ಇಸ್ರೇಲ್ ನಲ್ಲಿ ಮೋದಿ: ಯಾದ್ ವಶೆಮ್ ಸ್ಮಾರಕಕ್ಕೆ ಭೇಟಿ

ಜೆರುಸಲೇಂ: ಇಸ್ರೇಲ್ ಪ್ರವಾಸ ಕೈಗೊಂಡಿರುವ ಪ್ರಧಾನಿ ನರೇಂದ್ರ ಮೋದಿ, ಇಸ್ರೇಲ್ ಪ್ರಧಾನಿ ನೇತನ್ಯಾಹು ಅವರೊಂದಿಗೆ ಅಲ್ಲಿನ ಯಾದ್ ವಶೆಮ್ ಸ್ಮಾರಕ ಮ್ಯೂಸಿಯಂ ಗೆ ಭೇಟಿ ನೀಡಿದ್ದಾರೆ. 

ಮಾನವ ಇತಿಹಾಸದಲ್ಲೇ ಅತ್ಯಂತ ದೊಡ್ಡ ದುರಂತಗಳಲ್ಲಿ ಒಂದೆಂದು ಪರಿಗಣಿಸಲಾಗುವ ನಾಜಿ ದಬ್ಬಾಳಿಕೆ ಕಾಲದಲ್ಲಿ ನಡೆದಿರುವ ಹತ್ಯಾಕಾಂಡದಲ್ಲಿ ಮಡಿದವರಿಗೆ ಗೌರವ ಸೂಚಕವಾಗಿ ಯಾದ್ ವಶೆಮ್ ಸ್ಮಾರಕ ಮ್ಯೂಸಿಯಂ ನ್ನು ನಿರ್ಮಿಸಲಾಗಿದ್ದು ಪ್ರಧಾನಿ ನರೇಂದ್ರ ಮೋದಿ ಸ್ಮಾರಕಕ್ಕೆ ಭೇಟಿ ನೀಡಿ ಗೌರವ ಸೂಚಿಸಿದ್ದಾರೆ. ಇದಾದ ಬಳಿಕ 1918ರಲ್ಲಿ ಹೈಫಾ ವಿಮೋಚನೆಯ ವೇಳೆ ಬಲಿದಾನಗೈದ ಪರಾಕ್ರಮಿ ಭಾರತೀಯ ಯೋಧರಿಗೆ ಗೌರವ ನಮನ ಸಲ್ಲಿಸಿದ್ದಾರೆ. 

ಪ್ರಧಾನಿ ನರೇಂದ್ರ ಮೋದಿ ಯಾದ್ ವಶೆಮ್ ಸ್ಮಾರಕ ಮ್ಯೂಸಿಯಂ ಗೆ ಭೇಟಿ ನೀಡಿದ ಚಿತ್ರವನ್ನು ವಿದೇಶಾಂಗ ಇಲಾಖೆ ವಕ್ತಾರ ಗೋಪಾಲ್ ಬಾಗ್ಲೆ ಟ್ವೀಟ್ ಮಾಡಿದ್ದಾರೆ. ಯಹೂದಿಗಳ ಹತ್ಯಾಕಾಂಡವನ್ನು ದಾಖಲಿಸುವುದಕ್ಕಾಗಿ ಜೆರುಸಲೇಂ ಬಳಿ 1953 ಯಾದ್ ವಶೆಮ್ ಮೌಂಟ್ ಆಫ್ ರಿಮೆಂಬರೆನ್ಸ್ ಎಂಬ ಸಂಸ್ಥೆ, ಮ್ಯೂಸಿಯಂ ನ್ನು ಪ್ರಾರಂಭಿಸಿದ್ದರು.