ಮೊದಲ ಟ್ರೆಕ್ಕಿಂಗ್ ಅನುಭವಕ್ಕೆ ಪರ್ಫೆಕ್ಟ್ ಕರ್ನಾಟಕದ ಈ ಟಾಪ್ 5 ಸ್ಥಳಗಳು..!

ಇಂದಿನ ವೇಗದ ಜೀವನಶೈಲಿಯಲ್ಲಿ ನಾವು ಬಹುತೇಕ ಸಮಯವನ್ನು ನಗರಗಳ ಗದ್ದಲ, ಟ್ರಾಫಿಕ್‌ ಮತ್ತು ಡಿಜಿಟಲ್ ಪರದೆಗಳ ನಡುವೆ ಕಳೆಯುತ್ತೇವೆ. ಕೆಲಸದ ಒತ್ತಡ, ನಿರಂತರ ಓಡಾಟ ಮತ್ತು ದಿನನಿತ್ಯದ ಜಂಜಾಟಗಳು ಮನಸ್ಸನ್ನು ಅಶಾಂತಿಗೊಳಿಸುತ್ತದೆ. ಇಂತಹ ಸಂದರ್ಭಗಳಲ್ಲಿ, ಸ್ವಲ್ಪ ಸಮಯ ಪ್ರಕೃತಿಯ ಮಡಿಲಲ್ಲಿ ಕಳೆಯುವುದು ನಮ್ಮ ದೇಹ–ಮನಸ್ಸಿಗೆ ಪುನರುಜ್ಜೀವನಕ್ಕೆ ಅತ್ಯುತ್ತಮ ಮಾರ್ಗವಾಗಿದೆ.

ಟ್ರೆಕ್ಕಿಂಗ್‌ ಎಂದಾಕ್ಷಣ ಹಲವರು ಕಠಿಣ ಪರ್ವತಾರೋಹಣ, ದೂರ ಮತ್ತು ಹೆಚ್ಚಿನ ಶ್ರಮ ಬೇಕು ಎಂಬ ಭಾವನೆಗಳನ್ನು ಹೊಂದಿರುತ್ತಾರೆ. ಆದರೆ, ನಿಜವಾಗಿ ನೋಡಿದರೆ, ಟ್ರೆಕ್ಕಿಂಗ್‌ ಅಂದ್ರೆ ಕೇವಲ ಶಿಖರ ತಲುಪುವುದಷ್ಟೇ ಅಲ್ಲ – ಅದು ಒಂದು ಅನುಭವ. ಹಾದಿಯಲ್ಲಿರುವ ಹಸಿರು ಕಾಡುಗಳು, ತಂಪಾದ ಗಾಳಿ, ಪಕ್ಷಿಗಳ ಕೂಗು, ಸೌಂದರ್ಯ ಇವೆಲ್ಲವೂ ನಮ್ಮ ಮನಸ್ಸನ್ನು ಹಗುರಗೊಳಿಸುತ್ತವೆ.

ಅದಕ್ಕಾಗಿ ಕಠಿಣ ಪ್ರದೇಶಗಳಲ್ಲಿ ಟ್ರೆಕ್ಕಿಂಗ್ ಮಾಡಬೇಕೆಂಬ ಅವಶ್ಯಕತೆ ಇಲ್ಲ. ಆರಂಭಿಕರಿಗೂ, ಕುಟುಂಬಗಳಿಗೂ, ಸಮಯದ ಅಭಾವ ಇರುವವರಿಗೂ ಸೂಕ್ತವಾಗುವ ಸುಲಭವಾಗಿ ಹೋಗಬಹುದಾದ ಟ್ರೆಕ್ಕಿಂಗ್ ಪ್ರದೇಶಗಳು ಕರ್ನಾಟಕದಲ್ಲಿ ಬಹಳಷ್ಟಿವೆ.

ಕಡಿಮೆ ದೂರ, ಸ್ಪಷ್ಟವಾದ ಹಾದಿಗಳು ಮತ್ತು ಸುಂದರ ಪ್ರಕೃತಿಯಿರುವ ಪ್ರದೇಶಗಳು ನಿಮಗೆ ಸುರಕ್ಷಿತ ಹಾಗೂ ಸ್ಮರಣೀಯ ಅನುಭವವನ್ನು ಕೊಡುತ್ತವೆ.

ವಿಶೇಷವಾಗಿ ಬೆಂಗಳೂರಿನ ಸುತ್ತಮುತ್ತ ಇರುವ ಅನೇಕ ಟ್ರೆಕ್ಕಿಂಗ್ ಪ್ರದೇಶಗಳು ವಾರಾಂತ್ಯದ ಸಣ್ಣ ಪ್ರವಾಸಕ್ಕೆ ಸೂಕ್ತವಾಗಿವೆ. ಕೆಲವೆಡೆ ಸೂರ್ಯೋದಯದ ಅದ್ಭುತ ದೃಶ್ಯಗಳು, ಇನ್ನೂ ಕೆಲವೆಡೆ ಹಸಿರು ಕಾಡುಗಳು ಅಥವಾ ರಹಸ್ಯ ಗುಹೆಗಳು ನಿಮ್ಮನ್ನು ಆಕರ್ಷಿಸುತ್ತವೆ. ಅಷ್ಟೇ ಅಲ್ಲ, ಇಂತಹ ಟ್ರೆಕ್‌ಗಳು ದೈಹಿಕ ಆರೋಗ್ಯಕ್ಕೂ ಸಹಕಾರಿಯಾಗಿದೆ, ನಡೆದು ಹೋಗುವ ಮೂಲಕ ವ್ಯಾಯಾಮವೂ ಆಗುತ್ತದೆ, ಮನಸ್ಸು ಶಾಂತವಾಗುತ್ತದೆ.

ಹೀಗಾಗಿ, ನೀವು ಟ್ರೆಕ್ಕಿಂಗ್‌ ಪ್ರಪಂಚಕ್ಕೆ ಹೊಸದಾಗಿ ಕಾಲಿಡಲು ಯೋಚಿಸುತ್ತಿದ್ದರೆ ಅಥವಾ ಕೇವಲ ಪ್ರಕೃತಿಯ ಜೊತೆ ಕೆಲವು ಕ್ಷಣಗಳನ್ನು ಕಳೆಯಲು ಬಯಸುತ್ತಿದ್ದರೆ, ಈ ಟ್ರೆಕ್ಕಿಂಗ್ ಪ್ರದೇಶಗಳು ನಿಮ್ಮ ಪ್ರಯಾಣಕ್ಕೆ ಪರಿಪೂರ್ಣ ಆರಂಭವಾಗಬಹುದು.

ನಂದಿ ಬೆಟ್ಟ ರಾಜ್ಯದ ಅತ್ಯಂತ ಪ್ರಸಿದ್ಧ ಮತ್ತು ಸುಲಭ ಟ್ರೆಕ್ಕಿಂಗ್ ತಾಣಗಳಲ್ಲಿ ಒಂದಾಗಿದ್ದು, ಪ್ರಕೃತಿ ಸೌಂದರ್ಯ, ಇತಿಹಾಸ ಮತ್ತು ಶಾಂತ ವಾತಾವರಣವನ್ನು ಒಂದೇ ಜಾಗದಲ್ಲಿ ಅನುಭವಿಸಲು ಅವಕಾಶ ನೀಡುತ್ತದೆ. ಬೆಂಗಳೂರಿನ ಹತ್ತಿರದಲ್ಲಿರುವುದರಿಂದ ವಾರಾಂತ್ಯದಲ್ಲಿ ಕಡಿಮೆ ಸಮಯದಲ್ಲೇ ಭೇಟಿ ನೀಡಬಹುದಾದ ಅತ್ಯುತ್ತಮ ಸ್ಥಳವೆಂದು ಇದು ಗುರುತಿಸಿಕೊಂಡಿದೆ.

ಟ್ರೆಕ್ಕಿಂಗ್ ಆರಂಭಿಸುವವರಿಗೆ ನಂದಿ ಬೆಟ್ಟದ ಬಹಳ ಸೂಕ್ತ ಸ್ಥಳವಾಗಿದೆ, ಏಕೆಂದರೆ ಇಲ್ಲಿ ಹಾದಿ ಸುಗಮವಾಗಿದ್ದು ಹೆಚ್ಚು ದಣಿವಾಗುವ ಅನುಭವವಾಗುವುದಿಲ್ಲ. ಹಾದಿಯುದ್ದಕ್ಕೂ ತಂಪಾದ ಗಾಳಿ, ಹಸಿರು ಮರಗಳು ಮತ್ತು ಪ್ರಕೃತಿಯ ಮೌನ ನಿಮ್ಮ ಮನಸ್ಸಿಗೆ ವಿಶ್ರಾಂತಿ ನೀಡುತ್ತದೆ. ನೈಸರ್ಗಿಕ ವಾತಾವರಣದಲ್ಲಿ ಸಮಯ ಕಳೆಯಲು ಉತ್ತಮ ಅವಕಾಶವನ್ನು ಒದಗಿಸುತ್ತದೆ.

ಈ ಬೆಟ್ಟದ ಪ್ರಮುಖ ಆಕರ್ಷಣೆಗಳಲ್ಲಿ ಸೂರ್ಯೋದಯ ಅತ್ಯಂತ ವಿಶಿಷ್ಟವಾದುದು. ಬೆಳಗಿನ ಜಾವ ಮೋಡಗಳ ಮಧ್ಯೆ ನಿಧಾನವಾಗಿ ಬರುವ ಸೂರ್ಯನ ಕಿರಣಗಳು, ಸಂಪೂರ್ಣ ಬೆಟ್ಟವನ್ನು ಚಿನ್ನದ ಬಣ್ಣದಲ್ಲಿ ಮುಳುಗಿಸುವ ದೃಶ್ಯ ಮನಸೂರೆಗೊಳ್ಳುತ್ತದೆ. ಈ ದೃಶ್ಯವನ್ನು ನೋಡುವುದಕ್ಕಾಗಿ ಅನೇಕರು ಬೆಳಿಗ್ಗೆ ಬೇಗನೆ ಇಲ್ಲಿ ಆಗಮಿಸುತ್ತಾರೆ. ಫೋಟೋಗ್ರಫಿ ಪ್ರಿಯರಿಗೆ ಇದು ಒಂದು ಸ್ವರ್ಗವೇ ಸರಿ.

ನಂದಿ ಬೆಟ್ಟದ ಮತ್ತೊಂದು ವಿಶೇಷವೆಂದರೆ ಇಲ್ಲಿ ಇರುವ ಶಾಂತ ವಾತಾವರಣ. ನಗರ ಗದ್ದಲದಿಂದ ದೂರವಾಗಿ ಕೆಲವು ಗಂಟೆಗಳ ಕಾಲ ಇಲ್ಲಿ ಕಳೆದರೆ ಮನಸ್ಸು ಸಂಪೂರ್ಣ ಹಸನಾಗುತ್ತದೆ. ಸ್ನೇಹಿತರ ಜೊತೆ, ಕುಟುಂಬದೊಂದಿಗೆ ಅಥವಾ ಒಬ್ಬರೇ ಬಂದರೂ ಈ ಸ್ಥಳವು ನಿಮಗೆ ವಿಭಿನ್ನ ಅನುಭವ ನೀಡುತ್ತದೆ. ಆದರೆ, ವಾರಾಂತ್ಯಗಳಲ್ಲಿ ಜನಸಂದಣಿ ಹೆಚ್ಚು ಇರುವುದರಿಂದ ಬೆಳಿಗ್ಗೆ ಬೇಗನೆ ತೆರಳುವುದು ಉತ್ತಮ. ಹವಾಮಾನ ಸಾಮಾನ್ಯವಾಗಿ ತಂಪಾಗಿರುವುದರಿಂದ ಲಘು ಜಾಕೆಟ್ ತೆಗೆದುಕೊಂಡು ಹೋಗುವುದು ಸಹ ಉಪಯುಕ್ತ.

ಹಂಡಿ ಗುಂಡಿ ಬೆಟ್ಟವು ಕರ್ನಾಟಕದ ಅತಿ ಸುಂದರವಾದ ಮತ್ತು ಇನ್ನೂ ಹೆಚ್ಚಿನ ಜನರಿಗೆ ಪರಿಚಯವಾಗದ ಟ್ರೆಕ್ಕಿಂಗ್ ಸ್ಥಳಗಳಲ್ಲಿ ಒಂದಾಗಿದೆ. ಇದು ಚಿಕ್ಕಮಗಳೂರು ಜಿಲ್ಲೆಯಲ್ಲಿದ್ದು, ಪಶ್ಚಿಮಘಟ್ಟಗಳ ಮಡಿಲಲ್ಲಿ ನೆಲೆಸಿರುವ ಈ ಬೆಟ್ಟ ಪ್ರಕೃತಿ ಸೌಂದರ್ಯದಿಂದ ತುಂಬಿಕೊಂಡಿದೆ. ಹಸಿರು ಕಾಡುಗಳು, ತಣ್ಣನೆಯ ಗಾಳಿ, ಮಂಜಿನ ಹೊದಿಕೆ ಮತ್ತು ಸುತ್ತಮುತ್ತಲಿನ ಶಾಂತ ವಾತಾವರಣ ಈ ಪ್ರದೇಶಕ್ಕೆ ವಿಶೇಷ ಆಕರ್ಷಣೆಯಾಗಿದೆ. ಕುದುರೆ ಮುಖ ರಾಷ್ಟ್ರೀಯ ಉದ್ಯಾನವನ ಸಮೀಪದಲ್ಲಿರುವುದರಿಂದ ಇಲ್ಲಿ ಜೀವ ವೈವಿಧ್ಯತೆ ಕೂಡ ಸಮೃದ್ಧವಾಗಿದೆ.

ಇಲ್ಲಿನ ಟ್ರೆಕ್ಕಿಂಗ್ ತುಂಬಾ ಕಠಿಣವಲ್ಲದಿದ್ದರೂ ಸಹ ಸಣ್ಣ ಮಟ್ಟಿನ ಸಾಹಸವನ್ನು ನೀಡುತ್ತದೆ. ಹಾದಿಯು ಕಾಡಿನ ಒಳಗೆ ಸಾಗುತ್ತದೆ, ಕೆಲವೆಡೆ ಕಲ್ಲಿನ ದಾರಿಗಳು, ಕೆಲವೆಡೆ ಮಣ್ಣುಮಾರ್ಗಗಳು ಮತ್ತು ಕೆಲವೆಡೆ ಜಾರುವ ಭಾಗಗಳು ಇರುವುದರಿಂದ ಪ್ರಯಾಣ ರೋಚಕವಾಗಿರುತ್ತದೆ. ಮಳೆಯ ಕಾಲದಲ್ಲಿ ದಾರಿಯಲ್ಲೇ ಸಣ್ಣ ಹರಿವುಗಳು ಮತ್ತು ಜಲಪಾತಗಳು ಕಾಣಿಸಿಕೊಳ್ಳುತ್ತವೆ, ಇದರಿಂದ ಟ್ರೆಕ್ಕಿಂಗ್ ಇನ್ನಷ್ಟು ಸುಂದರವಾಗುತ್ತದೆ. ಹಾದಿಯಲ್ಲಿ ಪಕ್ಷಿಗಳ ಕೂಗು, ಮತ್ತು ತಂಪಾದ ಗಾಳಿ ಮನಸ್ಸಿಗೆ ಶಾಂತಿ ನೀಡುತ್ತದೆ.

ಬೆಟ್ಟದ ಮೇಲ್ಭಾಗ ತಲುಪಿದಾಗ ಕಾಣಿಸುವ ದೃಶ್ಯವು ಅತ್ಯಂತ ಮನಮೋಹಕ. ಹಸಿರು ಬೆಟ್ಟಗಳ ಸರಪಳಿ, ದೂರದವರೆಗೆ ಹರಡಿಕೊಂಡಿರುವ ಕಾಡುಗಳು ಮತ್ತು ಕೆಲವೊಮ್ಮೆ ಮೋಡಗಳ ನಡುವೆ ಕಾಣಿಸಿಕೊಳ್ಳುವ ಸೂರ್ಯಕಿರಣಗಳು ಮನಸ್ಸನ್ನು ಹರ್ಷಗೊಳಿಸುತ್ತವೆ. ಈ ಸ್ಥಳವು ಫೋಟೋಗ್ರಫಿ ಪ್ರಿಯರಿಗೆ ಅತ್ಯುತ್ತಮವಾಗಿದ್ದು, ಬೆಳಗಿನ ಹೊತ್ತಿನಲ್ಲಿ ಅಥವಾ ಸೂರ್ಯಾಸ್ತದ ಸಮಯದಲ್ಲಿ ದೃಶ್ಯಗಳು ವಿಶೇಷವಾಗಿ ಆಕರ್ಷಕವಾಗಿರುತ್ತವೆ. ಹಂಡಿ ಗುಂಡಿ ಬೆಟ್ಟಕ್ಕೆ ತಲುಪಲು ಸಾಮಾನ್ಯವಾಗಿ ಕಳಸ ಅಥವಾ ಚಿಕ್ಕಮಗಳೂರು ನಗರದಿಂದ ಪ್ರಯಾಣ ಆರಂಭಿಸಲಾಗುತ್ತದೆ. ರಸ್ತೆ ಮಾರ್ಗದಲ್ಲಿ ಬೆಟ್ಟದವರೆಗೆ ಹೋಗಿ ಅಲ್ಲಿಂದ ಟ್ರೆಕ್ಕಿಂಗ್ ಪ್ರಾರಂಭಿಸಬಹುದು. ಸಾರ್ವಜನಿಕ ಸಾರಿಗೆ ಸೀಮಿತವಾಗಿರುವುದರಿಂದ ಸ್ವಂತ ವಾಹನ ಅಥವಾ ಕ್ಯಾಬ್ ಬಳಸುವುದು ಉತ್ತಮ. ಈ ಸ್ಥಳವು ಹೆಚ್ಚು ಜನಸಂದಣಿ ಇಲ್ಲದ ಕಾರಣ, ಶಾಂತವಾಗಿ ಪ್ರಕೃತಿಯ ಮಧ್ಯೆ ಸಮಯ ಕಳೆಯಲು ಬಯಸುವವರಿಗೆ ಇದು ಉತ್ತಮ ಆಯ್ಕೆಯಾಗಿದೆ. ವಾರಾಂತ್ಯದಲ್ಲಿ ನಗರ ಗದ್ದಲದಿಂದ ದೂರವಾಗಿ ಮನಸ್ಸಿಗೆ ವಿಶ್ರಾಂತಿ ನೀಡಲು ಹಂಡಿ ಗುಂಡಿ ಬೆಟ್ಟವು ಸೂಕ್ತವಾದ ಸ್ಥಳವಾಗಿದೆ.

ಅಂತರಗಂಗೆ ಕರ್ನಾಟಕದ ಕೋಲಾರ ಜಿಲ್ಲೆಯಲ್ಲಿ ಇರುವ ಅತ್ಯಂತ ಜನಪ್ರಿಯ ಮತ್ತು ವಿಶಿಷ್ಟ ಟ್ರೆಕ್ಕಿಂಗ್ ತಾಣಗಳಲ್ಲಿ ಒಂದಾಗಿದೆ. ಇದು ಪರ್ವತಾರೋಹಣದ ಜೊತೆಗೆ ಗುಹೆ ಅನ್ವೇಷಣೆಯ ಅನುಭವವನ್ನು ನೀಡುವುದರಿಂದ ಆರಂಭಿಕರು ಮತ್ತು ಸಾಹಸಪ್ರಿಯರು ಇಬ್ಬರಿಗೂ ಇಷ್ಟವಾಗುತ್ತದೆ. ಅಂತರಗಂಗೆ ಟ್ರೆಕ್‌ನ ಆರಂಭದಲ್ಲಿ ಒಂದು ಪುರಾತನ ಶಿವಾಲಯ (ದೇವಸ್ಥಾನ) ಇದೆ. ಇಲ್ಲಿ ತಲುಪಲು ಮೆಟ್ಟಿಲುಗಳ ಹಾದಿ ಇದೆ, ಈ ಮೆಟ್ಟಿಸುದಶನ್ನು ಸುಲಭವಾದಿ ಏರಬಹುದಾಗಿದೆ.

ಇಲ್ಲಿನ ಟ್ರೆಕ್ಕಿಂಗ್'ನ ಪ್ರಮುಖ ಆಕರ್ಷಣೆ ಎಂದರೆ ಶಿಲೆಗಳ ನಡುವೆ ಇರುವ ಗುಹೆಗಳು. ಈ ಗುಹೆಗಳೊಳಗೆ ನೀರು ಹರಿದು ಬರುತ್ತಿರುವುದರಿಂದ ಇದನ್ನು “ದಕ್ಷಿಣದ ಕುಂಭಮೇಳದ ಗುಹೆ” ಎಂದೂ ಕೆಲವರು ಕರೆಯುತ್ತಾರೆ. ಸಾಹಸವನ್ನು ಇಷ್ಟಪಡುವವರಿಗೆ ಇದು ತುಂಬಾ ರೋಚಕ ಅನುಭವವನ್ನು ನೀಡುತ್ತದೆ. ಬೆಂಗಳೂರುನಿಂದ ಅಂತರಗಂಗೆ ಸುಮಾರು 70–80 ಕಿಮೀ ದೂರದಲ್ಲಿದೆ, ಆದ್ದರಿಂದ ಒಂದು ದಿನದ ಪ್ರವಾಸಕ್ಕೆ ಇದು ಅತ್ಯುತ್ತಮ ಆಯ್ಕೆಯಾಗಿದೆ. ಇಲ್ಲಿ ಟ್ರೆಕ್ಕಿಂಗ್ ಬೆಳಗ್ಗೆ ಆರಂಭಿಸಿದರೆ ಮಧ್ಯಾಹ್ನದೊಳಗೆ ಮುಗಿಸಿ ಹಿಂತಿರುಗಬಹುದು.

ಮಕಲಿದುರ್ಗವು ಕರ್ನಾಟಕದ ಅತ್ಯಂತ ಜನಪ್ರಿಯ ಟ್ರೆಕ್ಕಿಂಗ್ ಸ್ಥಳಗಳಲ್ಲಿ ಒಂದಾಗಿದೆ. ಇದು ಬೆಂಗಳೂರು ಸಮೀಪದಲ್ಲಿದ್ದು, ವಿಶೇಷವಾಗಿ ವಾರಾಂತ್ಯ ಪ್ರವಾಸಕ್ಕೆ ಸಾಕಷ್ಟು ಜನರು ಭೇಟಿ ನೀಡುವ ಸ್ಥಳವಾಗಿದೆ. ಈ ಬೆಟ್ಟದ ಮೇಲೆ ಇರುವ ಮಕಲಿದುರ್ಗ ಕೋಟೆ ಇತಿಹಾಸದ ದೃಷ್ಟಿಯಿಂದ ಮಹತ್ವ ಹೊಂದಿದ್ದು, ಹಳೆಯ ಕಾಲದ ರಕ್ಷಣಾತ್ಮಕ ಕೋಟೆಯ ಅವಶೇಷಗಳನ್ನೂ ಇಂದಿಗೂ ಕೂಡ ಇಲ್ಲಿ ಕಾಣಬಹುದು. ಬೆಟ್ಟದ ಸುತ್ತಲೂ ಹರಡಿರುವ ಕಲ್ಲಿನ ಹಾದಿಗಳು, ದಟ್ಟವಾದ ಕಾಡು ಸಾಹಸಪ್ರಿಯರನ್ನು ತುಂಬಾ ಆಕರ್ಷಿಸುತ್ತದೆ.

ಮಕಲಿದುರ್ಗ ಟ್ರೆಕ್ ಸಾಮಾನ್ಯವಾಗಿ ಮಧ್ಯಮ ಮಟ್ಟದ ಕಠಿಣತೆಯದ್ದಾಗಿದ್ದು, ಮೊದಲ ಬಾರಿಗೆ ಟ್ರೆಕ್ಕಿಂಗ್ ತೆರಳುವವರೂ ಕೂಡ ತಮ್ಮ ಗುರಿ ಸಾಧಿಸಬಹುದು. ಟ್ರೆಕ್ಕಿಂಗ್ ಆರಂಭವು ರೈಲ್ವೆ ಹಾದಿಯ ಸಮೀಪದಿಂದಲೇ ಪ್ರಾರಂಭವಾಗುತ್ತದೆ, ಇದು ಒಂದು ವಿಶೇಷ ಅನುಭವವನ್ನು ನೀಡುತ್ತದೆ. ಕೆಲವೊಮ್ಮೆ ಹಾದಿಯ ಪಕ್ಕದಲ್ಲೇ ರೈಲು ಹಾದು ಹೋಗುವುದನ್ನು ನೋಡಬಹುದು, ಇದು ಟ್ರೆಕ್ಕಿಂಗ್ ವೇಳೆ ರೋಮಾಂಚನವನ್ನು ನೀಡುತ್ತದೆ. ಮೇಲಕ್ಕೆ ಏರಿದಂತೆ ಸುತ್ತಲಿನ ಕಲ್ಲುಬೆಟ್ಟಗಳು, ಹಸಿರು ಕಾಡುಗಳು ಮತ್ತು ದೂರದ ಹಳ್ಳಿಗಳ ನೋಟಗಳು ಮನಮೋಹಕವಾಗಿರುತ್ತವೆ.

ಬೆಟ್ಟದ ಮೇಲ್ಭಾಗ ತಲುಪಿದಾಗ ಸಂಪೂರ್ಣ ಪ್ರದೇಶವನ್ನು ವೀಕ್ಷಿಸಬಹುದಾದ ವಿಶಾಲ ದೃಶ್ಯ ಕಾಣಿಸುತ್ತದೆ. ತಂಪಾಗಿ ಬೀಸುವ ಗಾಳಿ, ಶಾಂತವಾದ ವಾತಾವರಣ ಮನಸ್ಸಿಗೆ ವಿಶ್ರಾಂತಿ ನೀಡುತ್ತದೆ. ಸೂರ್ಯೋದಯ ಮತ್ತು ಸೂರ್ಯಾಸ್ತದ ಸಮಯದಲ್ಲಿ ಇಲ್ಲಿ ಕಾಣುವ ದೃಶ್ಯಗಳು ಅತ್ಯಂತ ಅದ್ಭುತವಾಗಿದ್ದು, ಫೋಟೋಗ್ರಫಿ ಮತ್ತು ಪ್ರಕೃತಿ ಪ್ರಿಯರಿಗೆ ಇದು ಅತ್ಯುತ್ತಮ ಸ್ಥಳವಾಗಿದೆ. ಮಳೆಗಾಲದ ಸಮಯದಲ್ಲಿ ಸುತ್ತಮುತ್ತ ಹಸಿರು ಹೆಚ್ಚಾಗಿ, ಮೋಡಗಳು ಬೆಟ್ಟವನ್ನು ಆವರಿಸುವ ದೃಶ್ಯ ಮನಸೆಳೆಯುತ್ತದೆ.

ಬೆಂಗಳೂರು ನಗರದಿಂದ ಸುಮಾರು ಕೆಲವೇ ಗಂಟೆಗಳ ಪ್ರಯಾಣದ ಅಂತರದಲ್ಲಿರುವುದರಿಂದ, ಮಕಲಿದುರ್ಗವು ನಗರ ಜೀವನದ ಗದ್ದಲದಿಂದ ದೂರವಾಗಿ ಒಂದು ದಿನದ ಸಾಹಸ ಹಾಗೂ ವಿಶ್ರಾಂತಿಗೆ ಸೂಕ್ತವಾದ ಸ್ಥಳವಾಗಿದೆ. ಸ್ವಂತ ವಾಹನ ಅಥವಾ ರೈಲಿನ ಮೂಲಕ ಸುಲಭವಾಗಿ ತಲುಪಬಹುದಾದ ಈ ಸ್ಥಳವು ಪ್ರಕೃತಿ, ಇತಿಹಾಸ ಮತ್ತು ಸಾಹಸವನ್ನು ಒಂದೇ ಕಡೆ ಅನುಭವಿಸಲು ಅವಕಾಶ ನೀಡುತ್ತದೆ.

ತುರಹಳ್ಳಿ ಅರಣ್ಯವು ಬೆಂಗಳೂರು ನಗರಕ್ಕೆ ಅತ್ಯಂತ ಹತ್ತಿರದಲ್ಲಿರುವ ಅಪರೂಪದ ಪ್ರದೇಶಗಳಲ್ಲಿ ಒಂದಾಗಿದೆ. ಇದು ಬೆಂಗಳೂರು ದಕ್ಷಿಣ ಭಾಗದಲ್ಲಿ ನೆಲೆಸಿದ್ದು, ನಗರ ಗದ್ದಲದ ಮಧ್ಯೆಯೇ ಇದ್ದರೂ ಸಹ ಶಾಂತವಾದ ಅರಣ್ಯ ಅನುಭವವನ್ನು ನೀಡುತ್ತದೆ.

ತುರಹಳ್ಳಿ ಅರಣ್ಯವು ಕಡಿಮೆ ಎತ್ತರದ ಗುಡ್ಡಗಳು ಮತ್ತು ದಟ್ಟವಾದ ಗಿಡಮರಗಳಿಂದ ಕೂಡಿದೆ. ಸಣ್ಣ ಟ್ರೆಕ್ಕಿಂಗ್ ಮಾಡುವವರಿಗೆ ಉತ್ತಮ ಪ್ರದೇಶವಾಗಿದ್ದು, ಸೈಕ್ಲಿಂಗ್, ಜಾಗಿಂಗ್ ಮತ್ತು ರಾಕ್ ಕ್ಲೈಂಬಿಂಗ್ ಇಷ್ಟಪಡುವವರಿಗೆ ಕೂಡ ಇದು ಉತ್ತಮ ಸ್ಥಳವಾಗಿದೆ. ಹಾದಿಯಲ್ಲಿ ಸಾಗುವಾಗ ಹಕ್ಕಿಗಳ ಕೂಗು, ಗಾಳಿ ಬೀಸುವ ಶಬ್ದ ಮತ್ತು ಮರಗಳ ನಡುವೆ ಕಂಡು ಬರುವ ಬೆಳಕು ಮನಸ್ಸಿಗೆ ತುಂಬಾ ಶಾಂತಿ ನೀಡುತ್ತದೆ.

ಈ ಅರಣ್ಯ ಪ್ರದೇಶವು ನಗರದಲ್ಲಿಯೇ ಇದ್ದರೂ ಸಹ, ಸಾಕಷ್ಟು ಜೀವ ವೈವಿಧ್ಯತೆಯನ್ನು ಹೊಂದಿದೆ. ಹಲವಾರು ಬಗೆಯ ಪಕ್ಷಿಗಳು, ಪ್ರಾಣಿಗಳು ಮತ್ತು ಸ್ಥಳೀಯ ಸಸ್ಯಸಂಪತ್ತನ್ನು ಇಲ್ಲಿ ಕಾಣಬಹುದು. ಮಳೆಗಾಲದ ನಂತರ ಈ ಪ್ರದೇಶವು ಹಸಿರಿನಿಂದ ತುಂಬಿ, ಬೆಟ್ಟಗಳ ಮೇಲೆ ನೀರು ಹರಿಯುವ ದೃಶ್ಯವು ಆಕರ್ಷಕವಾಗಿರುತ್ತದೆ.

ತುರಹಳ್ಳಿ ಅರಣ್ಯವು ಪ್ರಕೃತಿ ಪ್ರಿಯರಿಗೆ ಮಾತ್ರವಲ್ಲದೆ, ಫಿಟ್‌ನೆಸ್ ಮತ್ತು ಔಟ್‌ಡೋರ್ ಚಟುವಟಿಕೆಗಳನ್ನು ಇಷ್ಟಪಡುವವರಿಗೆ ಕೂಡ ಒಂದು ಉತ್ತಮ ತಾಣವಾಗಿದೆ. ನಗರದಿಂದ ದೂರ ಹೋಗದೆ ಪ್ರಕೃತಿಯ ಅನುಭವ ಪಡೆಯಲು ಇದು ಉತ್ತಮ ಆಯ್ಕೆಯಾಗಿದ್ದು, ವಾರಾಂತ್ಯದಲ್ಲಿ ಚಿಕ್ಕ ಬ್ರೇಕ್ ತೆಗೆದುಕೊಳ್ಳಲು ಅನೇಕರು ಇಲ್ಲಿ ಭೇಟಿ ನೀಡುತ್ತಾರೆ. ಇದು ಬೆಂಗಳೂರು ನಗರದಲ್ಲಿರುವ ಅತ್ಯಂತ ಸುಲಭವಾಗಿ ತಲುಪಬಹುದಾದ ಅತ್ಯುತ್ತಮ ಸ್ಥಳಗಳಲ್ಲಿ ಒಂದಾಗಿದೆ.

ಈ ಟ್ರೆಕ್ಕಿಂಗ್ ಪ್ರದೇಶಗಳನ್ನು ಕೇವಲ ಪ್ರವಾಸ ಮಾತ್ರವಲ್ಲ, ಒಂದು ರೀತಿಯ ಮನಸ್ಸಿನ ಪುನರ್ಜನ್ಮದಂತೆ ಅನುಭವ ನೀಡುತ್ತವೆ. ನಗರ ಜೀವನದಿಂದ ಸ್ವಲ್ಪ ವಿರಾಮ ತೆಗೆದುಕೊಳ್ಳಲು ಬಯಸುವವರಿಗೆ ಟ್ರೆಕ್ಕಿಂಗ್ ಅತ್ಯುತ್ತಮ ಆಯ್ಕೆಯಾಗಿದ್ದು, ಅತಿ ದೂರ ಪ್ರಯಾಣವಿಲ್ಲದೆ, ಕಡಿಮೆ ವೆಚ್ಚದಲ್ಲಿ ಮತ್ತು ಕಡಿಮೆ ತಯಾರಿಯಲ್ಲಿ ಸಹ ಪ್ರಕೃತಿಯ ಮಧ್ಯದಲ್ಲಿ ಶಾಂತಿ ಮತ್ತು ಆನಂದವನ್ನು ಅನುಭವಿಸಬಹುದು. ಇದು ಕೇವಲ ದೈಹಿಕ ಚಟುವಟಿಕೆ ಮಾತ್ರವಲ್ಲ, ಮನಸ್ಸಿಗೆ ಶಾಂತಿ ನೀಡುವ ಒಂದು ಸುಂದರ ಪ್ರಯಾಣವೂ ಹೌದು.