ಜೆರುಸಲೆಂ: 2023ರ ಅಕ್ಟೋಬರ್ 7ರಂದು ಇಸ್ರೇಲ್ ಮೇಲೆ ನಡೆದ ದಾಳಿಯ ಯೋಜನೆಯಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ ಹಮಾಸ್‌ನ ಹಿರಿಯ ಮಿಲಿಟರಿ ಕಮಾಂಡರ್ ಒಬ್ಬರು, ಗಾಜಾದಲ್ಲಿ ಇಸ್ರೇಲ್ ನಡೆಸಿದ ದಾಳಿಯಲ್ಲಿ ಹತ್ಯೆಯಾಗಿದ್ದಾರೆ ಎಂದು ಪ್ಯಾಲೆಸ್ಟೀನಿಯನ್ ಉಗ್ರಗಾಮಿ ಸಂಘಟನೆಯಾದ ಹಮಾಸ್ ದೃಢಪಡಿಸಿದೆ.
ಈ ದಾಳಿಯ ಯೋಜನೆ ಮತ್ತು ಮೇಲ್ವಿಚಾರಣೆಯಲ್ಲಿ ತೊಡಗಿದ್ದ ಪ್ರಮುಖ ವ್ಯಕ್ತಿಗಳಲ್ಲಿ ಒಬ್ಬರೆಂದು ಹಮಾಸ್‌ನ 'ಅಲ್-ಖಸ್ಸಾಂ ಬ್ರಿಗೇಡ್ಸ್' ಗುರುತಿಸಿರುವ ಸಮೀರ್ ಅಬು ಯೂನಿಸ್, ಶನಿವಾರ ಸಂಜೆ ಹತ್ಯೆಯಾಗಿದ್ದಾರೆ. ಹಮಾಸ್‌ನ ಮಿಲಿಟರಿ ವಿಭಾಗದ ಹಿರಿಯ ಸದಸ್ಯರೊಬ್ಬರನ್ನು ಗುರಿಯಾಗಿಸಿಕೊಂಡು ದಾಳಿ ನಡೆಸಿದ್ದಾಗಿ ಇಸ್ರೇಲ್ ಸೇನೆ ಭಾನುವಾರ ಖಚಿತಪಡಿಸಿದೆ.
ಸ್ವಲ್ಪ ಸಮಯದ ಹಿಂದೆ, ಐಡಿಎಫ್ (IDF) ಮತ್ತು ಐಎಸ್‌ಎ (ISA) ಹಮಾಸ್‌ನ ಮಿಲಿಟರಿ ವಿಭಾಗದ ಹಿರಿಯ ಭಯೋತ್ಪಾದಕನೊಬ್ಬನ ಮೇಲೆ ದಾಳಿ ನಡೆಸಿವೆ" ಎಂದು ಇಸ್ರೇಲ್ ಸೇನೆ ಮತ್ತು ಆಂತರಿಕ ಭದ್ರತಾ ಸಂಸ್ಥೆಯಾದ 'ಶಿನ್ ಬೆಟ್' (Shin Bet) ಭಾನುವಾರ ಮುಂಜಾನೆ ಜಂಟಿ ಹೇಳಿಕೆಯಲ್ಲಿ ತಿಳಿಸಿವೆ. ಆದರೆ, ದಾಳಿಗೆ ಗುರಿಯಾದ ವ್ಯಕ್ತಿ ಯಾರೆಂಬುದನ್ನು ತಕ್ಷಣಕ್ಕೆ ಬಹಿರಂಗಪಡಿಸದ ಸೇನೆಯು, ಹೆಚ್ಚಿನ ವಿವರಗಳನ್ನು ನಂತರ ನೀಡುವುದಾಗಿ ತಿಳಿಸಿದೆ.
ಟೆಲಿಗ್ರಾಮ್‌ ಹೇಳಿಕೆಯೊಂದರಲ್ಲಿ, ಅಲ್-ಖಸ್ಸಾಂ ಬ್ರಿಗೇಡ್ಸ್ ಯೂನಿಸ್ ಸಾವನ್ನು ದೃಢಪಡಿಸಿದೆ ಮತ್ತು ಈ ಕಾರ್ಯಾಚರಣೆಯನ್ನು "ಹೇಡಿತನದ ಹತ್ಯಾ ಕಾರ್ಯಾಚರಣೆ" ಎಂದು ಬಣ್ಣಿಸಿದೆ. "ಅಕ್ಟೋಬರ್ 7ರ ದಾಳಿಯ ಯೋಜನೆ ಮತ್ತು ಮೇಲ್ವಿಚಾರಣೆಯಲ್ಲಿ ತೊಡಗಿದ್ದ ಅತ್ಯಂತ ಪ್ರಮುಖ ಕಮಾಂಡರ್‌ಗಳಲ್ಲಿ ಇವರೂ ಒಬ್ಬರು ಎಂದು ಆ ಗುಂಪು ಹೇಳಿದೆ.
ಎಎಫ್‌ಪಿ (AFP) ವರದಿಯ ಪ್ರಕಾರ, ಅಲ್-ಖಸ್ಸಾಂನ 'ರಾಫಾ ಬ್ರಿಗೇಡ್' ಕಮಾಂಡರ್ ಆಗಿದ್ದ ಯೂನಿಸ್, ಖಾನ್ ಯೂನಿಸ್‌ನ ಪಶ್ಚಿಮ ಭಾಗದಲ್ಲಿರುವ ಅಲ್-ಮವಾಸಿಯಲ್ಲಿ ನಡೆದ ದಾಳಿಯಲ್ಲಿ ಹತ್ಯೆಯಾಗಿದ್ದಾರೆ ಎಂದು ಭದ್ರತಾ ಮೂಲವೊಂದು ತಿಳಿಸಿದೆ. 53 ವರ್ಷದ ಯೂನಿಸ್ ಅವರ ಮೃತದೇಹವನ್ನು ತಮ್ಮ ಸಂಸ್ಥೆ ವಶಕ್ಕೆ ಪಡೆದಿದೆ ಎಂದು ಗಾಜಾದ ನಾಗರಿಕ ರಕ್ಷಣಾ ವಕ್ತಾರ ಮಹಮೂದ್ ಬಸ್ಸಲ್ ಅವರು ಎಎಫ್‌ಪಿಗೆ ತಿಳಿಸಿದ್ದಾರೆ. ದಕ್ಷಿಣ ಗಾಜಾದಲ್ಲಿ ನಡೆದ ಈ ದಾಳಿಯಲ್ಲಿ ಇತರ ಇಬ್ಬರು ವ್ಯಕ್ತಿಗಳು ಗಾಯಗೊಂಡಿದ್ದಾರೆ ಎಂದೂ ಅವರು ತಿಳಿಸಿದ್ದಾರೆ.
ಅಕ್ಟೋಬರ್ 7ರ ದಾಳಿಯಿಂದಾಗಿ ಪ್ರಾರಂಭವಾದ ಎರಡು ವರ್ಷಗಳ ಯುದ್ಧಕ್ಕೆ, ಅಕ್ಟೋಬರ್ 2025ರಲ್ಲಿ ಜಾರಿಗೆ ಬಂದ ಕದನ ವಿರಾಮದ ಮೂಲಕ ತಾತ್ಕಾಲಿಕ ವಿರಾಮ ಸಿಕ್ಕಿತ್ತು. ಆದರೆ, ಇದೀಗ ಎರಡೂ ಕಡೆಯವರು ಕದನ ವಿರಾಮವನ್ನು ಉಲ್ಲಂಘಿಸುತ್ತಿದ್ದಾರೆ ಎಂದು ಪರಸ್ಪರ ಆರೋಪಿಸಿಕೊಳ್ಳುತ್ತಿದ್ದು, ಇಸ್ರೇಲ್ ಮತ್ತು ಹಮಾಸ್ ನಡುವೆ ಉದ್ವಿಗ್ನತೆ ಮುಂದುವರಿದಿದೆ. ಅಮೆರಿಕದ ಬೆಂಬಲವಿರುವ ಕದನ ವಿರಾಮವು ಹೋರಾಟದ ತೀವ್ರತೆಯನ್ನು ಬಹುಮಟ್ಟಿಗೆ ಕಡಿಮೆ ಮಾಡಿದ್ದರೂ, ಇಸ್ರೇಲ್ ಗಾಜಾದಲ್ಲಿ ದಾಳಿಗಳನ್ನು ಮುಂದುವರಿಸಿದೆ.
