ಕಾಯ್ದಿರಿಸಿದ ಟಿಕೆಟ್ ಗಳ ರದ್ದತಿಯಿಂದ ರೈಲ್ವೆ ಇಲಾಖೆಗೆ 14 ಬಿಲಿಯನ್ ರೂ. ಸಂಗ್ರಹ!

ನವದೆಹಲಿ: ಕಾಯ್ದಿರಿಸಿದ ಟಿಕೆಟ್ ಗಳ ರದ್ದತಿಯ ಮೂಲಕ ಭಾರತೀಯ ರೈಲ್ವೆ ಇಲಾಖೆ 2016-17 ನೇ ಸಾಲಿನಲ್ಲಿ 14 ಬಿಲಿಯನ್ ರೂಪಾಯಿ ಆದಾಯ ಗಳಿಸಿದೆ ಎಂದು ರೈಲ್ವೆ ಇಲಾಖೆ ಮಾಹಿತಿ ನೀಡಿದೆ. 

ಆರ್ ಟಿಐ ಕಾರ್ಯಕರ್ತರೊಬ್ಬರ ಪ್ರಶ್ನೆಗೆ ಉತ್ತರಿಸಿರುವ ರೈಲ್ವೆ ಇಲಾಖೆ, ಕಳೆದ ವರ್ಷಕ್ಕಿಂತ ಈ ವರ್ಷದಲ್ಲಿ ಕಾಯ್ದಿರಿಸಿದ ಟಿಕೆಟ್ ಗಳ ರದ್ದತಿಯ ಮೂಲಕ ಸಂಗ್ರಹವಾಗಿರುವ ಆದಾಯ ಶೇ.25.29 ರಷ್ಟು ಹೆಚ್ಚಿದೆ ಎಂದು ಹೇಳಿದೆ. 2015-16 ನೆ ಸಾಲಿನಲ್ಲಿ  11.23 ಬಿಲಿಯನ್, 2014-15 ರಲ್ಲಿ 9.38 ಬಿಲಿಯನ್ ನಷ್ಟು ಹಣ ಸಂಗ್ರಹವಾಗಿತ್ತು ಎಂದು ರೈಲ್ವೆ ಇಲಾಖೆಯ ಪ್ಯಾಸೆಂಜರ್ ರಿಸರ್ವೇಷನ್ ಸಿಸ್ಟನ್ (ಪಿಆರ್ ಎಸ್ ) ಅಡಿಯಲ್ಲಿ ಮಾಹಿತಿ ನೀಡಿದೆ.  

ರೈಲ್ವೆ ಇಲಾಖೆ ಕಾಯ್ದಿರಿಸಲಾಗದ ಟಿಕೆಟ್ ಗಳ ರದ್ದತಿಯಿಂದಲೂ ಆದಾಯ ಗಳಿಸುತ್ತಿದ್ದು, ಆರ್ ಟಿಐ ಮಾಹಿತಿಯ ಪ್ರಕಾರ 2016-17 ನೇ ಸಾಲಿನಲ್ಲಿ 17.87 ಕೋಟಿ ರೂಪಾಯಿ ಸಂಗ್ರಹ ಮಾಡಿದೆ. 2015-16 ನೇ ಸಾಲಿನಲ್ಲಿ 17.23 ಕೋಟಿ, 2014-15 ನೇ ಸಾಲಿನಲ್ಲಿ  14.72 ಕೋಟಿ ರೂಪಾಯಿ ಸಂಗ್ರಹವಾಗಿತ್ತು ಎಂದು ಆರ್ ಟಿಐ ಮೂಲಕ ತಿಳಿದುಬಂದಿದೆ.