನ ಜೀವನದ ಭಾಗವಾದರೆ, ಅದು ದೇಶದಲ್ಲಿ ರೇಪ್ ಪ್ರಕರಣ ಸಂಖ್ಯೆಗಳನ್ನು ಕಡಿತಗೊಳಿಸಲು ನೆರವಾಗುತ್ತದೆ ಎಂದು ಭಾನುವಾರ ಬಿಜೆಪಿ ಪಕ್ಷದ ಹಿರಿಯ ನಾಯಕ ಮುರಳಿ ಮನೋಹರ್ ಜೋಷಿ ಹೇಳಿದ್ದಾರೆ,

ಮುಸ್ಲಿಮರು ದಿನಕ್ಕೆ ಐದು ಬಾರಿ ಯೋಗ ಮಾಡುತ್ತಾರೆ ಮತ್ತು ಪ್ರವಾದಿ ಮಹಮದ್ ಅತಿ ದೊಡ್ಡ ಯೋಗಿ ಎಂದು ವಿವಾದ ಸೃಷ್ಟಿಸಬಲ್ಲ ಹೇಳಿಕೆಗಳನ್ನು ಕೂಡ ನೀಡಿದ್ದಾರೆ.

ದೆಹಲಿಯಲ್ಲಿ "ಹೊಸ ಯುಗಕ್ಕೆ ಅಯ್ಯಂಗಾರ್ ಅವರ ಯೋಗ ಮಾರ್ಗ" ಎಂಬ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ನ್ಯೂಯಾರ್ಕ್ ನಲ್ಲಿ ಮಹರ್ಷಿ ಮಹೇಶ್ ಯೋಗಿ ನಡೆಸಿದ ಧ್ಯಾನ ಪ್ರಯೋಗದ ಬಗ್ಗೆ ಉದಾಹರಿಸಿದ ಜೋಷಿ, ಅಲ್ಲಿನ ವಿಶ್ವವಿದ್ಯಾಲಯದ ಉಪಕುಲಪತಿಗಳೊಬ್ಬರು ನಡೆಸಿದ ಅಧ್ಯಯನದ ಪ್ರಕಾರ ನ್ಯೂಯಾರ್ಕ್ ನಲ್ಲಿ ಜೈಲುವಾಸಿಗಳು ಯೋಗ ಮಾಡಿದ ನಂತರ ಅಪರಾಧಗಳ ಸಂಖ್ಯೆ ಕಡಿಮೆಯಾಗಿತ್ತಂತೆ ಎಂದಿದ್ದಾರೆ,

"ನಮ್ಮ ಮುಸ್ಲಿಂ ಬಾಂಧವರು ದಿನಕ್ಕೆ ಐದು ಬಾರಿ ಯೋಗ ಮಾಡುತ್ತಾರೆ. ಆ ನಮಾಜ್ ಮಾಡುವ ಭಂಗಿಗಳು... ಆದುದರಿಂದಲೆ ನನಗನ್ನಿಸುತ್ತದೆ ಪ್ರವಾದಿ ಮೊಹಮ್ಮದ್ ಅವರು ಅತಿ ದೊಡ್ಡ ಯೋಗಿಯಾಗಿದ್ದರು" ಎಂದಿದ್ದಾರೆ.