ನವದೆಹಲಿ: ನೇಪಾಳದಲ್ಲಿ ಬುಧವಾರ ಸಂಭವಿಸಿದ ಭೀಕರ ಪ್ರವಾಹಕ್ಕೆ ಹಿಮ-ಬಂಡೆ ಕುಸಿತವೇ ಕಾರಣವಾಗಿರಬಹುದು ಎಂಬ ಮಹತ್ವದ ಸುಳಿವು ಉಪಗ್ರಹ ಚಿತ್ರಗಳ ವಿಶ್ಲೇಷಣೆಯಿಂದ ಲಭ್ಯವಾಗಿದೆ ಎಂದು ಮೂಲಗಳು ತಿಳಿಸಿವೆ.
ನೇಪಾಳದ ರಾಷ್ಟ್ರೀಯ ವಿಪತ್ತು ಅಪಾಯ ಕಡಿತ ಮತ್ತು ನಿರ್ವಹಣಾ ಪ್ರಾಧಿಕಾರ (NDRRMA) ಈ ಬಗ್ಗೆ ಚಿತ್ರ ಸಹಿತ ಪೋಸ್ಟ್ ಮಾಡಿದ್ದು, ತನ್ನ ಪೋಸ್ಟ್ನಲ್ಲಿ ಪ್ಲಾನೆಟ್ ಲ್ಯಾಬ್ಸ್ ನಡೆಸಿದ ಪ್ರಾಥಮಿಕ ಉಪಗ್ರಹ ವಿಶ್ಲೇಷಣೆಯನ್ನು ಉಲ್ಲೇಖಿಸಿದೆ.
ಇದರ ಪ್ರಕಾರ, ರಸುವಾ ಗಡಿ ನೇಪಾಳ-ಚೀನಾ ಗಡಿ ದಾಟುವ ಸ್ಥಳದ ಈಶಾನ್ಯ ಭಾಗದಲ್ಲಿ ಸುಮಾರು 20 ಕಿ.ಮೀ ದೂರದಲ್ಲಿ ಹಿಮ ಮತ್ತು ಬಂಡೆಗಳ ಭೂಕುಸಿತ ಸಂಭವಿಸಿದ್ದು, ಇದರಿಂದ ಎಲ್ಹೆಂಡೆ ಖೋಲಾ ನದಿಯಲ್ಲಿ ಅವಶೇಷಗಳಿಂದ ತುಂಬಿದ ಭಾರಿ ಪ್ರವಾಹ ಉಂಟಾಗಿರಬಹುದು ಎಂದು ಹೇಳಲಾಗಿದೆ.
ಹಿಮ-ಬಂಡೆ ಕುಸಿತದಿಂದಲೇ ಪ್ರವಾಹ?
ನೇಪಾಳ-ಚೀನಾ ಗಡಿಯ ಹಿಮನದಿ ಪ್ರದೇಶದ ಸಮೀಪ ಹಿಮ ಮತ್ತು ಬಂಡೆಗಳ ದೊಡ್ಡ ಭಾಗವೊಂದು ಕುಸಿದಿದೆ ಎಂದು ನೇಪಾಳದ ವಿಪತ್ತು ಪ್ರಾಧಿಕಾರ ತಿಳಿಸಿದೆ. ಈ ಹಿಮ-ಬಂಡೆಗಳ ರಾಶಿ ಹಿಮನದಿ ಸರೋವರಕ್ಕೆ ಬಿದ್ದಿರಬಹುದು ಅಥವಾ ನದಿಯ ಹರಿವಿನ ಮಾರ್ಗವನ್ನು ತಡೆದಿರಬಹುದು.
ಬಳಿಕ ಏಕಾಏಕಿ ಉಂಟಾದ ನೀರಿನ ಒತ್ತಡದಿಂದ ಹಿಮದ ತುಂಡುಗಳು, ಕರಗಿದ ನೀರು ಹಾಗೂ ಬಂಡೆ-ಮಣ್ಣಿನ ಅವಶೇಷಗಳು ಭಾರಿ ಪ್ರಮಾಣದಲ್ಲಿ ಕೆಳಕ್ಕೆ ಹರಿದಿವೆ ಎಂದು ಪ್ರಾಥಮಿಕ ವಿಶ್ಲೇಷಣೆ ಸೂಚಿಸಿದೆ.
ಈ ರೀತಿಯ ಪ್ರವಾಹವನ್ನು ‘ಗ್ಲೇಸಿಯರ್-ಇನ್ಕ್ಲೂಸಿವ್ ಫ್ಲಡ್’ ಎಂದು ಕರೆಯಲಾಗುತ್ತಿದ್ದು, ಎಲ್ಹೆಂಡೆ ಖೋಲಾ ಮೂಲಕ ಹರಿದ ಪ್ರವಾಹ ಬಳಿಕ ಭೋಟೆ ಕೋಶಿ ನದಿಯನ್ನು ಸೇರಿದೆ. ಪ್ಲಾನೆಟ್ ಲ್ಯಾಬ್ಸ್ ಬಿಡುಗಡೆ ಮಾಡಿರುವ ಆಗಸ್ಟ್ 25 ಮತ್ತು 26ರ ಉಪಗ್ರಹ ಚಿತ್ರಗಳಲ್ಲಿ ಪ್ರವಾಹಕ್ಕೂ ಮುನ್ನ ಹಾಗೂ ನಂತರದ ಪ್ರದೇಶಗಳಲ್ಲಿನ ಭಾರಿ ಬದಲಾವಣೆಗಳು ಸ್ಪಷ್ಟವಾಗಿ ಗೋಚರಿಸುತ್ತವೆ.
95 ಮಂದಿ ಸಾವು, 108 ಭಾರತೀಯರು ನಾಪತ್ತೆ
ನೇಪಾಳದಲ್ಲಿ ಸಂಭವಿಸಿದ ಈ ವಿನಾಶಕಾರಿ ಪ್ರವಾಹಕ್ಕೆ ಕನಿಷ್ಠ 95 ಮಂದಿ ಮೃತಪಟ್ಟಿದ್ದಾರೆ. 108 ಭಾರತೀಯರು ಸೇರಿದಂತೆ ಇನ್ನೂ ಹಲವರು ನಾಪತ್ತೆಯಾಗಿದ್ದಾರೆ.
ಬುಧವಾರ ಬೆಳಗ್ಗೆ ಸುಮಾರು 9 ಗಂಟೆಗೆ ಭೋಟೆ ಕೋಶಿ ನದಿ ಉಕ್ಕಿ ಹರಿದಿದ್ದು, ಹಲವು ಗ್ರಾಮಗಳು, ರಸ್ತೆಗಳು ಹಾಗೂ ಜಲವಿದ್ಯುತ್ ಯೋಜನೆಗಳಿಗೆ ಭಾರಿ ಹಾನಿಯಾಗಿದೆ. ನೇಪಾಳದ ಅಧಿಕಾರಿಗಳ ಪ್ರಕಾರ, 384 ಪ್ರವಾಸಿಗರು ನಾಪತ್ತೆಯಾಗಿದ್ದಾರೆ. ಇವರಲ್ಲಿ ಭಾರತ, ಅಮೆರಿಕ, ಬ್ರಿಟನ್ ಮತ್ತು ಮಲೇಷ್ಯಾ ಸೇರಿದಂತೆ ವಿವಿಧ ದೇಶಗಳ 291 ಪ್ರವಾಸಿಗರು ಸೇರಿದ್ದಾರೆ.
ನಾಪತ್ತೆಯಾದವರಲ್ಲಿ ಹೆಚ್ಚಿನವರು ಭಾರತೀಯರಾಗಿರುವ ಸಾಧ್ಯತೆ ಇದೆ ಎಂದು ಪ್ರವಾಸೋದ್ಯಮ ಮಂಡಳಿ ಅಧಿಕಾರಿಗಳು ತಿಳಿಸಿದ್ದಾರೆ. ಟಿಬೆಟ್ನ ಪವಿತ್ರ ಕ್ಷೇತ್ರವಾದ ಕೈಲಾಸ ಪರ್ವತಕ್ಕೆ ಯಾತ್ರೆ ತೆರಳಿದ್ದ ಭಾರತೀಯರು ಹಾಗೂ ಭಾರತೀಯ ಮೂಲದ ಯಾತ್ರಿಕರು ಹೆಚ್ಚಿನ ಸಂಖ್ಯೆಯಲ್ಲಿದ್ದ ಸಾಧ್ಯತೆ ಇದೆ ಎನ್ನಲಾಗಿದೆ.
ನೆರವಿಗೆ ಭಾರತ ಸಿದ್ಧ
ನೇಪಾಳದಲ್ಲಿ ಉಂಟಾಗಿರುವ ಭೀಕರ ಪರಿಸ್ಥಿತಿ ಹಿನ್ನೆಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ನೇಪಾಳ ಪ್ರಧಾನಿ ಬಲೇಂದ್ರ ಶಾ ಅವರೊಂದಿಗೆ ದೂರವಾಣಿ ಮೂಲಕ ಮಾತನಾಡಿ, ಭಾರತದ ಸಂಪೂರ್ಣ ನೆರವಿನ ಭರವಸೆ ನೀಡಿದ್ದಾರೆ. ‘ನೇಪಾಳಕ್ಕೆ ಸಾಧ್ಯವಿರುವ ಎಲ್ಲ ರೀತಿಯ ಮಾನವೀಯ ನೆರವು ನೀಡಲು ಭಾರತ ಸಿದ್ಧವಾಗಿದೆ. ರಕ್ಷಣಾ ಮತ್ತು ಪರಿಹಾರ ಕಾರ್ಯಾಚರಣೆಗಳ ಕುರಿತು ನಮ್ಮ ತಂಡಗಳು ನೇಪಾಳದ ಅಧಿಕಾರಿಗಳೊಂದಿಗೆ ನಿಕಟ ಸಮನ್ವಯದಲ್ಲಿ ಕಾರ್ಯನಿರ್ವಹಿಸುತ್ತಿವೆ’ ಎಂದು ಮೋದಿ ಸಾಮಾಜಿಕ ಮಾಧ್ಯಮದ ಮೂಲಕ ತಿಳಿಸಿದ್ದಾರೆ.
ಕಳೆದ ವರ್ಷವೂ ಇದೇ ಪ್ರದೇಶದಲ್ಲಿ ದುರಂತ
ಕಳೆದ ವರ್ಷದ ಆಗಸ್ಟ್ನಲ್ಲೂ ಇದೇ ಪ್ರದೇಶದಲ್ಲಿ ಇದೇ ರೀತಿಯ ಫ್ಲ್ಯಾಶ್ ಫ್ಲಡ್ ಸಂಭವಿಸಿತ್ತು. ಹೆಚ್ಚಿನ ತಾಪಮಾನದಿಂದ ಟಿಬೆಟ್ನಲ್ಲಿರುವ ಹಿಮನದಿ ಸರೋವರವೊಂದು ಉಕ್ಕಿ ಹರಿದ ಪರಿಣಾಮ ಪ್ರವಾಹ ಉಂಟಾಗಿತ್ತು. ಆಗ 9 ಮಂದಿ ಮೃತಪಟ್ಟಿದ್ದು, ನೇಪಾಳ-ಚೀನಾ ಸಂಪರ್ಕಿಸುವ ಪ್ರಮುಖ ಸೇತುವೆ ಸೇರಿದಂತೆ ಹಲವು ಮೂಲಸೌಕರ್ಯಗಳು ಹಾನಿಗೊಳಗಾಗಿದ್ದವು.
ಇದೀಗ ಮತ್ತೊಮ್ಮೆ ಹಿಮನದಿ ಪ್ರದೇಶದಲ್ಲಿ ಸಂಭವಿಸಿರುವ ಸಾಧ್ಯತೆಯಿರುವ ಹಿಮ-ಬಂಡೆ ಕುಸಿತ ಹಾಗೂ ಅದರಿಂದ ಉಂಟಾದ ಭೀಕರ ಪ್ರವಾಹ ಹಿಮಾಲಯ ಪ್ರದೇಶದಲ್ಲಿ ಹವಾಮಾನ ಬದಲಾವಣೆ ಮತ್ತು ಹಿಮನದಿ ಸರೋವರಗಳ ಅಪಾಯದ ಬಗ್ಗೆ ಮತ್ತೊಮ್ಮೆ ಗಂಭೀರ ಎಚ್ಚರಿಕೆ ನೀಡಿದೆ.
