ಮನೊಕವಾರಿ(ಇಂಡೋನೇಷ್ಯಾ): ಇಂಡೋನೇಷ್ಯಾದ ಪೂರ್ವದಲ್ಲಿರುವ ಪಶ್ಚಿಮ ಪಪುವಾ ಪ್ರಾಂತ್ಯದಲ್ಲಿ ಪ್ರಬಲ ಭೂಕಂಪ ಸಂಭವಿಸಿದ್ದು, ಕನಿಷ್ಠ 60 ಜನರು ಗಾಯಗೊಂಡಿದ್ದಾರೆ.
ಶುಕ್ರವಾರ ಬೆಳಗ್ಗೆ 1 ಗಂಟೆ ಸುಮಾರಿಗೆ 6.6ರಷ್ಟು ತೀವ್ರತೆಯಲ್ಲಿ ಭೂಮಿ ಕಂಪಿಸಿದ್ದು ಆತಂಕಗೊಂಡ ಜನರು ಕಟ್ಟಡ, ಮನೆ, ಹೋಟೆಲ್‌ ಸೇರಿದಂತೆ ಆಸ್ಪತ್ರೆಗಳಿಂದಲೂ ಹೊರಗೆ ಓಡಿ ಬಂದ ಘಟನೆಗಳು ವರದಿಯಾಗಿದೆ. ಭೂಕಂಪನದಿಂದಾಗಿ 200 ಮನೆಗಳು ಹಾನಿಗೊಳಗಾಗಿವೆ.
ಪಶ್ವಿಮ ಪಪುವಾ ಪ್ರಾಂತ್ಯದ ಸೊರೊಂಗ್‌ ಪಟ್ಟಣದಿಂದ 28 ಕಿಲೋ ಮೀಟರ್ ದೂರದಲ್ಲಿ ಹಾಗೂ ಭೂಮೇಲೈನಿಂದ 24 ಕಿಲೋ ಮೀಟರ್ ಆಳದಲ್ಲಿ ಕಂಪನದ ಕೇಂದ್ರವಿತ್ತು ಎಂದು ಅಮೆರಿಕದ ಭೂವೈಜ್ಞಾನಿಕ ಸರ್ವೇಕ್ಷಣಾ ಕೇಂದ್ರ ತನ್ನ ವೆಬ್‌ಸೈಟ್‌ನಲ್ಲಿ ತಿಳಿಸಿದೆ.
ಘಟನೆಯ ಹಿನ್ನೆಲೆಯಲ್ಲಿ ಮನೆ ಮಠ ಕಳೆದುಕೊಂಡಿರುವ ನೂರಾರು ಜನರನ್ನು ತಾತ್ಕಾಲಿಕ ಶಿಬಿರಗಳಿಗೆ ಸ್ಥಳಾಂತರಿಸಲಾಗಿದೆ.
