ಷರಿಯಾ ಬ್ಯಾಂಕಿಂಗ್ ಪ್ರಾರಂಭಿಸಲು ಗಡುವಿಲ್ಲ: ಆರ್ ಬಿಐ

ನವದೆಹಲಿ: ಭಾರತದಲ್ಲಿ ಷರಿಯಾ ಬ್ಯಾಂಕಿಂಗ್ ಅಥವಾ ಬಡ್ಡಿ ರಹಿತ ಬ್ಯಾಂಕಿಂಗ್ ನ್ನು ಪ್ರಾರಂಭಿಸಲು ಗಡುವು ನೀಡಲಾಗಿಲ್ಲ ಎಂದು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (ಆರ್ ಬಿಐ) ಹೇಳಿದೆ. 

ಇಸ್ಲಾಮ್ ನಲ್ಲಿ ಬಡ್ಡಿ ತೆಗೆದುಕೊಳ್ಳುವುದನ್ನು ಅಪರಾಧ ಎಂದು ಪರಿಗಣಿಸಲಾಗಿದ್ದು, ಹಣಕಾಸು ವ್ಯವಸ್ಥೆಯಲ್ಲಿ ಬಡ್ಡಿ ರಹಿತ ಇಸ್ಲಾಮಿಕ್ ಅಥವಾ ಷರಿಯಾ ಬ್ಯಾಂಕಿಂಗ್ ಗೆ ಅವಕಾಶ ಇದೆ. ಈ ಹಿಂದೆಯೂ ಆರ್ ಬಿಐ ಸಾಂಪ್ರದಾಯಿಕ ಬ್ಯಾಂಕ್ ಗಳಲ್ಲೇ ಇಸ್ಲಾಮಿಕ್ ಬ್ಯಾಂಕಿಂಗ್ ಅಥವಾ ಷರಿಯಾ ಬ್ಯಾಂಕಿಂಗ್ ನ್ನು ಪ್ರಾರಂಭಿಸುವ ಪ್ರಸ್ತಾವನೆ ನೀಡಿತ್ತು. 

ಈಗ ಷರಿಯಾ ಬ್ಯಾಂಕಿಂಗ್ ಗೆ ಸಂಬಂಧಿಸಿದಂತೆ ಆರ್ ಟಿಐ ಅರ್ಜಿಯೊಂದಕ್ಕೆ ಪ್ರತಿಕ್ರಿಯೆ ನೀಡಿರುವ ಆರ್ ಬಿಐ ಷರಿಯಾ ಬ್ಯಾಂಕಿಂಗ್ ಪ್ರಾರಂಭಿಸಲು ಗಡುವು ನೀಡಿಲ್ಲ ಎಂದು ಸ್ಪಷ್ಟನೆ ನೀಡಿದೆ. ಭಾರತ ಸರ್ಕಾರದ ಸೂಚನೆಯ ಮೇರೆಗೆ ಆರ್ ಬಿಐ ರಚಿಸಿದ್ದ ಇಲಾಖೆಯ ಆಂತರಿಕ ತಂಡ ಷರಿಯಾ ಬ್ಯಾಂಕಿಂಗ್ ವ್ಯವಸ್ಥೆಗೆ ಸಂಬಂಧಿಸಿದಂತೆ ಕಾನೂನು ತಾಂತ್ರಿಕ ಮತ್ತು ನಿಯಂತ್ರಣ ವಿಷಯಗಳ ಬಗ್ಗೆ ಸುದೀರ್ಘ ಅಧ್ಯಯನ ನಡೆಸಿ ವರದಿ ನೀಡಿರುವುದಾಗಿ ಆರ್ ಟಿಐ ಪ್ರಶ್ನೆಗೆ ಆರ್ ಬಿಐ ಉತ್ತರ ನೀಡಿದೆ.