ಹೊಸದಾಗಿ ನೇಮಕಗೊಂಡಿದ್ದ Hamas ಮಿಲಿಟರಿ ನಾಯಕನನ್ನೂ ಹೊಡೆದುರುಳಿಸಿದ Israel!

ಟೆಲ್ ಅವೀವ್: ಹೊಸದಾಗಿ ನೇಮಕಗೊಂಡಿದ್ದ Hamas ಮಿಲಿಟರಿ ನಾಯಕನನ್ನೂ ಇಸ್ರೇಲ್ ಸೇನೆ ತನ್ನ ವಾಯುದಾಳಿಯಲ್ಲಿ ಹೊಡೆದುರುಳಿಸಿದೆ ಎಂದು ತಿಳಿದುಬಂದಿದೆ.

ಈ ಕುರಿತು ಸ್ವತಃ ಹಮಾಸ್ ಸ್ಪಷ್ಟನೆ ನೀಡಿದ್ದು, ಗಾಜಾದ ತನ್ನ ಹೊಸ ಸೈನಿಕ ನಾಯಕ ಇಸ್ರೇಲ್ ವೈಮಾನಿಕ ದಾಳಿಯಲ್ಲಿ ಸಾವನ್ನಪ್ಪಿರುವುದನ್ನು ಬುಧವಾರ ದೃಢಪಡಿಸಿದೆ. ತನ್ನ ಹಿಂದಿನ ನಾಯಕ ಸಾವನ್ನಪ್ಪಿದ ಎರಡು ವಾರಗಳೊಳಗೆ ಗಾಜಾ ನಗರದಲ್ಲಿ ನಡೆದ ಇಸ್ರೇಲ್ ವೈಮಾನಿಕ ದಾಳಿಯಲ್ಲಿ ತನ್ನ ಸೈನಿಕ ಘಟಕದ ಹೊಸ ನಾಯಕ ಕೂಡ ಮೃತಪಟ್ಟಿದ್ದಾನೆ ಎಂದು ಹಮಾಸ್ ತಿಳಿಸಿದೆ.

ಮಂಗಳವಾರ ನಡೆದ ವೈಮಾನಿಕ ದಾಳಿಯಲ್ಲಿ ಮೊಹಮ್ಮದ್ ಓದೇಹ್ ಅವರ ಪತ್ನಿ ಹಾಗೂ ಇಬ್ಬರು ಮಕ್ಕಳೊಂದಿಗೆ ಸಾವನ್ನಪ್ಪಿದ್ದಾರೆ ಎಂದು ಹಮಾಸ್ ಪ್ರಕಟಣೆಯಲ್ಲಿ ತಿಳಿಸಿದೆ.

ಇದಕ್ಕೂ ಮೊದಲು ಇಸ್ರೇಲ್ ರಕ್ಷಣಾ ಸಚಿವ ಇಸ್ರೇಲಿ ಸೇನೆ ಓದೇಹ್ ಅವರನ್ನು ಗುರಿಯಾಗಿಸಿಕೊಂಡು ಹತ್ಯೆ ಮಾಡಿದೆ ಎಂದು ಘೋಷಿಸಿದ್ದರು. ಸ್ಥಳೀಯ ಆಸ್ಪತ್ರೆಗಳ ಪ್ರಕಾರ, ಮಂಗಳವಾರ ಗಾಜಾ ನಗರದ ಮಾರುಕಟ್ಟೆಯೊಂದರ ಮೇಲೆ ನಡೆದ ದಾಳಿಯಲ್ಲಿ ಓದೇಹ್ ಹಾಗೂ ಅವರ ಕುಟುಂಬ ಸದಸ್ಯರು ಸೇರಿದಂತೆ ಕನಿಷ್ಠ ಐವರು ಸಾವನ್ನಪ್ಪಿದ್ದು, 12 ಮಂದಿ ಗಾಯಗೊಂಡಿದ್ದಾರೆ.

ಈ ದಾಳಿ ಪ್ರಮುಖ ಮುಸ್ಲಿಂ ಹಬ್ಬವಾದ ಈದ್ ಅಲ್-ಅಧಾ ಮುನ್ನಾ ದಿನ ನಡೆದಿದೆ. ಬುಧವಾರ ಗಾಜಾ ನಗರದಲ್ಲಿ ಓದೇಹ್ ಅವರ ಕುಟುಂಬದ ಸಂಯುಕ್ತ ಅಂತ್ಯಕ್ರಿಯೆಗೆ ಸಾವಿರಾರು ಜನರು ಸೇರಿದ್ದರು. ಶೋಕಾಚರಣೆಯಲ್ಲಿ ಭಾಗವಹಿಸಿದವರು ನಾಲ್ಕು ಮೃತದೇಹಗಳನ್ನು ಹಸಿರು ಬಣ್ಣದ ಹಮಾಸ್ ಧ್ವಜಗಳಿಂದ ಮುಚ್ಚಿ, ಮಸೀದಿಯಿಂದ ನಗರದೆಲ್ಲೆಡೆ ಮೆರವಣಿಗೆ ನಡೆಸಿದರು.

ಅವರು ಘೋಷಣೆಗಳನ್ನು ಕೂಗಿ, ಗಾಳಿಯಲ್ಲಿ ಗುಂಡು ಹಾರಿಸಿದರು. ಕೆಲವರು “ಕಸ್ಸಾಂ ಬ್ರಿಗೇಡ್ಸ್‌ನ ಮುಖ್ಯಸ್ಥರಲ್ಲಿ ಒಬ್ಬರು” ಎಂಬ ಪದಗಳಿರುವ ಓದೇಹ್ ಅವರ ಪೋಸ್ಟರ್‌ಗಳನ್ನು ಹಿಡಿದುಕೊಂಡಿದ್ದರು. ಇದು ಹಮಾಸ್‌ನ ಸೈನಿಕ ಘಟಕವನ್ನು ಉಲ್ಲೇಖಿಸುತ್ತದೆ.

ಹಮಾಸ್ ಈ ದಾಳಿಯನ್ನು ಖಂಡಿಸಿ, ಓದೇಹ್ ಮೂರು ದಶಕಗಳಿಗಿಂತ ಹೆಚ್ಚು ಕಾಲ ಸಂಘಟನೆಯಲ್ಲಿ ಸಕ್ರಿಯರಾಗಿದ್ದು, ಅದರ ಸೈನಿಕ ಹಾಗೂ ಶಸ್ತ್ರಸಜ್ಜಿತ ಘಟಕ ಸ್ಥಾಪನೆಯಲ್ಲಿ ಮೊದಲ ಪೀಳಿಗೆಯ ನಾಯಕರಲ್ಲಿ ಒಬ್ಬರಾಗಿದ್ದರು ಎಂದು ತಿಳಿಸಿದೆ. ಕಾಟ್ಜ್ ಅವರು ಓದೇಹ್ ಅವರನ್ನು 2023ರ ಅಕ್ಟೋಬರ್ 7ರ ದಾಳಿಗಳ “ಪ್ರಮುಖ ಸಂಚುಕೋರರಲ್ಲಿ ಒಬ್ಬ” ಎಂದು ಬಣ್ಣಿಸಿದರು. ಆ ದಾಳಿಗಳೇ ಗಾಜಾದಲ್ಲಿ ಎರಡು ವರ್ಷಗಳಿಗಿಂತ ಹೆಚ್ಚು ಕಾಲ ನಡೆಯುತ್ತಿರುವ ಯುದ್ಧಕ್ಕೆ ಕಾರಣವಾಗಿದ್ದವು ಎಂದು ಅವರು ಹೇಳಿದರು.

ಅಕ್ಟೋಬರ್ 7ರ ಹತ್ಯಾಕಾಂಡದ ಬಳಿಕ ಹಮಾಸ್ ಸೈನಿಕ ಘಟಕದ ಮುಖ್ಯಸ್ಥನನ್ನು ಇಸ್ರೇಲ್ ಹತ್ಯೆ ಮಾಡಿರುವುದು ಇದು ನಾಲ್ಕನೇ ಬಾರಿ ಎಂದು ಕಾಟ್ಜ್ ಹೇಳಿದರು.

ಹಮಾಸ್ ನ ಹಿಂದಿನ ಮುಖ್ಯಸ್ಥ Izz al-Din al-Haddad ಮೇ 16ರಂದು ಸಾವನ್ನಪ್ಪಿದ್ದರು. 2023ರ ಅಕ್ಟೋಬರ್ 7ರ ದಾಳಿಯಲ್ಲಿ ಭಾಗಿಯಾಗಿದ್ದ ಹಮಾಸ್ ನಾಯಕರನ್ನು ಇಸ್ರೇಲ್ ಮುಂದುವರಿದು ಗುರಿಯಾಗಿಸಲಿದೆ ಎಂದು ಕಾಟ್ಜ್ ಹೇಳಿದ್ದಾರೆ.

“ಹಮಾಸ್ ಯಾವುದೇ ನಾಗರಿಕ ಅಥವಾ ಸೈನಿಕ ಆಡಳಿತ ನಡೆಸದಂತೆ ಮಾಡುವುದಾಗಿ ನಾವು ಪ್ರತಿಜ್ಞೆ ಮಾಡಿದ್ದೇವೆ,” ಎಂದು ಅವರು X ನಲ್ಲಿ ಬರೆದಿದ್ದಾರೆ. ಚುನಾವಣೆಗೆ ಸಿದ್ಧತೆ ನಡೆಸುತ್ತಿರುವ ಪ್ರಧಾನಿ ಬೆಂಜಮಿನ್ ನೇತನ್ಯಾಹು ಕೂಡ ಅಕ್ಟೋಬರ್ 7ರ ದಾಳಿಯಲ್ಲಿ ಭಾಗಿಯಾದ ಪ್ರತಿಯೊಬ್ಬರನ್ನೂ ಗುರಿಯಾಗಿಸಲಾಗುತ್ತದೆ ಎಂದು ಎಚ್ಚರಿಸಿದರು.

ಗಾಜಾದಲ್ಲಿ ಸೂತಕದ ಈದ್

ಇಸ್ರೇಲ್ ನ ಈ ದಾಳಿ ಮುಸ್ಲಿಮರು ಈದ್ ಅಲ್-ಅಧಾ ಆಚರಣೆಗೆ ಸಿದ್ಧತೆ ನಡೆಸುತ್ತಿದ್ದ ವೇಳೆ ನಡೆದಿದೆ. ಸಾಮಾನ್ಯವಾಗಿ ಕುಟುಂಬ ಸಮಾಗಮಗಳು ಮತ್ತು ಭರ್ಜರಿ ಊಟಗಳಿಂದ ಕೂಡಿರುವ ಈ ಹಬ್ಬ ಈ ವರ್ಷವೂ ಗಾಜಾದಲ್ಲಿ ಮಂಕಾಗಿದೆ. ಗಾಜಾದಲ್ಲಿ ಸೂತಕದ ನಡುವೆಯೇ ಈದ್ ಆಚರಿಸುವಂತಾಗಿದೆ. ವಿನಾಶಕಾರಿ ಯುದ್ಧದ ನಂತರ ಗಾಜಾದ ಬಹುತೇಕ ಜನರು ಇನ್ನೂ ಸ್ಥಳಾಂತರಗೊಂಡ ಸ್ಥಿತಿಯಲ್ಲಿದ್ದು, ಗುಡಾರಗಳು ಅಥವಾ ತಾತ್ಕಾಲಿಕ ಆಶ್ರಯಗಳಲ್ಲಿ ವಾಸಿಸುತ್ತಿದ್ದಾರೆ.

ಸಂಯುಕ್ತ ರಾಷ್ಟ್ರಗಳ ಅಂದಾಜಿನ ಪ್ರಕಾರ, ಗಾಜಾದ 20 ಲಕ್ಷಕ್ಕೂ ಹೆಚ್ಚು ಜನರಲ್ಲಿ ಸುಮಾರು 90 ಶೇಕಡಾ ಮಂದಿ ತಮ್ಮ ಮನೆಗಳನ್ನು ಕಳೆದುಕೊಂಡಿದ್ದಾರೆ. ಅವರಲ್ಲಿ ಹೆಚ್ಚಿನವರು ಈಗ ಇಲಿಗಳ ಕಾಟ ಹಾಗೂ ಒಳಚರಂಡಿ ನೀರು ತುಂಬಿರುವ ದೊಡ್ಡ ಶಿಬಿರಗಳಲ್ಲಿ ಆಶ್ರಯ ಪಡೆದಿದ್ದಾರೆ. ಬದುಕು ಸಾಗಿಸಲು ಅವರು ನೆರವಿನ ಮೇಲೆಯೇ ಅವಲಂಬಿತರಾಗಿದ್ದಾರೆ.

ಈದ್ ಅಲ್-ಅಧಾ ಅಥವಾ “ತ್ಯಾಗದ ಹಬ್ಬ” ವಿಶ್ವದಾದ್ಯಂತ ಲಕ್ಷಾಂತರ ಮುಸ್ಲಿಮರು ಆಚರಿಸುವ ಇಸ್ಲಾಮಿಕ್ ಹಬ್ಬವಾಗಿದೆ. ಹಜ್ ಯಾತ್ರೆಯ ಸಮಯದಲ್ಲಿ ಆರಂಭವಾಗುವ ಈ ನಾಲ್ಕು ದಿನಗಳ ಹಬ್ಬ ಕುಟುಂಬ ಸಮಾಗಮ, ಮಕ್ಕಳಿಗೆ ಹೊಸ ಬಟ್ಟೆ ಹಾಗೂ ಉಡುಗೊರೆಗಳನ್ನು ನೀಡುವ ಸಂತಸದ ಸಂದರ್ಭವಾಗಿರುತ್ತದೆ. “ಇದು ಈದ್ ಅಲ್ಲ... ನಾವು ಜೀವಂತ ಶವಗಳಂತಿದ್ದೇವೆ,” ಎಂದು ಖಾನ್ ಯುನಿಸ್‌ನ ಸ್ಥಳಾಂತರಿತ ವ್ಯಕ್ತಿ ಮಹ್ಮೂದ್ ಸಾಕರ್ ಹೇಳಿದರು.

ಪ್ರದೇಶದಲ್ಲಿ ನಡೆಯುತ್ತಿರುವ ಮಾನವೀಯ ಸಂಕಷ್ಟ ಮತ್ತು ಹತ್ಯಾಕಾಂಡಗಳಿಂದ ಜನರು ತೀವ್ರವಾಗಿ ನೋವಿನಲ್ಲಿದ್ದಾರೆ ಎಂದು ಅವರು ಹೇಳಿದರು.